જય શાહે વર્લ્ડ કપના શેડ્યૂલમાં ફેરફાર કર્યો, હવે બેંગલુરુને બદલે આ મેદાન પર યોજાશે મેચો
ICC મહિલા વર્લ્ડ કપ 2025નું એક સ્થળ બદલાયું છે. હવે બેંગલુરુને બદલે નવી મુંબઈમાં મેચ રમાશે. ICC પ્રમુખ જય શાહે આ જાહેરાત કરી હતી. જાણો શું છે સંપૂર્ણ સમાચાર
ICC મહિલા ક્રિકેટ વર્લ્ડ કપ 2025ના સમયપત્રકમાં મોટો ફેરફાર કરવામાં આવ્યો છે. ICCએ હવે બેંગલુરુના ચિન્નાસ્વામી સ્ટેડિયમને બદલે નવી મુંબઈમાં મેચ યોજવાનો નિર્ણય લીધો છે. ચિન્નાસ્વામી સ્ટેડિયમની બહાર ભાગદોડ મચવાથી 10 થી વધુ ચાહકોના મોત થયા હતા, જેના કારણે મહિલા ક્રિકેટ વર્લ્ડ કપની મેચો આ સ્ટેડિયમમાં યોજાશે નહીં. હવે આ મેચો નવી મુંબઈના DY પાટિલ સ્ટેડિયમમાં રમાશે. શુક્રવારે, ICCએ ભારત અને શ્રીલંકામાં યોજાનાર વર્લ્ડ કપ માટે એક નવું સમયપત્રક જાહેર કર્યું છે.
ડીવાય પાટિલ સ્ટેડિયમમાં યોજાશે મેચો
મહિલા વર્લ્ડ કપના નવા સમયપત્રક મુજબ, ડીવાય પાટિલ સ્ટેડિયમ ખાતે પાંચ મેચ રમાશે. આ મેચોમાં ત્રણ લીગ મેચ અને એક સેમિફાઈનલનો સમાવેશ થાય છે. જો પાકિસ્તાન ફાઈનલમાં નહીં પહોંચે, તો ટુર્નામેન્ટની ફાઈનલ પણ આ જ સ્ટેડિયમ ખાતે યોજાશે. નવી મુંબઈ ઉપરાંત, વર્લ્ડ કપ મેચો ACA સ્ટેડિયમ (ગુવાહાટી), હોલકર સ્ટેડિયમ (ઈન્દોર), ACA-VDCA સ્ટેડિયમ (વિશાખાપટ્ટનમ) અને આર. પ્રેમદાસા સ્ટેડિયમ (કોલંબો, શ્રીલંકા) ખાતે પણ રમાશે.
UPDATE – #TeamIndia‘s revised schedule confirmed for ICC Women’s Cricket World Cup.#WomenInBlue #CWC25 pic.twitter.com/aQm8VjgzWV
— BCCI Women (@BCCIWomen) August 22, 2025
જય શાહે નવી મુંબઈને ખાસ ગણાવ્યું
ICC ચેરમેન જય શાહે નવી મુંબઈના સ્થળને ખૂબ જ ખાસ ગણાવ્યું. તેમના મતે, આ સ્ટેડિયમ મહિલા ક્રિકેટ માટે એક આદર્શ સ્થળ છે. જય શાહે કહ્યું, ‘તાજેતરના વર્ષોમાં નવી મુંબઈ મહિલા ક્રિકેટના ઘર તરીકે ઉભરી આવ્યું છે. ખેલાડીઓને આંતરરાષ્ટ્રીય મેચો અને મહિલા પ્રીમિયર લીગ દરમિયાન અહીં જબરદસ્ત સમર્થન મળે છે. મને વિશ્વાસ છે કે આ ઉર્જા ICC મહિલા ક્રિકેટ વર્લ્ડ કપની મેચોમાં પણ રહેશે.
ફાઈનલ-સેમિફાઈનલનું સમીકરણ
મહિલા વર્લ્ડ કપની ફાઈનલ 2 નવેમ્બરે કોલંબો અથવા નવી મુંબઈમાં યોજાશે, જેમાં પહેલી સેમિફાઈનલ 29 ઓક્ટોબરે ગુવાહાટી અથવા કોલંબોમાં અને બીજી સેમિફાઈનલ 30 ઓક્ટોબરે નવી મુંબઈમાં રમાશે. જો પાકિસ્તાન ક્વોલિફાય થાય છે, તો તે કોલંબોમાં પહેલી સેમિફાઈનલ રમશે અને જો પાકિસ્તાન ફાઈનલમાં પહોંચે છે, તો ફાઈનલ પણ કોલંબોમાં જ યોજાશે. જો પાકિસ્તાન સેમિફાઈનલમાં નહીં પહોંચે, તો બધી નોકઆઉટ મેચ ભારતમાં જ યોજાશે.
આ પણ વાંચો: રોહિત શર્મા આ મેચથી કરશે વાપસી, પોતાની કારકિર્દી બચાવવા માટે લીધો મોટો નિર્ણય!
