T20 WC Breaking : ટીમ ઈન્ડિયાએ પાઠ શીખી લીધો, ફાઇનલ હવે અમદાવાદની આવી પિચ પર રમાશે

લગભગ અઢી વર્ષ પછી, અમદાવાદનું નરેન્દ્ર મોદી સ્ટેડિયમ ફરી એક ICC વર્લ્ડ કપ ફાઈનલનું સાક્ષી બનવા માટે તૈયાર છે. ટીમ ઈન્ડિયા ફરી એકવાર ટાઈટલ મેચમાં ભાગ લેશે, જ્યાં તેઓ ફરી એકવાર ટ્રોફીના દાવેદાર હશે. પરંતુ આ વખતે જે અલગ હશે તે મોદી સ્ટેડિયમની પિચ છે. ભારત અને ન્યુઝીલેન્ડ વચ્ચે રવિવાર, 8 માર્ચે રમાનારી T20 વર્લ્ડ કપ 2026 ફાઈનલ માટે પિચ અંગે એક મોટો ખુલાસો થયો છે. એક અહેવાલ મુજબ, આ વખતે ટીમ ઇન્ડિયાને અમદાવાદમાં “મિશ્ર” પિચ મળશે.

પોતે પિચ પસંદ કરી, છતાં કામ બગડી ગયું

8 માર્ચે જ્યારે ભારતીય ટીમ મેદાનમાં ઉતરશે , ત્યારે ચાહકોને ફરી એકવાર 19 નવેમ્બર, 2023 ની યાદ આવશે. તે દિવસ હતો જ્યારે રોહિત શર્માના નેતૃત્વમાં ભારતીય ટીમ 2023 ના 0DI વર્લ્ડ કપની ફાઈનલમાં ઓસ્ટ્રેલિયા સામે હારી ગઈ હતી. આજે પણ, જ્યારે તે ફાઈનલ યાદ આવે છે, ત્યારે તે મેચ માટે વપરાયેલી પિચનો વારંવાર ઉલ્લેખ કરવામાં આવે છે. ભારતીય ટીમે તેની પસંદ મુજબ પિચ તૈયાર કરી હતી, પરંતુ તેઓ પોતે તેમાં ફસાઈ ગયા.

ફાઈનલ પહેલા પિચ બની મહત્વનું પરિબળ

પરંતુ ફક્ત 0DI વર્લ્ડ કપ ફાઈનલ જ નહીં, પરંતુ આ T20 વર્લ્ડ કપમાં પણ, ટીમ ઈન્ડિયા આ જ મેદાન પર દક્ષિણ આફ્રિકા સામે હારી ગઈ. 2023 વર્લ્ડ કપ અને 2026 T20 વર્લ્ડ કપ વચ્ચે, ભારતીય ટીમે ચાર ICC ટુર્નામેન્ટમાં 32 મેચ રમી છે, જેમાંથી ફક્ત બે જ હારનો સામનો કરવો પડ્યો છે. બંને વખતે પિચ પારખવામાં ભારતની ભૂલ હારનું કારણ હતી. આને ધ્યાનમાં રાખીને, આ વખતે પિચમાં મોટો ફેરફાર કરવામાં આવ્યો છે, અને આ વખતે તે ફક્ત કાળી માટી નહીં હોય.

બે હાર બાદ મળ્યો બોધપાઠ, પિચમ કર્યો ફેરફાર

એક અહેવાલ મુજબ, ભારતીય ટીમને આ મેચ માટે મિક્સ માટીવાળી પિચ મળશે. આનો અર્થ એ થયો કે તે લાલ માટી અને કાળી માટી બંનેનો ઉપયોગ કરવામાં આવશે. વધુમાં, પિચમાં લાલ માટીનું પ્રમાણ વધુ છે, જે લગભગ 70 ટકા છે, જ્યારે બાકીનો ભાગ કાળી માટીનો છે. આ મહત્વપૂર્ણ છે કારણ કે ભારત 0DI વર્લ્ડ કપ 2023 ની ફાઈનલ અને T20 વર્લ્ડ કપ 2026 માં સુપર 8 મેચમાં આફ્રિકા સામે હારી ગયું હતું, બંને મેચમાં કાળી માટીની પિચનો ઉપયોગ કરવામાં આવ્યો હતો, જે બેટ્સમેન માટે ખૂબ ધીમી સાબિત થઈ હતી.

મિક્સ માટીવાળી પિચ, બેટિંગ-બોલિંગમાં બેલેન્સ

બીજી તરફ, લાલ માટીની પિચ થોડી ઝડપી છે અને સારો ઉછાળો આપે છે, જે ભારતીય બેટ્સમેનોની રમવાની શૈલીને અનુકૂળ છે. તેથી, ફાઈનલ માટે બંને પ્રકારની માટીનો ઉપયોગ કરવાથી બેટ અને બોલ વચ્ચે સંતુલન જળવાઈ રહેશે. આ જ કારણ છે કે ટાઈટલ મેચમાં સારી સ્પર્ધા સુનિશ્ચિત કરવા માટે આ વખતે મિશ્ર પિચ આપવામાં આવી રહી છે. ફાઈનલ પર આની શું અસર થશે તે 8 માર્ચની સાંજે જ ખબર પડશે.

T20 WC Breaking : ભારત-ન્યુઝીલેન્ડ ફાઈનલ પછી વહેંચાશે 103 કરોડ રૂપિયા, ટીમ ઈન્ડિયાને કેટલા મળશે?