અમેરિકા જવાનું હવે સપનું જ રહી જશે ? વિઝા માટે જમા કરાવવા પડશે લાખોના બોન્ડ

જો તમે અમેરિકા જવાનું વિચારી રહ્યા હોવ, તો આ સમાચાર તમારા માટે ચોંકાવનારા હોઈ શકે છે. અમેરિકી વિદેશ વિભાગે વિઝા નિયમોમાં મોટો ફેરફાર કરતા વધુ 12 દેશોને એવી યાદીમાં સામેલ કર્યા છે, જેમના નાગરિકોએ વિઝા અરજી વખતે 15,000 યુએસ ડોલર (આશરે 12.50 લાખ રૂપિયા) સુધીનો બોન્ડ એટલે કે ગેરંટી રકમ જમા કરાવવી પડશે.

કયા નવા 12 દેશો લિસ્ટમાં જોડાયા?

આ નવા નિયમ હેઠળ હવે કમ્બોડિયા, ઇથોપિયા, જ્યોર્જિયા, ગ્રેનાડા, લેસોથો, મોરિશિયસ, મંગોલિયા, મોઝામ્બિક, નિકારાગુઆ, પાપુઆ ન્યૂ ગિની, સેશેલ્સ અને ટ્યુનિશિયાના પાસપોર્ટ ધારકોએ આ રકમ ચૂકવવી પડશે. 2 એપ્રિલથી આ નિયમ આ દેશો પર અમલી બનશે.

બોન્ડની રકમ ક્યારે પાછી મળશે?

અમેરિકી વિદેશ વિભાગે સ્પષ્ટતા કરી છે કે આ બોન્ડની રકમ નીચેના કિસ્સામાં પરત કરવામાં આવશે:

• જો તમારી વિઝા અરજી અસ્વીકાર (Reject) કરવામાં આવે.
• જો તમને વિઝા મળી જાય અને તમે વિઝાની તમામ શરતોનું પાલન કરીને નિર્ધારિત સમયે અમેરિકા છોડી દો.

કેમ લેવાયો આ નિર્ણય?

આ આકરો નિર્ણય મુખ્યત્વે ગેરકાયદેસર સ્થળાંતર (Illegal Migration) રોકવા માટે લેવામાં આવ્યો છે. ટ્રમ્પ પ્રશાસને ગયા વર્ષે આ શરત લાગુ કરી હતી જેથી લોકો વિઝાની મુદત પૂરી થયા પછી પણ અમેરિકામાં રોકાઈ ન જાય. 2 એપ્રિલ બાદ હવે આવા દેશોની કુલ સંખ્યા 50 થઈ જશે.

અત્યારે આ નિયમ જે-તે દેશોના ઓવરસ્ટે રેટ (નક્કી કરેલા સમય કરતા વધુ રોકાતા લોકો) ના આધારે નક્કી કરવામાં આવ્યો છે. હાલમાં આ લિસ્ટમાં ભારતનું નામ સામેલ નથી, જે ભારતીય મુસાફરો માટે રાહતના સમાચાર છે.

શું તમારા ઘરે પણ કામવાળા વારંવાર રજા પાડે છે ? ઘરના કચરા-પોતાનું ટેન્શન હવે ખતમ…