શું આજે દિલ્હીને મેયર મળી શકશે? MCD હાઉસમાં આજે બેઠકને લઈ AAP-ભાજપે વ્યુહરચના પાક્કી કરી
નગરપાલિકાની ચૂંટણીને બે માસ જેટલો સમય વીતી ગયો હોવા છતાં હજુ સુધી શહેરને નવા મેયર મળ્યા નથી. ગયા વર્ષે 4 ડિસેમ્બરે યોજાયેલી ચૂંટણી પછી 250 સભ્યોની બોડીનું પ્રથમ સત્ર સંપૂર્ણ વ્યર્થ ગયુ હતુ
દિલ્હીના મેયરની પસંદગી માટે સોમવારે એટલે કે આજે મ્યુનિસિપલ કોર્પોરેશન (MCD) ગૃહની બેઠક બોલાવવામાં આવી છે. આ પહેલા મેયરની પસંદગીના બે પ્રયાસો નિષ્ફળ ગયા છે. એમસીડી હાઉસની બેઠક 6 જાન્યુઆરી અને 24 જાન્યુઆરીએ બે વખત બોલાવવામાં આવી હતી, પરંતુ ભારતીય જનતા પાર્ટી (BJP) અને આમ આદમી પાર્ટી (AAP) ના કોર્પોરેટરોના હોબાળાને કારણે, પ્રિસાઇડિંગ ઓફિસરે મેયરની ચૂંટણી યોજ્યા વિના કાર્યવાહી સ્થગિત કરી દીધી હતી. .
દિલ્હી મ્યુનિસિપલ કોર્પોરેશન (ડીએમસી) એક્ટ 1957 હેઠળ, મેયર અને ડેપ્યુટી મેયરની ચૂંટણી મ્યુનિસિપલ હાઉસની પ્રથમ બેઠકમાં થવી જોઈએ. નગરપાલિકાની ચૂંટણીને બે માસ જેટલો સમય વીતી ગયો હોવા છતાં હજુ સુધી શહેરને નવા મેયર મળ્યા નથી. ગયા વર્ષે 4 ડિસેમ્બરે યોજાયેલી ચૂંટણી પછી 250 સભ્યોની બોડીનું પ્રથમ સત્ર સંપૂર્ણ વ્યર્થ હતું જ્યારે બીજા સત્રમાં ઉમેદવારી લેવામાં આવ્યા બાદ ચૂંટાયેલા કાઉન્સિલરોએ શપથ લીધા હતા. શપથવિધિની કાર્યવાહી પૂર્ણ થયા બાદ પ્રિસાઇડિંગ ઓફિસર અને ભાજપના કાઉન્સિલર સત્ય શર્મા દ્વારા ગૃહનું બીજું સત્ર આગામી તારીખ માટે સ્થગિત કરવામાં આવ્યું હતું.
BJP-AAPએ એકબીજા પર આરોપ લગાવ્યા હતા
ભાજપના સભ્યોએ ચેમ્બરની બહાર AAP અને (દિલ્હીના મુખ્ય પ્રધાન) વિરોધી સૂત્રોચ્ચાર કર્યા હતા, જ્યારે AAP સભ્યોએ ગૃહમાં લગભગ પાંચ કલાક સુધી શાંતિપૂર્ણ વિરોધ કર્યો હતો. ગૃહની કાર્યવાહી સ્થગિત થયા પછી, રાજ્યસભાના સભ્ય સંજય સિંહ સહિતના AAP નેતાઓએ દાવો કર્યો હતો કે મેયરની ચૂંટણી થવા દેવામાં આવી રહી નથી અને ભાજપ લોકશાહીનું ગળું દબાવીને ખતરનાક પરંપરા શરૂ કરી રહ્યું છે.
MCD ચૂંટણીમાં AAPને 134 બેઠકો મળી હતી
MCD ચૂંટણીમાં, AAP 134 કાઉન્સિલરો સાથે એકમાત્ર સૌથી મોટી પાર્ટી તરીકે ઉભરી આવી, જ્યારે ભાજપે 104 બેઠકો જીતી. કોંગ્રેસને નવ બેઠકો મળી હતી. 6 ફેબ્રુઆરીએ બોલાવવામાં આવેલી ગૃહની બેઠકમાં ભાજપે રેખા ગુપ્તાને મેયર પદના ઉમેદવાર તરીકે નિયુક્ત કર્યા છે. બીજી તરફ AAP તરફથી શેલી ઓબેરોય મેયર પદની રેસમાં છે. AAP અને ભાજપે અનુક્રમે આલે મોહમ્મદ ઇકબાલ અને કમલ બાગરીને ડેપ્યુટી મેયર માટે મેદાનમાં ઉતાર્યા છે. સોમવારે મેયર અને ડેપ્યુટી મેયરની સાથે MCDની સ્ટેન્ડિંગ કમિટીના છ સભ્યોની પણ ચૂંટણી થવાની છે. (ભાષા ઇનપુટ સાથે)