Breaking News: કુરિયર મારફતે ₹475 કરોડના સોનાની દાણચોરીનો પર્દાફાશ, DRI એ બોગસ પેઢીઓનું નેટવર્ક પકડી 6.61 કિલો ગોલ્ડ ઝડપ્યું
ડિરેક્ટોરેટ ઓફ રેવન્યુ ઇન્ટેલિજન્સ (DRI) એ દેશવ્યાપી ગોલ્ડ સ્મગલિંગ નેટવર્કનો પર્દાફાશ કર્યો છે. અમદાવાદ, મુંબઈ, દિલ્હી સહિત 5 શહેરોમાં દરોડા પાડી ₹10.36 કરોડની કિંમતનું 6.61 કિલો સોનું જપ્ત કરી મુખ્ય સૂત્રધાર સહિત 11 શખ્સોની ધરપકડ કરવામાં આવી છે.
ડિરેક્ટોરેટ ઓફ રેવન્યુ ઇન્ટેલિજન્સ (DRI) એ દેશવ્યાપી સોનાની દાણચોરી કરતી એક મોટી સિન્ડિકેટ સામે કડક કાર્યવાહી હાથ ધરીને નેટવર્કનો પર્દાફાશ કર્યો છે. DRI ની ટીમોએ અમદાવાદ, મુંબઈ, દિલ્હી, કોલકાતા અને ગુવાહાટીમાં એકસાથે સંયુક્ત ઓપરેશન ચલાવીને ₹10.36 કરોડથી વધુ કિંમતનું 6.61 કિલો સ્મગલિંગ કરાયેલું વિદેશી સોનું જપ્ત કર્યું છે.
આ કાર્યવાહી દરમિયાન મુખ્ય સૂત્રધાર સહિત કુલ 11 શખ્સોની ધરપકડ કરવામાં આવી છે.
તપાસમાં ચોંકાવનારો ખુલાસો થયો છે કે આરોપીઓ કુરિયર કન્સાઇનમેન્ટમાં સોનું છુપાવીને અલગ-અલગ શહેરોમાં મોકલતા હતા. આ ગેંગે છેલ્લા 9 મહિનામાં આશરે ₹475 કરોડની કિંમતનું 318 કિલો સોનું દેશભરમાં ટ્રાન્સપોર્ટ કર્યું હતું. મોકલનાર અને મેળવનાર કોઈપણ માન્ય વ્યવહાર વિના માત્ર કાગળ પર ઊભી કરાયેલી બોગસ પેઢીઓ અને વ્યક્તિઓના નામે આ કુરિયર રેકેટ ચલાવતા હતા. હાલ DRI દ્વારા આ દાણચોરીના મૂળ સુધી પહોંચવા વધુ તપાસ તેજ કરવામાં આવી છે.
