Axis Bankનો Q4 નફો 54 ટકા વધ્યો, પ્રોવિઝનમાં ઘટાડાની અસર પરિણામોમાં દેખાઈ
ત્રિમાસિક ગાળા દરમિયાન બેંકની એસેટ ગુણવત્તામાં સુધારો જોવા મળ્યો છે. ક્વાર્ટર દરમિયાન ગ્રોસ એનપીએ અગાઉના ક્વાર્ટરની સરખામણીએ 35 બેસિસ પોઈન્ટ્સ ઘટીને 2.82 ટકા થઈ હતી.
એક્સિસ બેંકે આજે તેના ચોથા ત્રિમાસિક પરિણામો(Axis Bank Q4 Results) જાહેર કર્યા છે. બેન્કના જણાવ્યા અનુસાર માર્ચમાં પૂરા થયેલા ક્વાર્ટરમાં તેનો સ્ટેન્ડઅલોન નફો પાછલા વર્ષની સરખામણીમાં 54 ટકા વધીને રૂ. 4,117.8 કરોડ થયો છે. ગયા વર્ષના સમાન ક્વાર્ટરમાં બેન્કે રૂ. 2,677 કરોડનો નફો કર્યો હતો. એક્સિસ બેંકના જણાવ્યા અનુસાર પ્રોવિઝનમાં ઘટાડો થવાને કારણે બેંકના નફામાં ઉછાળો જોવા મળ્યો છે. આ સમયગાળા દરમિયાન બેંકની સંપત્તિની ગુણવત્તામાં પણ સુધારો થયો છે. સમગ્ર વર્ષ માટે બેંકનો નફો 98 ટકા વધીને 13,025 કરોડ રૂપિયા થયો છે. ગત નાણાકીય વર્ષમાં ચોખ્ખી વ્યાજની આવકમાં 13 ટકાનો વધારો થયો છે.
ત્રિમાસિક પરિણામો કેવા હતા
બેન્કના જણાવ્યા અનુસાર માર્ચ ક્વાર્ટરમાં વ્યાજની ચોખ્ખી આવક 16.7 ટકા વધીને રૂ. 8,819 કરોડના સ્તરે પહોંચી છે. ચોખ્ખી વ્યાજની આવક એ બેંક દ્વારા વિતરિત કરાયેલ લોન પર મળતા વ્યાજ અને ડિપોઝિટ પર ચૂકવવામાં આવતા વ્યાજ વચ્ચેનો તફાવત છે. આ જ બેંકે ત્રિમાસિક ગાળા દરમિયાન ક્રેડિટ ગ્રોથ 15 ટકા અને ડિપોઝિટ ગ્રોથ 19 ટકા નોંધાવી છે. બેંકના જણાવ્યા અનુસાર માર્ચના અંત સુધીમાં કુલ એડવાન્સ રૂ. 7.07 લાખ કરોડ સુધી પહોંચી ગયા છે, જેમાં પાછલા વર્ષની સરખામણીએ 15 ટકાની વૃદ્ધિ સાથે રિટેલ લોનનો હિસ્સો કુલ લોનના 57 ટકા છે અને તેમાં 21 ટકાનો વધારો થયો છે. પાછલા વર્ષની સરખામણીમાં કોર્પોરેટ લોન ગયા વર્ષની સરખામણીમાં 4 ટકા વધી છે. બેંકના નફામાં વધારો થવાનું મુખ્ય કારણ જોગવાઈમાં ઘટાડો છે. માર્ચ ક્વાર્ટરમાં જોગવાઈમાં 54 ટકાનો ઘટાડો જોવા મળ્યો છે. ક્વાર્ટર દરમિયાન ક્રેડિટ કોસ્ટ 0.32 ટકા હતી અને પાછલા વર્ષની સરખામણીમાં 116 બેસિસ પોઈન્ટ્સનો ઘટાડો જોવા મળ્યો હતો.
સંપત્તિ ગુણવત્તા સુધારણા
ત્રિમાસિક ગાળા દરમિયાન બેંકની એસેટ ગુણવત્તામાં સુધારો જોવા મળ્યો છે. ક્વાર્ટર દરમિયાન ગ્રોસ એનપીએ અગાઉના ક્વાર્ટરની સરખામણીએ 35 બેસિસ પોઈન્ટ્સ ઘટીને 2.82 ટકા થઈ હતી. બીજી તરફ નેટ એનપીએ 18 બેસિસ પોઈન્ટ ઘટીને 0.73 ટકા થઈ ગઈ છે. બેંકે પાછલા વર્ષની સરખામણીમાં અન્ય આવકમાં 19 ટકાથી વધુ વૃદ્ધિ નોંધાવી છે અને ક્વાર્ટરના અંત સુધીમાં રૂ. 4,223 કરોડના સ્તરે પહોંચી છે. અન્ય આવકમાં ફી સૌથી વધુ યોગદાન આપનાર છે અને પાછલા વર્ષની સરખામણીમાં તેમાં 11 ટકાનો વધારો થયો છે.
આ પણ વાંચો : Petrol Diesel Price Today : પેટ્રોલ અને ડીઝલના નવા ભાવ જાહેર થયા, ઓઈલ કંપનીઓએ આજે પણ કિંમતમાં ન કર્યો વધારો
આ પણ વાંચો : ક્રેડિટ, ડેબિટ કાર્ડ ટ્રાન્ઝેક્શનને આ રીતે કરો સુરક્ષિત, SBIએ જણાવી 5 મહત્વની ટિપ્સ
વધુ સમાચાર વાંચવા માટે અમારી ટ્વીટર કોમ્યુનિટીમાં જોડાવા અહીં ક્લિક કરો
