આજનું હવામાન : અમદાવાદમાં વીજળીના કડાકા ભડાકા સાથે વરસાદની આગાહી, જુઓ Video
હવામાન વિભાગની આગાહી અનુસાર રાજ્યમાં વરસાદી માહોલ જોવા મળશે. જો કે આગામી સાત દિવસ રાજ્યમાં હળવાથી મધ્યમ વરસાદી ઝાપટા વરસી શકે છે. આજથી 12 ઓગસ્ટ સુધી માછીમારો માટે કોઈ જ સૂચના નથી.
હવામાન વિભાગની આગાહી અનુસાર રાજ્યમાં વરસાદી માહોલ જોવા મળશે. જો કે આગામી સાત દિવસ રાજ્યમાં હળવાથી મધ્યમ વરસાદી ઝાપટા વરસી શકે છે. આજથી 12 ઓગસ્ટ સુધી માછીમારો માટે કોઈ જ સૂચના નથી. જો કે વરસાદી ઝાપટા વચ્ચે કેટલાક વિસ્તારોમાં ગાજવીજ સાથે હળવા વરસાદની શક્યતા છે. જ્યારે અમદાવાદમાં પણ વીજળીના કડાકા ભડાકા સાથે હળવા વરસાદની શક્યતા સેવવામાં આવી રહી છે. તો વરસાદી વિરામ વચ્ચે ગરમીના પ્રકોપની શક્યતા છે. અમદાવાદ સહિત રાજ્યના કેટલાક વિસ્તારોમાં તાપમાનનો પારો 2 થી 3 ડિગ્રી વધે તેવી શક્યતાઓ પણ છે.
ગુજરાતમાં ભારેથી અતિભારે વરસાદની શક્યતા
બીજી તરફ હવામાન નિષ્ણાત અંબાલાલ પટેલની આગાહી મુજબ 15 ઓગસ્ટથી દેશમાં ફરી ચોમાસું સિસ્ટમ સક્રિય થશે. અંબાલાલે જણાવ્યું કે અરબ સાગરના સાયક્લોનિક સર્ક્યુલેશનને કારણે બંગાળ ઉપસાગરની સિસ્ટમ ડીપ ડિપ્રેશનમાં ફેરવાઈ શકે. જેના કારણે 17 ઓગસ્ટથી બંગાળ ઉપસાગરમાં મજબૂત સિસ્ટમ બની શકે. આ સિસ્ટમને કારણે ઓગસ્ટના અંત સુધીમાં રાજ્યમાં ભારેથી અતિભારે વરસાદની શક્યતા છે. તો રાજ્યના કેટલાક ભાગમાં નદીઓમાં પૂરની સ્થિતિ પણ સર્જાઇ શકે છે.
વરસાદના વિરામથી ખેડૂતો ચિંતિત બન્યા છે. ત્યારે અંબાલાલે ખેડૂતોને હૈયાધારણા આપતા કહ્યું કે 17 ઓગસ્ટ પછી વરસાદી પાણી કૃષિ પાક માટે સારું ગણાશે. આથી ખેડૂતોએ ચિંતા કરવાની જરૂર નથી. 20 ઓગસ્ટ આસપાસ સૌરાષ્ટ્ર સહિત અનેક વિસ્તારોમાં ભારેથી અતિભારે વરસાદની શક્યતા છે. આ સાથે જ દક્ષિણ ગુજરાત અને ઉત્તર ગુજરાતમાં પણ ભારે વરસાદ ખાબકી શકે છે.
