નાતાલની રજાઓમાં સાસણ ગીર પ્રવાસીઓથી છલકાયું, સિંહની ગર્જનાથી ગુંજી ઉઠ્યું જંગલ, જુઓ Video

નાતાલની રજાઓ ચાલી રહી છે ત્યારે ગુજરાત તેમજ દેશના વિવિધ રાજ્યોમાંથી મોટી સંખ્યામાં પ્રવાસીઓ સિંહ દર્શન અને જંગલ સફારીનો લ્હાવો લેવા માટે અહીં આવી રહ્યા છે. વહેલી સવારથી જ ગીરના જંગલ વિસ્તારમાં સફારી વાહનોની લાઈનો જોવા મળે છે. પ્રવાસીઓ સિંહને કુદરતી આવાસમાં નિહાળી રોમાંચ અનુભવી રહ્યા છે. જંગલમાં હરણની મતવાલી ચાલ, વિવિધ જાતિના પક્ષીઓનો મધુર કલરવ અને દૂરથી સંભળાતી સિંહની ગર્જના ગીરના પ્રાકૃતિક સૌંદર્યને વધુ મનોહર બનાવી રહી છે.

ગીરની સફારી એક યાદગાર અનુભવ

ગીરનું અદભૂત પ્રાકૃતિક વૈભવ કોઈપણ પ્રવાસીનું મન મોહી લેવા પૂરતું છે. અહીંની હરિયાળી, ખુલ્લો આકાશ અને જંગલી વાતાવરણ શહેરજીવનની થાકમાંથી મુક્તિ અપાવે છે. પ્રવાસીઓ કહે છે કે ગીરની સફારી એક યાદગાર અનુભવ છે, જે જીવનભર યાદ રહે એવો છે.

પર્યટન વિભાગના અંદાજ મુજબ 31 ડિસેમ્બર સુધી સાસણ ગીરમાં પ્રવાસીઓની ભીડ યથાવત રહેવાની શક્યતા છે. નાતાલ અને નવા વર્ષની ઉજવણી માટે સાસણ ગીર પ્રવાસીઓ માટે આકર્ષણનું કેન્દ્ર બન્યું છે, જેથી સ્થાનિક પર્યટન વ્યવસાયને પણ સારો ફાયદો થઈ રહ્યો છે.