ENG Vs NZ: સ્લિપમાં 1-2 નહીં 6 ફિલ્ડરો, ટીમ ઈંગ્લેન્ડ પર દેખાવા લાગી બ્રેન્ડન મેક્કુલમની અસર

ઈંગ્લેન્ડ અને ન્યુઝીલેન્ડ (ENG Vs NZ) વચ્ચે ચાલી રહેલી ટેસ્ટ મેચ હવે રોમાંચક વળાંક પર પહોંચી ગઈ છે. પહેલા જ દિવસે 17 વિકેટ પડી ગયા બાદ બીજા દિવસે પણ મેચમાં ભારે ઉથલપાથલ જોવા મળી હતી. આ દરમિયાન ટેસ્ટ મેચની એક તસવીર વાયરલ થઈ રહી છે, જે ટેસ્ટ મેચની ખાસિયત દર્શાવે છે. ઈંગ્લેન્ડે (England) ન્યૂઝીલેન્ડની બેટિંગ દરમિયાન 6 સ્લિપ મૂકી છે, જે તેની આક્રમક ફિલ્ડિંગ દર્શાવે છે. આ તસવીર જોઈને ક્રિકેટ ચાહકો ખૂબ જ ભાવુક થઈ ગયા હતા અને લાંબા સમય બાદ આવી તસવીર જોઈને ખુશ થઈ ગયા હતા.

ટેસ્ટ ક્રિકેટમાં સ્લિપમાં ચાર જેટલા ફિલ્ડરો જોવા મળે છે, પરંતુ 6 ફિલ્ડરોને જોવાની વાત એકદમ અલગ છે. પરંતુ ઈંગ્લેન્ડની નવી ટીમને જોતા આ બદલાવ સ્પષ્ટ દેખાઈ રહ્યો છે. ઈંગ્લેન્ડની ટેસ્ટ ટીમને હાલમાં જ નવો ટેસ્ટ કોચ બ્રેન્ડન મેક્કુલમ મળ્યો છે. ન્યૂઝીલેન્ડના ભૂતપૂર્વ કેપ્ટન બ્રેન્ડન મેક્કુલમ તેની કેપ્ટનશિપ દરમિયાન પણ તેના આક્રમક વલણ માટે જાણીતા હતા. મેક્કુલમે ઘણી વખત વિરોધી ટીમ પર હુમલો કરવા માટે ODIમાં 4-4 સ્લિપ ફિલ્ડર્સનો પણ ઉપયોગ કર્યો છે.

હવે જ્યારે મેક્કુલમ ટેસ્ટ ટીમના કોચ છે તો તેની અસર ઈંગ્લેન્ડની ફિલ્ડિંગમાં પણ જોવા મળી હતી. ઈંગ્લેન્ડની ટીમ હાલમાં નવા કોચ અને નવા કેપ્ટન બેન સ્ટોક્સના નેતૃત્વમાં આગળ વધી રહી છે.

જો લોર્ડ્સમાં ચાલી રહેલી આ ટેસ્ટ મેચની વાત કરીએ તો ન્યૂઝીલેન્ડનો પ્રથમ દાવ માત્ર 132 રન પર સમેટાઈ ગયો હતો, જેના જવાબમાં ઈંગ્લેન્ડની પણ ખરાબ સ્થિતિ હતી. ઇંગ્લેન્ડ તેની પ્રથમ ઇનિંગમાં માત્ર 141 રન જ બનાવી શકી હતી. જોકે, ન્યુઝીલેન્ડે બીજા દાવમાં બદલો લીધો હતો અને બીજા દિવસની રમતના અંત સુધીમાં ટીમે ચાર વિકેટના નુકસાને 236 રન બનાવી લીધા હતા.