ENG vs IND: Team India સામે રમશે 34 વર્ષીય ફાસ્ટ બોલર, 27 વર્ષની ઉંમરે કારકિર્દીની શરૂઆત કરી, ફિશિંગ શોપથી લઇ માળી સુધીનું કર્યું કામ
Cricket : ઈયોન મોર્ગન (Eoin Morgan) ની નિવૃત્તિ બાદ ઈંગ્લેન્ડની ક્રિકેટ (England Cricket) ટીમનો ODI અને T20માં એક નવો યુગ શરૂ થઈ રહ્યો છે અને લંકાશાયરનો આ ઝડપી બોલર જોસ બટલરની આગેવાનીમાં ટીમમાં ડેબ્યૂ કરી શકે છે.
ભારત અને ઈંગ્લેન્ડ (ENG vs IND) વચ્ચે બર્મિંગહામમાં પાંચમી ટેસ્ટ મેચ રમાઈ રહી છે. આ મેચ શુક્રવાર 1 જુલાઈના રોજ શરૂ થઈ હતી. આ ટેસ્ટ પછી તરત જ T20 સિરીઝ શરૂ થશે. જેમાં બંને ટીમો ત્રણ વખત ટકરાશે. ટેસ્ટ મેચના પહેલા જ દિવસે ઈંગ્લેન્ડે પણ આ T20 શ્રેણી માટે પોતાની ટીમની જાહેરાત કરી હતી. આ સીરિઝ માટે ટીમમાં કેટલાક ફેરફારો કરવામાં આવ્યા છે. જેમાં જોસ બટલર (Jos Buttler) નું સુકાનીપદ સૌથી મહત્ત્વનું છે. પરંતુ ઈંગ્લિશ ટીમની જાહેરાતમાં સૌથી વધુ ધ્યાન રિચર્ડ ગ્લીસન (Richard Glesson) દ્વારા ખેંચવામાં આવ્યું છે. આવો જ એક મીડિયમ ફાસ્ટ બોલર જેણે 27 વર્ષની ઉંમરે સિનિયર લેવલથી ક્રિકેટની શરૂઆત કરી હતી અને હવે તેણે ઈંગ્લેન્ડની ડોમેસ્ટિક ક્રિકેટમાં ઘણો પ્રભાવ પાડ્યો છે.
જમણા હાથના ફાસ્ટ બોલર રિચાર્ડ ગ્લેસન ઈંગ્લેન્ડની કાઉન્ટી ક્લબ લેન્કેશાયર તરફથી રમે છે અને તેણે તાજેતરની T20 બ્લાસ્ટ ટુર્નામેન્ટમાં આ ટીમ માટે સારું પ્રદર્શન કર્યું હતું. જેના કારણે ઈંગ્લેન્ડ ક્રિકેટ મેનેજમેન્ટને તેની પસંદગી કરવાની ફરજ પડી હતી. જોકે ગ્લેસનની અહીં સુધી પહોંચવાની સફર આસાન ન હતી. કારણ કે તેને સિનિયર ક્રિકેટ રમવાની તક ત્યારે મળી જ્યારે તે 27 વર્ષનો થઇ ચુક્યો હતો.
અનેક પ્રકારની નોકરીઓ કર્યા બાદ રિચર્ડનું નસીબ ખુલ્યું
રિચર્ડ ગ્લેસને (Richard Glesson) માઇર કાઉન્ટીમાં લાંબો સમય વિતાવ્યા બાદ 2015માં 27 વર્ષની ઉંમરે ફર્ટ્સ ક્લાસ ક્રિક્ટમાં પ્રવેશ કર્યો હતો. તે સમયે તે નાની ટુર્નામેન્ટમાં રમતા બાળકોને ક્રિકેટ કોચિંગ પણ આપતો હતો. તેમજ લેંકશાયર માટે ક્રિકેટ ડેવલપમેન્ટ ઓફિસર તરીકે કામ કરતો હતો. જો કે અહીં પહોંચતા પહેલા તેણે અનેક કામો કર્યા હતા. ક્યારેક બોઈલર મેન્યુફેક્ચરિંગ કંપનીમાં કામ કર્યું તો ક્યારેક માછીમારીના સાધનો વેચતી દુકાનમાં અને ક્યારેક માળીની નોકરી પણ કરી. ત્યાર બાદ કોચિંગની નોકરીએ થોડી દિશા આપી. છેવટે તેણે નોર્થમ્પટનશાયર સાથે 3 વર્ષના કરાર સાથે તેની કારકિર્દીની શરૂઆત કરી અને બાદમાં 2018 માં લેન્કેશાયર પરત ફર્યા. ત્યારથી તે આ ક્લબ સાથે છે. જેની એકેડેમીમાંથી તેણે પોતે તેની ક્રિકેટની a, b, c શીખી છે.
કેવી છે કારકિર્દી, શું છે વિશેષતા?
લાંબી હાઇટના ફાસ્ટ બોલર રિચર્ડ ગ્લેસન તેની ચુસ્ત લાઇન અને ચોક્કસ યોર્કર્સ માટે જાણીતો છે. તેણે નોર્થમ્પટનશાયરને તેની પ્રથમ સિઝનમાં T20 બ્લાસ્ટ ટાઇટલ જીતવામાં મહત્વની ભૂમિકા ભજવી હતી. તે વર્તમાન સિઝનમાં T20 બ્લાસ્ટના સૌથી સફળ બોલરોમાંથી એક છે. લેન્કેશાયર તરફથી રમતા રિચર્ડ ગ્લેસને આ સિઝનની દરેક મેચમાં વિકેટ લીધી છે. તેણે અત્યાર સુધીની 13 મેચમાં 16ની એવરેજ સાથે 21 વિકેટ ઝડપી છે અને તે સફળ બોલરોની યાદીમાં બીજા સ્થાને છે. તેની ટૂંકી કારકિર્દીમાં રિચર્ડ ગ્લેસને 64 T20 મેચોમાં 70 વિકેટ લીધી છે. જ્યારે 34 ફર્સ્ટ-ક્લાસ મેચોમાં તેણે 38ના જબરદસ્ત સ્ટ્રાઈક રેટ સાથે 143 વિકેટ લીધી છે.
34 વર્ષીય રિચર્ડ ગ્લેસનને 7 જુલાઈથી શરૂ થનારી T20I શ્રેણી માટે ટીમમાં પસંદ કરવામાં આવ્યો છે. તેના સિવાય ટીમમાં ક્રિસ જોર્ડન, ટિમલ મિલ્સ, રીસ ટોપલી અને ડેવિડ વિલી જેવા બોલર પણ છે. માનવામાં આવી રહ્યું છે કે સિરીઝની પહેલી જ મેચમાં તેને આંતરરાષ્ટ્રીય ડેબ્યૂ કરવાની તક મળી શકે છે.
