અદાણી ગ્રુપ માટે આજનો દિવસ વ્યૂહાત્મક રીતે અત્યંત મહત્વનો સાબિત થયો છે. શ્રીલંકા અને ભારત એમ બંને મોરચે ગ્રુપે નવા સીમાચિહ્નો સર કર્યા છે.
અદાણી પોર્ટ્સ (APSEZ), જોન કીલ્સ હોલ્ડિંગ્સ અને શ્રીલંકા પોર્ટ્સ ઓથોરિટીના સંયુક્ત સાહસ એવા કોલંબો વેસ્ટ ઇન્ટરનેશનલ ટર્મિનલ (CWIT) એ એપ્રિલ 2025 માં કામગીરી શરૂ કર્યાના પ્રથમ વર્ષમાં જ 10 લાખ TEU (ટ્વેન્ટી-ફૂટ ઇક્વિવેલન્ટ યુનિટ્સ) કન્ટેનર હેન્ડલ કરવાનો માઈલસ્ટોન પાર કર્યો છે.
લગભગ $800 મિલિયનના રોકાણ સાથે બનેલું આ ટર્મિનલ કોલંબો પોર્ટનું પ્રથમ સંપૂર્ણ ઓટોમેટેડ ડીપ-વોટર ટર્મિનલ છે. 20 મીટરની ઊંડાઈ અને અત્યાધુનિક સિસ્ટમ્સને કારણે તે વિશ્વના સૌથી મોટા કન્ટેનર જહાજોને હેન્ડલ કરવાની ક્ષમતા ધરાવે છે. આ સફળતા હિંદ મહાસાગર ક્ષેત્રમાં ભારતની વધતી જતી આર્થિક તાકાતનું પ્રતીક છે.
બીજી તરફ, અમદાવાદ સ્થિત અદાણી યુનિવર્સિટી એ સંશોધન અને શૈક્ષણિક ક્ષેત્રે નવી ઊંચાઈઓ હાંસલ કરવા માટે IIT મંડી સાથે 5 વર્ષના કરાર કર્યા છે. 18 માર્ચ 2026 ના રોજ થયેલા આ કરાર હેઠળ બંને સંસ્થાઓ સંયુક્ત સંશોધન, ફેકલ્ટી અને સ્ટુડન્ટ એક્સચેન્જ પ્રોગ્રામ, ઇન્ટર્નશિપ અને એક્ઝિક્યુટિવ એજ્યુકેશન જેવા ક્ષેત્રોમાં સાથે મળીને કામ કરશે.
આ ભાગીદારીનો મુખ્ય ઉદ્દેશ્ય ઉદ્યોગલક્ષી શિક્ષણ અને આંતરશાખાકીય સંશોધનને વેગ આપવાનો છે. આ જોડાણથી વિદ્યાર્થીઓને બંને સંસ્થાઓના સંસાધનો અને નિષ્ણાતોનો લાભ મળશે, જે ભવિષ્યમાં ઇનોવેશન અને એપ્લાઇડ નોલેજના નવા દ્વાર ખોલશે.
અદાણી ગ્રુપ એક તરફ દરિયાઈ વેપારના માર્ગો પર પોતાનું વર્ચસ્વ વધારી રહ્યું છે, તો બીજી તરફ ઉચ્ચ શિક્ષણમાં ગુણવત્તાયુક્ત સંશોધન માટે દેશની અગ્રણી સંસ્થાઓ સાથે હાથ મિલાવી રહ્યું છે.
Published On - 9:43 pm, Thu, 19 March 26
