T20 World Cup 2021: હાર્દિક પંડ્યાના બોલીંગ કરવાને થઇ રહેલા સવાલો પર રોહિત શર્માનો જવાબ, કહ્યુ કઇ મેચમાં બોલીંગ કરશે?

T20 World Cup 2021: ઓસ્ટ્રેલિયા સામેની બીજી પ્રેક્ટિસ મેચમાં હાર્દિક પંડ્યા (Hardik Pandya) બોલિંગ ન કરવાને કારણે વિરાટ કોહલી (Virat Kohli) એ બે ઓવર ફેંકી હતી.

Hardik Pandya

TV9 Gujarati | Edited By: Avnish Goswami | Updated on: Oct 20, 2021 | 9:14 PM

ભારત જલ્દી થી જ T20 વર્લ્ડ કપ 2021 (T20 World Cup 2021) માં પાકિસ્તાન સામે મેચ સાથે પોતાનું અભિયાન શરૂ કરવા જઈ રહ્યું છે. આ પહેલા ટીમ ઇન્ડીયા (Team India) એ ઈંગ્લેન્ડ અને ઓસ્ટ્રેલિયા સામે બે વોર્મ અપ મેચ રમી છે. પરંતુ ભારતીય ટીમ (Indian Cricket Team) સાથે સંબંધિત એક પ્રશ્ન હજુ સુધી ઉકેલાયો નથી. આ પ્રશ્ન હાર્દિક પંડ્યા (Hardik Pandya) ની બોલિંગ સાથે સંબંધિત છે. તેણે આખી IPL માં બોલિંગ નહોતી કરી અને હવે તે વોર્મ-અપ મેચોમાં પણ નથી કરતો.

આ સાથે તે ચર્ચામાં વધારો થયો છે, કે તે T20 વર્લ્ડ કપમાં બોલિંગ કરશે કે પછી માત્ર બેટ્સમેન તરીકે રમશે. ઓસ્ટ્રેલિયા સામેની બીજી પ્રેક્ટિસ મેચ પહેલા રોહિત શર્મા આ અંગે જવાબ આપતો જોવા મળ્યો હતો. બીજા વોર્મ-અપમાં રોહિતે કેપ્ટનશીપ સંભાળી. તેણે આશા વ્યક્ત કરી હતી કે હાર્દિક વર્લ્ડ કપની મેચોમાં બોલિંગ કરશે.

રોહિત શર્માએ કહ્યું કે, ભારતને વર્લ્ડ કપ દરમિયાન છઠ્ઠા બોલરની જરૂર પડશે. તેણે કહ્યું, હાર્દિક સારી રીતે સ્વસ્થ થઈ રહ્યો છે. પરંતુ હજુ તેને બોલિંગ કરવા માટે સમય છે, તેણે બોલિંગ શરૂ કરી નથી. પરંતુ તે ટૂર્નામેન્ટની શરૂઆત સુધીમાં તૈયાર થઈ જશે. અમારા મુખ્ય બોલરો પાસે ગુણવત્તા છે, પરંતુ છઠ્ઠા બોલરની જરૂર છે. T20 વર્લ્ડ કપમાં ભારત 24 ઓક્ટોબરે પાકિસ્તાન સામેની મેચથી પોતાના અભિયાનની શરૂઆત કરશે. ભારતના ગૃપમાં અફઘાનિસ્તાન, ન્યૂઝીલેન્ડ જેવી ટીમો પણ સામેલ છે.

શ્રીલંકા પ્રવાસ દરમિયાન હાર્દિકે બોલિંગ કરી હતી

હાર્દિક પંડ્યા તેની પીઠની સર્જરી બાદ પાછો આવ્યો ત્યારથી બોલિંગથી દૂર છે. ગયા વર્ષે પણ તેણે વર્લ્ડ કપ દરમિયાન બોલિંગ નહોતી કરી. પછી તે ઓસ્ટ્રેલિયા અને ઈંગ્લેન્ડ સામેની T20 શ્રેણી દરમિયાન માત્ર બેટ્સમેન તરીકે રમ્યો. જોકે, તેણે જુલાઈમાં શ્રીલંકા પ્રવાસ પર બોલિંગ કરી હતી.

આ પછી એવું માનવામાં આવતું હતું કે, તે ફરીથી ઓલરાઉન્ડર તરીકે જોવા મળશે. પરંતુ IPL 2021 માં તેણે ફરી બોલિંગથી પોતાને દૂર રાખ્યો. જોકે, T20 વર્લ્ડકપને લઈને ભારતીય ટીમ મેનેજમેન્ટ દ્વારા સતત કહેવામાં આવી રહ્યું છે કે ટીમના સંતુલન માટે હાર્દિકની બોલિંગ જરૂરી છે.

ઓસ્ટ્રેલિયા સામેની બીજી પ્રેક્ટિસ મેચમાં વિરાટ કોહલીએ હાર્દિક પંડ્યાને બોલિંગ ન કરવાને કારણે બે ઓવર ફેંકી હતી. તેણે સારી બોલિંગ કરી અને માત્ર 12 રન આપ્યા. રોહિતે કહ્યું કે કોહલી સિવાય તે પોતે અને સૂર્યા પણ કેટલીક ઓવર ફેંકી શકે છે. જોકે, મેચમાં માત્ર કોહલીએ જ બોલિંગ કરી હતી.