Botad : 9 વર્ષની બાળકીની હત્યાનો ભેદ ઉકેલાયો, માસૂમ પર દુષ્કર્મ આચરનાર નરાધમ પોલીસ પકડમાં
બોટાદના ભગવાનપરા વિસ્તારમાં 15 જાન્યુઆરી 2023ના રાત્રીના એક અવાવરૂ જગ્યાએથી અર્ધનગ્ન હાલતમાં બાળકીનો મૃતદેહ મળી આવ્યો હતો.
બોટાદમાં 9 વર્ષીય બાળકીની હત્યા મુદ્દે પોલીસે આરોપીને ઝડપી પાડ્યો છે. પોલીસે આરોપી રાજેશ ચૌહાણની ધરપકડ કરીને તેને જેલ હવાલે કરી દીધો છે. આરોપીએ બાળકી પર દુષ્કર્મ આચરી હત્યાને અંજામ આપ્યો હતો. ઘટનાની વાત કરીએ તો બોટાદના ભગવાનપરા વિસ્તારમાં 15 જાન્યુઆરી 2023ના રાત્રીના એક અવાવરૂ જગ્યાએથી અર્ધનગ્ન હાલતમાં બાળકીનો મૃતદેહ મળી આવ્યો હતો. બાળકીનો મૃતદેહ અર્ધનગ્ન હાલતમાં મળી આવતા સમાજના આગેવાનોએ હત્યા થઇ હોવાની આશંકાએ ઉગ્ર વિરોધ નોંધાવી ચક્કાજામ કર્યો હતો. ઘટનાની ગંભીરતા અને ઉગ્ર વિરોધને જોતા પોલીસે સક્રિય થઇ 24 કલાકમાં આરોપીને ઝડપી પાડ્યો છે.
પોલીસે આરોપીને ઝડપી વધુ તપાસ હાથ ધરી
ગઈકાલે ભગવાનપરા વિસ્તારમાંથી 9 વર્ષીય બાળકીનો અર્ધનગ્ન હાલતમાં મૃતદેહ મળ્યો હતો. અવાવરૂ જગ્યામાંથી અર્ધનગ્ન હાલતમાં બાળકીનો મૃતદેહ મળતા પોલીસ દોડતી થઈ હતી. બાળકીના મૃતદેહને પોસ્ટમાર્ટમ માટે સોનાવાલા સિવિલ ખસેડાયો હતો. અને બોટાદ જિલ્લા પોલીસવડા સહિતનો કાફલો ઘટનાસ્થળે પહોંચી તપાસનો દૌર આગળ ધપાવ્યો છે. ડીવાયએસપી સહિતના કાફલાની અલગ અલગ ટીમો બનાવી વધુ તપાસ હાથધરી છે.
