આજથી સંસદના બજેટ સત્રનો બીજો તબક્કો, વિપક્ષ યુક્રેનમાં ફસાયેલા ભારતીયો સહિત અનેક મુદ્દે સરકારને ઘેરવાની તૈયારી
સંસદ સત્રનો બીજો તબક્કો એવા સમયે શરૂ થશે જ્યારે ભારતીય જનતા પાર્ટી ઉત્તર પ્રદેશ, ઉત્તરાખંડ, ગોવા અને મણિપુર અને પંજાબમાં આમ આદમી પાર્ટીએ થોડા દિવસો પહેલા જ વિધાનસભાની ચૂંટણીમાં જીત મેળવી છે.
સંસદ(Parliament)ના બજેટ સત્ર(Budget Session)નો બીજો તબક્કો સોમવારથી શરૂ થશે, જેમાં વિપક્ષ(Opposition) સરકારને વધતી જતી બેરોજગારી, કર્મચારી ભવિષ્ય નિધિ પર વ્યાજ દરમાં ઘટાડો અને યુદ્ધગ્રસ્ત યુક્રેન(Ukraine)માં ફસાયેલા ભારતીયોને બહાર કાઢવા સહિત અનેક મુદ્દાઓ પર ચર્ચા કરશે. બજેટ(Budget) પ્રસ્તાવો માટે સંસદની મંજૂરી લેવી અને કેન્દ્રશાસિત પ્રદેશ જમ્મુ અને કાશ્મીર માટે બજેટ રજૂ કરવું સરકારના એજન્ડામાં ટોચ પર હશે. નાણા પ્રધાન નિર્મલા સીતારમણ સોમવારે જમ્મુ અને કાશ્મીર માટે બજેટ રજૂ કરશે અને લંચ પછીની કાર્યવાહી દરમિયાન ગૃહમાં તેની ચર્ચા થઈ શકે છે.
સરકારે બંધારણ (અનુસૂચિત જનજાતિ) ઓર્ડર (સુધારા) બિલને લોકસભામાં વિચારણા અને પસાર કરવા માટે પણ સૂચિબદ્ધ કર્યું છે. બજેટ સત્રના પ્રથમ તબક્કામાં 29 જાન્યુઆરીથી 11 ફેબ્રુઆરી સુધી લોકસભા અને રાજ્યસભાની કાર્યવાહી બે અલગ-અલગ પાળીમાં ચલાવવામાં આવી હતી. જો કે, આ વખતે કોવિડ-19 સંબંધિત સ્થિતિમાં સુધારાને કારણે લોકસભા અને રાજ્યસભાની કાર્યવાહી સવારે 11 વાગ્યાથી એકસાથે ચાલશે.
સંસદ સત્રનો બીજો તબક્કો એવા સમયે શરૂ થશે જ્યારે ભારતીય જનતા પાર્ટીએ થોડા દિવસ પહેલા જ ઉત્તર પ્રદેશ, ઉત્તરાખંડ, ગોવા અને મણિપુર અને પંજાબમાં આમ આદમી પાર્ટીએ વિધાનસભા ચૂંટણીમાં જીત મેળવી છે. અગાઉ, બજેટ સત્રનો પ્રથમ તબક્કો 29 જાન્યુઆરીએ સંસદના સેન્ટ્રલ હોલમાં લોકસભા અને રાજ્યસભાના સંયુક્ત સત્રને રાષ્ટ્રપતિ રામ નાથ કોવિંદના સંબોધન સાથે શરૂ થયો હતો, ત્યારબાદ આર્થિક સર્વે રજૂ કરવામાં આવ્યો હતો.
સીતારમને 1 ફેબ્રુઆરીના રોજ કેન્દ્રીય બજેટ રજૂ કર્યું, ત્યારબાદ રાષ્ટ્રપતિના સંબોધન અને કેન્દ્રીય બજેટ માટે આભાર પ્રસ્તાવ પર ચર્ચા કરવામાં આવી. દરમિયાન, કોંગ્રેસ અધ્યક્ષ સોનિયા ગાંધીએ તેમના નિવાસસ્થાને કોંગ્રેસ સંસદીય વ્યૂહરચના સમિતિની બેઠકની અધ્યક્ષતા કરી હતી અને બજેટ સત્ર દરમિયાન સમાન વિચારધારા ધરાવતા રાજકીય પક્ષો સાથે સંકલનમાં કામ કરવાનો નિર્ણય કર્યો હતો.
રાજ્યસભામાં વિપક્ષના નેતા મલ્લિકાર્જુન ખડગેએ બેઠક બાદ પત્રકારોને જણાવ્યું કે અમે સોમવારથી શરૂ થઈ રહેલા સંસદના બજેટ સત્રમાં ઉઠાવવામાં આવનાર મુદ્દાઓ પર ચર્ચા કરી.
અમે સત્ર દરમિયાન જાહેર હિતના મહત્વના મુદ્દા ઉઠાવવા માટે સમાન વિચારધારા ધરાવતા પક્ષો સાથે સંકલનમાં કામ કરીશું. તેમણે કહ્યું કે યુક્રેનમાંથી ભારતીય વિદ્યાર્થીઓને સુરક્ષિત બહાર કાઢવાનો મુદ્દો, મોંઘવારી, બેરોજગારી, કામદારોનો મુદ્દો, ખેડૂતોને લઘુત્તમ ટેકાના ભાવ વગેરે મુદ્દાઓ આ સત્રમાં ઉઠાવવામાં આવશે. એમ્પ્લોઈઝ પ્રોવિડન્ટ ફંડ ઓર્ગેનાઈઝેશન (EPFO) એ શનિવારે EPF પર વ્યાજ દર 8.5 ટકાથી ઘટાડીને 8.1 ટકા કરવાનો નિર્ણય લીધો છે.વિપક્ષી પાર્ટીઓ યુદ્ધગ્રસ્ત યુક્રેનમાં ફસાયેલા ભારતીયોને બહાર કાઢવા અંગે સરકાર પાસેથી નિવેદનની માંગ કરે તેવી શક્યતા છે.
