અદાણી ગ્રુપનો ‘માસ્ટર પ્લાન’! ગ્રીન એનર્જી માળખાને મજબૂત કરવા માટે ‘મોટું’ પગલુ ભર્યુ, વર્ષ 2029 સુધીમાં બદલાશે ‘ઊર્જાનું ચિત્ર’

ભારતની સૌથી મોટી ખાનગી ઊર્જા સેવા કંપની અદાણી એનર્જી સોલ્યુશન્સ લિ. (AESL) એ દેશના ગ્રીન એનર્જી માળખાને મજબૂત કરવા માટે એક મહત્વનો કદમ ઉઠાવ્યો છે. કંપનીએ રાજસ્થાનના સૌર-સમૃદ્ધ પ્રદેશોમાંથી સ્વચ્છ ઊર્જા વહન કરવા માટેના 6,000 મેગાવોટના હાઇ-વોલ્ટેજ ડાયરેક્ટ કરંટ (HVDC) ટ્રાન્સમિશન પ્રોજેક્ટ માટે જાપાની બેંકોના કોન્સોર્ટિયમ પાસેથી લાંબાગાળાનું ધિરાણ મેળવ્યું છે.

પ્રોજેક્ટની મુખ્ય વિશેષતાઓ:

રૂટ અને લંબાઈ: આ 950 કિલોમીટર લાંબો કોરિડોર રાજસ્થાનના ભાડલાને ઉત્તર પ્રદેશના ફતેહપુર સાથે જોડશે.

ક્ષમતા: આ માળખું 6,000 મેગાવોટની ઇવેક્યુએશન ક્ષમતા ધરાવતું અને 800 કિલોવોટથી વધુના HVDC નેટવર્ક પર આધારિત હશે.

સમયમર્યાદા: આ પ્રોજેક્ટ વર્ષ 2029 સુધીમાં કાર્યરત થવાની અપેક્ષા છે.

તકનીકી સહયોગ: આ પ્રોજેક્ટમાં ભારત હેવી ઇલેક્ટ્રિકલ્સ લિ. (BHEL) ના સહયોગથી હિટાચીની આધુનિક HVDC ટેકનોલોજીનો ઉપયોગ કરવામાં આવશે, જે ‘મેક-ઇન-ઇન્ડિયા’ અભિયાનને પણ વેગ આપશે.

આંતરરાષ્ટ્રીય રોકાણ અને વિશ્વાસ: જાપાનની પ્રતિષ્ઠિત બેંકો જેવી કે, MUFG બેંક અને સુમિટોમો મિત્સુઇ બેંકિંગ કોર્પોરેશન દ્વારા આ ધિરાણ આપવામાં આવ્યું છે. જાપાની એજન્સી JCR દ્વારા કંપનીને BBB+ (સ્થિર) રેટિંગ આપવામાં આવ્યું છે, જે ભારતના સાર્વભૌમ રેટિંગની સમકક્ષ છે અને કંપનીની મજબૂત આર્થિક સ્થિતિ દર્શાવે છે.

પર્યાવરણીય અને સામાજિક પ્રભાવ: આ પ્રોજેક્ટને ‘ગ્રીન લોન’ તરીકે વર્ગીકૃત કરવામાં આવ્યો છે, કારણ કે તે ESG (પર્યાવરણ, સામાજિક અને ગવર્નન્સ) ના વૈશ્વિક ધોરણોને અનુસરે છે. આ લિંક દ્વારા ભારતના મોટા ઔદ્યોગિક અને શહેરી કેન્દ્રોને સ્થિર તેમજ સ્વચ્છ વીજ પુરવઠો મળશે, જે દેશના ઊર્જા સંક્રમણને ગતિ આપશે.

કંપનીના CEO કંદર્પ પટેલે જણાવ્યું હતું કે, આ ભાગીદારી ભારત-જાપાનના ગહન સંબંધો અને ટકાઉ ઊર્જાના ભવિષ્ય માટેની સહિયારી પ્રતિબદ્ધતાને દર્શાવે છે.