સૌરાષ્ટ્ર યુનિવર્સિટી પેપર લીક કેસમાં FSLના રિપોર્ટ પછી પણ પોલીસ કાર્યવાહીમાં વિલંબથી તર્કવિતર્ક

રાજકોટમાં આવેલી સૌરાષ્ટ્ર યુનિવર્સિટીમાં થયેલા પેપરલીક કેસમાં હજુ પણ કાર્યવાહીમાં વિલંબ થઇ રહ્યો છે. FSLના રિપોર્ટ પછી પણ પોલીસ કાર્યવાહીમાં વિલંબથી અનેક તર્કવિતર્ક થઇ રહ્યા છે. રાજકીય અગ્રણીની કોલેજમાંથી પેપરલીક થયાની ચર્ચા થઇ રહી છે. કારણકે પોલીસના બે અલગ અલગ વિભાગોની તપાસ બાદ પણ કેસ ઉકેલાયો નથી. ત્યારે પેપરલીક કરનારાઓ સામે તટસ્થ કાર્યવાહીની વિદ્યાર્થી સંગઠનોની માગ ઉઠી છે.

ગુજરાતમાં રાજકોટની સૌરાષ્ટ્ર યુનિવર્સિટીમાં B.Com અને BBAનું પેપર લીક થવાના કેસમાં તપાસનો ધમધમાટ ચાલી રહ્યો છે.ત્યારે યુનિવર્સિટીમાં FSLની ટીમે તપાસ હાથ ધરી છે.અલગ અલગ કોલજમાં મોકલવામાં આવેલા બોકસ અને કવરની તપાસ કરવામાં આવી હતી. આ તપાસ દરમિયાન કોલેજોમાંથી પરત મંગાવેલા B.Comના 97માંથી 22 બોક્સ ખુલ્લા જોવા મળ્યા હતા.જેને લઇ અલગ અલગ કોલેજો પર શંકા છે.પરંતુ હજી કઇ કોલેજ અને ક્યાંથી પેપર લીક થયું તે બહાર નથી આવ્યું.

સૌરાષ્ટ્ર યુનિવર્સિટીમાં BBA અને B.COM સેમ-5નું પેપર લીક થવાના મામલે હવે રાજકારણ શરૂ થઇ ગયુ છે.તો બીજી તરફ કોંગ્રેસ પ્રવક્તા નિદત બારોટે તો કાર્યકારી કુલપતિઓ પર જ સવાલ ઉઠાવી દીધો છે. નિદત બારોટે રાજ્યની તમામ યુનિવર્સિટીઓમાંથી કાર્યકારી કુલપતિઓને છૂટા કરી નાખવાની માગ કરી છે.તથા ગિરીશ ભીમાણી પર ભલામણકાંડમાં સામેલ હોવાનો આક્ષેપ કરી તેમને પણ તાત્કાલિક છૂટા કરવાની માગ કરી છે.ઉલ્લેખનીય છે કે અગાઉ સૌરાષ્ટ્ર યુનિ.નું BBA અને B.COM સેમ-5નું પેપર લીક થયુ હતુ જેને લઇને ભારે વિવાદ થતા રાતોરાત BBAનું પેપર બદલી નાખવામાં આવ્યું હતુ તથા B.COMની પરીક્ષા રદ કરી નાખવામાં આવી હતી.

(વિથ ઇનપુટ-રોનક મજીઠિયા, રાજકોટ)