ભારતીય ક્રિકેટ ટીમ હાલમાં વેસ્ટ ઈન્ડિઝમાં છે. જ્યાં વનડે શ્રેણી રમાઈ રહી છે. ટીમ ઈન્ડિયા (Team India) ઈંગ્લેન્ડનો પ્રવાસ પૂરો કરીને કેરેબિયન ટાપુઓ પર ગઈ હતી. જો કે ટીમ ઈન્ડિયાના કેટલાક ખેલાડીઓ ઈંગ્લેન્ડમાં જ રહ્યા છે અને ત્યાં તેઓ પોતાનો જલવો દેખાડી રહ્યા છે. આમાંથી બે ખેલાડીઓ હાલમાં સામસામે રમી રહ્યા છે. જેમાંથી એકે પોતાની ગતિથી તબાહી મચાવી રહ્યો છે. હવે તેની નજર ટીમ ઈન્ડિયાના તેના સાથી ખેલાડી પર છે, જે સામેની ટીમ માટે મોટી ઇનિંગ્સ રમવા માટે તૈયાર છે.
ઇંગ્લેન્ડની કાઉન્ટી ચેમ્પિયનશિપ (County Cricket) માં સોમવાર 25 જુલાઇના રોજ લેન્કેશાયર અને કેન્ટ વચ્ચેની મેચ શરૂ થઇ હતી. આમાં ટીમ ઈન્ડિયાના બે ખેલાડીઓ પણ ભાગ લઈ રહ્યા છે. ઝડપી બોલર નવદીપ સૈની (Navdeep Saini) કેન્ટ (Kent Club) માટે જ્યારે ઓલરાઉન્ડર વોશિંગ્ટન સુંદર (Washington Sunder) લેન્કેશાયર માટે રમી રહ્યો છે. જો કે મેચનો પહેલો દિવસ વરસાદના નામે રહ્યો હતો. પરંતુ જ્યારે વરસાદ બંધ થઈ ગયા બાદ રમત શર્ય બની હતી અને ત્યારે ‘સ્પીડ ગન’ નવદીપ સૈનીનો જલવો જોવા મળ્યો હતો.
ગયા અઠવાડિયે તેની ઝડપી બોલિંગથી નવદીપ સૈનીએ કાઉન્ટી ક્રિકેટ (County Cricket) માં શાનદાર પદાર્પણ કર્યું હતું અને એક ઇનિંગ્સમાં પાંચ વિકેટ લીધી હતી. આ સાથે ભલે ટીમ ઈન્ડિયાના દરવાજા તેના માટે આટલી જલ્દી ન ખુલ્યા. પરંતુ તેને બીજી મેચમાં રમવાની તક મળી. આ વખતે પણ ઇંગ્લેન્ડના બેટ્સમેનો નવદીપ સૈની સામે ખાસ રમી શક્યા ન હતા. નવદીપ સૈનીએ પ્રથમ દિવસે ફેંકાયેસી કુલ 34.2 ઓવરમાંથી 11 ઓવર પોતે નાખી અને બેટ્સમેનોને ધૂળ ચટાડી. આ દરમિયાન સૈનીએ ટોપ ઓર્ડરની 3 વિકેટ ઝડપી હતી. જેમાં ઈંગ્લેન્ડના ટેસ્ટ બેટ્સમેન કીટન જેનિંગ્સ પણ સામેલ હતા.
જો કે ઘણી વખત બને છે તેમ નવદીપ સૈની થોડો ખર્ચાળ સાબિત થયો. પરંતુ તેણે પોતાનું કામ કરી દીધું. 11 ઓવરમાં સૈનીએ 45 રન આપીને 3 વિકેટ ઝડપી હતી. પ્રથમ દિવસની રમતના અંત સુધીમાં લેન્કેશાયરે 34.2 ઓવરમાં 4 વિકેટ ગુમાવીને 112 રન બનાવ્યા હતા. ટીમ માટે સુકાની સ્ટીવન ક્રોફ્ટ અને ભારતીય ઓલરાઉન્ડર વોશિંગ્ટન અણનમ પરત ફર્યા હતા.
હવે મેચના બીજા દિવસે એટલે કે મંગળવાર 26 જુલાઈએ સૌની નજર વોશિંગટન સુંદર અને નવદીપ સૈનીની ટક્કર પર રહેશે. ગયા વર્ષે ઓસ્ટ્રેલિયા પ્રવાસ પર આ જ શ્રેણીમાં ટીમ ઈન્ડિયા (Team India) માટે ટેસ્ટ ડેબ્યૂ કરનાર આ બંને ખેલાડીઓએ અત્યાર સુધી કાઉન્ટીમાં શાનદાર પ્રદર્શન કર્યું છે. આ મેચમાં અત્યાર સુધી વોશિંગટન સુંદરે નવદીપ સૈનીના 16 બોલનો સામનો કર્યો હતો. જેમાં તેણે એક ચોગ્ગા સહિત 6 રન બનાવ્યા હતા. હવે બીજા દિવસે સૈનીની નજર એ સાબિત કરવા પર રહેશે કે તેનો સાથી ખેલાડી ટીમ ઈન્ડિયામાં ટોચ પર છે.