Breaking News : ગુજરાતના ખેડૂતોને રાહત, કૃષિ સાધનો ખરીદીની સમયમર્યાદામાં કરાયો વધારો

ગુજરાત સરકારે ખેડૂતોના હિતમાં એક મહત્વપૂર્ણ નિર્ણય લીધો છે. મુખ્યમંત્રી યાંત્રિકરણ યોજના હેઠળ કૃષિ સાધનોની ખરીદી માટેની સમયમર્યાદામાં 15 દિવસનો વધારો કરવામાં આવ્યો છે. આ નિર્ણયથી ગુજરાતના હજારો ખેડૂતોને મોટી રાહત મળી છે, જેમને હવે કૃષિ સાધનો ખરીદવા માટે પૂરતો સમય મળશે.

પાત્ર ખેડૂતોને કૃષિ સાધનો ખરીદવા માટે વધારાની 15 દિવસની મુદત આપવામાં આવી છે. આ વિસ્તરણ ખેડૂતોની સતત રજૂઆતો તેમજ ધારાસભ્યો, સાંસદો અને અન્ય આગેવાનો દ્વારા કરવામાં આવેલી વિનંતીઓના સકારાત્મક પ્રતિભાવ રૂપે આવ્યું છે. અગાઉ, એકસાથે મોટી સંખ્યામાં અરજીઓ મંજૂર થવાને કારણે કૃષિ સાધનો ખેડૂતો સુધી પહોંચાડવામાં વિલંબ થઈ રહ્યો હતો, જેના કારણે ખેડૂતોને સમયસર સાધનો પ્રાપ્ત થતા ન હતા.

સરકારે 2026-27 માટે મુખ્યમંત્રી યાંત્રિકરણ યોજના હેઠળ રૂપિયા 750 કરોડથી વધુની જોગવાઈ કરી છે. આ જોગવાઈ છતાં સાધનોની ઉપલબ્ધતામાં વિલંબ ખેડૂતો માટે મુશ્કેલી ઊભી કરતો હતો. આ સમસ્યાને હલ કરવા માટે, રાજ્ય સરકારે કૃષિ સાધનોના ઉત્પાદકોને પણ સમયસર સાધનો પૂરા પાડવા માટે અપીલ કરી છે, જેથી ખેડૂતો તેમની જરૂરિયાત મુજબના સાધનો મેળવી શકે અને ખેતી કાર્યમાં તેનો ઉપયોગ કરી શકે. આ ખેડૂતલક્ષી પગલું રાજ્યના કૃષિ ક્ષેત્રને વેગ આપશે તેવી અપેક્ષા છે.

દારૂબંધી અને વ્યસનમુક્તિથી સુખી બનેલું ગુજરાતનું આ ગામ, આદિવાસી ગામની પ્રેરણાદાયી ગાથા જાણી ચોંકી જશો