મુકેશ અંબાણીની Jio Financial Services Limited અને બેંક ઓફ અમેરિકાએ Jio Credit Limited માં સંયુક્ત સાહસ માટે કરાર કર્યો છે. આ સોદા હેઠળ, બેંક ઓફ અમેરિકા 1.9 બિલિયન અમેરિકન ડોલર (આશરે રૂ. 18,268 કરોડ) માં Jio Credit માં 49.9 % સુધીનો હિસ્સો હસ્તગત કરશે. બુધવારે સ્ટોક એક્સચેન્જ ફાઇલિંગમાં જણાવાયું હતું કે, બેંક ઓફ અમેરિકા (BofA) પ્રેફરન્શિયલ શેર અને વોરંટ ફાળવણી દ્વારા Jio Credit – મુકેશ અંબાણી દ્વારા પ્રમોટ કરાયેલી કંપનીની ધિરાણ શાખામાં હિસ્સો હસ્તગત કરશે. બંને કંપનીઓએ જણાવ્યું હતું કે આ સંયુક્ત સાહસ Jio Financial Services ની ડિજિટલ પહોંચ અને ભારતીય બજારની સમજને બેંક ઓફ અમેરિકાની વૈશ્વિક નાણાકીય સેવાઓ કુશળતા સાથે જોડશે.

બે વર્ષ પહેલાં કંપનીની સ્થાપના

અધિકારીઓએ સ્પષ્ટતા કરી હતી કે, આ બેંક ઓફ અમેરિકા દ્વારા એક મુખ્ય બજારમાં કરવામાં આવેલ નાણાકીય રોકાણ છે અને તેને રિટેલ ધિરાણ વ્યવસાયમાં પ્રવેશ તરીકે જોવું જોઈએ નહીં. બે વર્ષ પહેલાં સ્થાપિત જિયો ક્રેડિટ, અત્યાર સુધી નાના વ્યવસાય માલિકો અને રિટેલ ગ્રાહકો પર ધ્યાન કેન્દ્રિત કરે છે, જે હાઉસિંગ લોન જેવા ઉત્પાદનો ઓફર કરે છે. સંયુક્ત નિવેદન અનુસાર, જિયો ક્રેડિટ ભારતની સૌથી ઝડપથી વિકસતી નોન-બેંકિંગ ફાઇનાન્શિયલ કંપનીઓ (NBFCs) માંની એક છે. 30 જૂન, 2026 સુધીમાં, કંપનીની સંચાલન હેઠળની સંપત્તિ રૂ. 30,667 કરોડ સુધી પહોંચી ગઈ. જોકે, કંપનીએ હજુ સુધી અસુરક્ષિત લોન (જેમ કે વ્યક્તિગત લોન) અને ગ્રાહક ફાઇનાન્સ જેવા ક્ષેત્રોમાં પ્રવેશ કર્યો નથી, જોકે શરૂઆતમાં આને મુખ્ય લક્ષ્ય ક્ષેત્રો માનવામાં આવતા હતા.

કેવો રહેશે સોદો

આ સોદો તેના વિવિધ વ્યવસાયિક ક્ષેત્રોમાં વૈશ્વિક કંપનીઓ સાથે ભાગીદારીની જિયોની વ્યૂહરચનાને વધુ મજબૂત બનાવે છે. આ પહેલા, જિયોએ ભારતમાં વીમા વ્યવસાય માટે જર્મન કંપની આલિયાન્ઝ સાથે અને મ્યુચ્યુઅલ ફંડ ક્ષેત્રમાં પ્રવેશવા માટે યુએસ સ્થિત એસેટ મેનેજમેન્ટ કંપની બ્લેકરોક સાથે ભાગીદારી કરી હતી. આ કરાર હેઠળ, બેંક ઓફ અમેરિકાની પેટાકંપની NB હોલ્ડિંગ્સ પ્રેફરન્શિયલ એલોટમેન્ટ દ્વારા 4.29 કરોડ ઇક્વિટી શેર ખરીદશે, જેમાં રૂ. 6,613 કરોડ સુધીનું રોકાણ કરવામાં આવશે. આનાથી તેને Jio ક્રેડિટમાં 26.50% હિસ્સો મળશે. ત્યારબાદ, NB હોલ્ડિંગ્સ રૂપિયા 11,655 કરોડના 7.56 કરોડ વોરંટ મેળવશે. દરેક વોરંટ 18 મહિનાની અંદર એક ઇક્વિટી શેરમાં રૂપાંતરિત થશે. વોરંટ ખરીદતી વખતે પચીસ ટકા રકમ ચૂકવવી પડશે, અને બાકીની રકમ શેરમાં રૂપાંતરિત થયા પછી ચૂકવવાપાત્ર રહેશે. વોરંટને ઇક્વિટી શેરમાં રૂપાંતરિત કર્યા પછી, NB હોલ્ડિંગ્સ (USA) Jio ક્રેડિટની પેઇડ-અપ ઇક્વિટી મૂડીમાં 49.90% હિસ્સો ધરાવશે.

ભારત: BofA માટે એક મુખ્ય બજાર

Jio ફાઇનાન્શિયલ સર્વિસીસની પેરેન્ટ કંપની, રિલાયન્સ ઇન્ડસ્ટ્રીઝના ચેરમેન અને મેનેજિંગ ડિરેક્ટર મુકેશ અંબાણીએ જણાવ્યું હતું કે, વિકસિત ભારત તરફની સફર માટે સ્કેલ, ટ્રસ્ટ અને સમાવેશ પર બનેલી નાણાકીય વ્યવસ્થા જરૂરી છે. જિયો ફાઇનાન્શિયલ સર્વિસિસ અને બેંક ઓફ અમેરિકા વચ્ચેની ભાગીદારી ટેકનોલોજી અને વૈશ્વિક કુશળતાનો ઉપયોગ કરીને ભારતીયો માટે ક્રેડિટને સરળ, વધુ પારદર્શક અને વધુ સુલભ બનાવવા તરફ એક મહત્વપૂર્ણ પગલું છે. બેંક ઓફ અમેરિકાના અધ્યક્ષ અને સીઈઓ બ્રાયન મોયનિહાને ટિપ્પણી કરી કે ભારત વિશ્વના સૌથી મહત્વપૂર્ણ વિકાસ બજારોમાંનું એક છે અને આ રોકાણ તેના ભવિષ્યમાં તેમના વિશ્વાસને પ્રતિબિંબિત કરે છે. જિયો ફાઇનાન્શિયલે ખૂબ જ ટૂંકા ગાળામાં નોંધપાત્ર વિસ્તરણ હાંસલ કર્યું છે. બંને કંપનીઓની સંયુક્ત શક્તિઓ નાણાકીય સેવાઓની પહોંચને વિસ્તૃત કરવામાં અને ભારતના આર્થિક વિકાસને ટેકો આપવામાં મદદ કરશે.

Ambani Family : ભારતના સૌથી પૈસાદાર બિઝનેસ ફેમિલીમાં અંબાણી પરિવારનો દબદબો યથાવત