મોંઘવારીએ ગરીબ માણસની થાળી પહેલાથી જ મોંઘી કરી છે. જોકે હવે મોંઘવારી (Retail Inflation) વધતા તેની પાસે રોટલી અને મીઠું ખાવાનો પણ વિકલ્પ નથી બચ્યો. કારણ કે મીઠાના ભાવમાં (salt price Hike) પણ વધારો થવાની આશંકા પ્રબળ થવા લાગી છે. માહિતી એ છે કે મીઠા (salt)નું ઉત્પાદન 30 ટકા સુધી ઘટી શકે છે. દેશના સૌથી મોટા મીઠાના ઉત્પાદક રાજ્ય ગુજરાતમાં મીઠાના પાકની સિઝન મોડી શરૂ થવાને કારણે આ મુશ્કેલી ઉભી થઈ છે. જો ઉત્પાદન ઓછું થયું તો મીઠાના ભાવ પણ વધી શકે છે. એવામાં મોંઘવારીએ તંવગરથી માંડીનેસામાન્ય માનવી માટે જરૂરી એવો મીઠાનો સ્વાદ પણ બગાડ્યો છે.
સામાન્ય રીતે ગુજરાતમાં મીઠાનું ઉત્પાદન માર્ચ મહિનાથી શરૂ થઈ જાય છે પરંતુ ચોમાસું લંબાવાને કારણે ખાસ કરીને કાંઠા વિસ્તારના ક્ષેત્રોમાં એપ્રિલ મહિનાની મધ્યમાં ઉત્પાદન શરૂ થયું હતું. નિષ્ણાતોનું કહેવું છે કે જો મોનસૂન જૂનના મધ્યથી પહેલા શરૂ થાય છે તો ઉત્પાદનમાં કાપ મૂકાશે. રાજ્યમાં ગત વર્ષે ઓક્ટોબરના પ્રથમ અઠવાડિયા સુધી વરસાદ પડ્યો હતો. તેને કારણે ખેડૂતો પાસે ઉથ્પાદન માટે ઓછો સમય રહ્યો છે.
સામાન્ય રીતે ગુજરાતમાં મીઠાનું ઉત્પાદન સૌથી વધુ થાય છે. હવે ઉત્પાદન ઓછું થવાની સ્થિતિમાં સરકાર મીઠાની નિકાસ પર પ્રતિબંધ મૂકી શકે છે. સરેરાશ ભારતમાં દર વર્ષે 3 કરોડ ટન મીઠાનું ઉત્પાદન થાય છે. અમેરિકા અને ચીન બાદ ભારત મીઠાનું ત્રીજો સૌથી મોટો ઉત્પાદક દેશ છે. અને દેશના કુલ મીઠાનો 90 ટકા ઉત્પાદન ગુજરાતમાં થાય છે.
ભારતના કુલ મીઠા ઉત્પાદનમાંથી 1 કરોડ ટનની નિકાસ કરવામાં આવે છે 1 કરોડ 25 લાખ ટનની વપરાશ ઉદ્યોગ જગત કરે છે. બાકીનો ઉપયોગ છૂટક ગ્રાહકો માટે કરવામાં આવે છે. મીઠાના ભાવ વધારાની અસર કાચ, પોલિએસ્ટર, પ્લાસ્ટિક, રસાયણ અને અન્ય મહત્વપૂર્ણ ઉદ્યોગો પર પણ થશે.