Breaking News : 10 વર્ષની રાહનો આવ્યો અંત.. IND vs AUS મેચમાં મંધાના અને શ્રેયંકાનો કમાલ, ભારતની T20 સીરિઝમાં જીતી
ભારતીય મહિલા ટીમે ઓસ્ટ્રેલિયા સામે 2-1થી ઐતિહાસિક T20 શ્રેણી જીતી છે. 2016 પછી પ્રથમ વખત ભારતે ઓસ્ટ્રેલિયાને તેની ધરતી પર T20 શ્રેણીમાં હરાવી, નવ વર્ષની અજેયતાનો અંત લાવ્યો.
IND vs AUS: સ્મૃતિ મંધાના અને શ્રેયંકા પાટિલના શાનદાર પ્રદર્શનથી ભારતીય મહિલા ટીમે 10 વર્ષની રાહનો અંત લાવ્યો છે. હરમનપ્રીત કૌરની કેપ્ટનશીપ હેઠળ ટીમ ઇન્ડિયાએ ઓસ્ટ્રેલિયા સામેની ત્રણ મેચની T20 શ્રેણી 2-1થી જીતી લીધી. આ જીત ખાસ એટલા માટે પણ મહત્વની છે કે ઓસ્ટ્રેલિયાને નવ વર્ષ બાદ ઘરઆંગણે કોઈપણ ફોર્મેટમાં શ્રેણી હારનો સામનો કરવો પડ્યો છે.
પ્રથમ વખત ઓસ્ટ્રેલિયા સામે T20 શ્રેણી જીતી
ઓસ્ટ્રેલિયા પ્રવાસની મજબૂત શરૂઆત કરતા, ભારતીય મહિલા ક્રિકેટ ટીમએ ત્રીજી અને નિર્ણાયક T20 મેચમાં યજમાન ઓસ્ટ્રેલિયા મહિલા ક્રિકેટ ટીમને 17 રનથી પરાજય આપ્યો. આ સાથે ભારતે 2016 બાદ પ્રથમ વખત ઓસ્ટ્રેલિયા સામે T20 શ્રેણી જીતી છે. ઉપ-કેપ્ટન સ્મૃતિ મંધાના અને યુવા સ્પિનર શ્રેયંકા પાટિલ આ ઐતિહાસિક જીતના મુખ્ય નાયકો રહ્યા.
એડિલેડમાં 21 ફેબ્રુઆરી, શનિવારે રમાયેલી આ મેચમાં ભારતે ટોસ જીતીને પહેલા બેટિંગ કરવાનો નિર્ણય લીધો. શરૂઆતમાં શેફાલી વર્માની વિકેટ ઝડપથી પડ્યા બાદ ઇનિંગ થોડું લથડાયું હતું, પરંતુ ત્યારબાદ સ્મૃતિ મંધાના અને જેમીમા રોડ્રિગ્સએ ઇનિંગને સંભાળી લીધી. બંનેએ મળીને 121 રનની મહત્વપૂર્ણ ભાગીદારી નોંધાવી. મંધાનાએ 55 બોલમાં 82 રનની આક્રમક ઇનિંગ રમી, જ્યારે જેમીમાએ 59 રનની અડધી સદી ફટકારી. ભારતે 20 ઓવરમાં 176 રનનો મજબૂત સ્કોર ઊભો કર્યો. ઓસ્ટ્રેલિયા તરફથી એનાબેલ સધરલેન્ડે બે વિકેટ લીધી.
વિકેટ લઈને મેચનો વળાંક બદલી નાખ્યો
લક્ષ્યનો પીછો કરતા ઓસ્ટ્રેલિયાએ આક્રમક શરૂઆત કરી હતી અને જ્યોર્જિયા વોલે પ્રથમ ઓવરમાં જ 18 રન ફટકાર્યા. જોકે, શ્રેયંકા પાટિલે પોતાની પહેલી જ ઓવરમાં વિકેટ લઈને મેચનો વળાંક બદલી નાખ્યો. ટૂંકા સમયમાં જ ઓસ્ટ્રેલિયાએ 32 રનમાં ત્રણ વિકેટ ગુમાવી દીધી. ઉપ-કેપ્ટન એશ્લે ગાર્ડનરે 57 રનની ઝઝૂમતી અડધી સદી ફટકારી, પરંતુ અન્ય બેટર્સ તરફથી પૂરતો સહયોગ મળ્યો નહીં.
ભારત તરફથી શ્રેયંકા પાટિલે 22 રનમાં 3 વિકેટ ઝડપી, જ્યારે શ્રી ચરણીએ 32 રનમાં 3 વિકેટ લીધી. અરુંધતી રેડ્ડીએ પણ બે મહત્વપૂર્ણ વિકેટ લઈને દબાણ સતત જાળવી રાખ્યું. પરિણામે, ઓસ્ટ્રેલિયા 20 ઓવરમાં 159 રન સુધી જ સીમિત રહી અને ભારતે મેચ 17 રનથી જીતી લીધી.
આ જીત સાથે ભારતને મલ્ટી-ફોર્મેટ શ્રેણીમાં કુલ 4-2ની લીડ મળી છે. હવે બંને ટીમો વચ્ચે એક ODI શ્રેણી અને ત્યારબાદ એક ટેસ્ટ મેચ રમાશે. તમામ ફોર્મેટ બાદ સૌથી વધુ પોઈન્ટ મેળવનારી ટીમને શ્રેણીની વિજેતા જાહેર કરવામાં આવશે. જો માત્ર T20 ક્રિકેટની વાત કરીએ, તો 2016 પછી પહેલીવાર ભારતે ઓસ્ટ્રેલિયાને શ્રેણીમાં હરાવીને એક નવી ઇતિહાસ રચ્યો છે.
આ સ્ટાર ભારતીય ક્રિકેટરોએ લીધા છૂટાછેડા, પૂર્વ ભારતીય કેપ્ટન એક નહીં બે વાર થયો પત્નીથી અલગ
