ફ્રી કોરોના વેક્સીનેશનથી લઈને કૃષિ કાનુન રદ્દ કરવા સુધી, MODI સરકારના આ 5 મોટા નિર્ણયો જે બન્યા ચર્ચાનો વિષય
કેન્દ્ર સરકારે પણ આ વર્ષે ઘણા મોટા અને મહત્વપૂર્ણ નિર્ણયો લીધા જે દેશભરમાં ચર્ચાનો વિષય બન્યા. 2021 ના અંત પહેલા મોદી સરકારે લીધેલા આવા 5 મોટા નિર્ણયો વિશે જાણો જેની દેશભરમાં ચર્ચા થઈ.
વર્ષ 2021ને અલવિદા કહીને વિશ્વ નવા વર્ષને આવકારવા તૈયાર છે. વર્ષ 2021 ઘણી રીતે ખાસ હતું. કોરોના મહામારી (Corona epidemic) વચ્ચે વર્ષ 2021માં દેશે અનેક પડકારોનો પણ સામનો કર્યો. કોરોનાના બીજા તબક્કા દરમિયાન લગભગ દરેક ક્ષેત્રને આર્થિક નુકસાન (economic losses) વેઠવું પડ્યું છે. દરેક પરિસ્થિતિનો સામનો કરતા કેન્દ્ર સરકારે આ વર્ષે ઘણા મોટા અને મહત્વપૂર્ણ નિર્ણયો પણ લીધા જે દેશભરમાં ચર્ચાનો વિષય બન્યા. 2021 ના અંત પહેલા મોદી સરકારે લીધેલા આવા 5 મોટા નિર્ણયો વિશે જાણો જેની દેશભરમાં ચર્ચા થઈ.
ફ્રી કોરોના વેક્સીનેશનની જાહેરાત
આમ તો, દેશ પહેલેથી જ કોરોના મહામારીના પ્રકોપનો સામનો કરી રહ્યો હતો. પરંતુ કોરોનાની બીજી લહેર દેશ માટે કહેર બનીને આવી હતી જેમાં લાખો લોકોએ પોતાનો જીવ ગુમાવ્યો. દેશમાં બગડતી પરિસ્થિતિને ધ્યાનમાં રાખીને રસીકરણ અભિયાન પણ ઝડપી બનાવવામાં આવ્યું હતું અને 40 વર્ષથી વધુ ઉંમરના લોકોનું રસીકરણ ઝડપથી શરૂ થયું હતું. તે જ સમયે, પરિસ્થિતિને નિયંત્રિત કરવા માટે, વડા પ્રધાન નરેન્દ્ર મોદીએ પણ 7 જૂને જાહેરાત કરી હતી કે તમામ નાગરિકોને મફત કોરોના રસી આપવામાં આવશે.
ખેડૂતોની માંગણીઓને ધ્યાનમાં લઈને કૃષિ કાયદા રદ્દ કરવાની જાહેરાત
કોરોના ઉપરાંત વર્ષ 2021માં ખેડૂત આંદોલનને લઈને પણ ઘણી ચર્ચા થઈ હતી. ખેડૂતોએ કૃષિ કાયદાને રદ કરવાની માંગ સાથે 378 દિવસ સુધી સતત વિરોધ કર્યો. આ દરમિયાન ખેડૂત અને કેન્દ્ર સરકાર વચ્ચે અનેકવાર વાટાઘાટો પણ થઈ, પરંતુ દરેક વખતે આ મંત્રણા નિરર્થક રહી અને ખેડૂતો પોતાની માંગ પર અડગ રહ્યા.
દરમિયાન, આ ચળવળમાં એક મોટો વળાંક આવ્યો જ્યારે વડા પ્રધાન નરેન્દ્ર મોદીએ 19 નવેમ્બરના રોજ ત્રણેય કૃષિ કાયદાઓ પાછા ખેંચવાની જાહેરાત કરી. કેન્દ્ર સરકારના આ નિર્ણય પછી, રાષ્ટ્રપતિ રામ નાથ કોવિંદે 1 ડિસેમ્બર, 2021 ના રોજ કૃષિ કાયદો પાછા લેવાના બિલને મંજૂરી આપી હતી અને 11 ડિસેમ્બરે, ખેડૂતો આંદોલન સમાપ્ત કરીને તેમના ઘરે પાછા ફર્યા હતા.
દેશને 7 સંરક્ષણ કંપનીઓ સમર્પિત કરવાનો નિર્ણય
વર્ષ 2021માં સંરક્ષણ ક્ષેત્રે પણ મોટો નિર્ણય લેવામાં આવ્યો છે. વડાપ્રધાન મોદીએ 7 સંરક્ષણ કંપનીઓ દેશને સમર્પિત કરી. સરકારે 41 ઓર્ડનન્સ ફેક્ટરીઓને ફરીથી ડિઝાઇન કરવાનો નિર્ણય કર્યો. પીએમ મોદીએ કહ્યું કે આ નિર્ણય 15-20 વર્ષથી અટકી રહ્યો હતો પરંતુ આ તમામ સાત ડિફેન્સ કંપનીઓ આવનારા સમયમાં ભારતની સૈન્ય તાકાતનો મોટો આધાર બનશે.
છોકરીઓના લગ્નની ઉંમર 18થી વધારીને 21 વર્ષ કરવાનો નિર્ણય
જ્યારે મોદી સરકારે લગ્ન માટે છોકરીઓની ઉંમર 18 થી વધારીને 21 વર્ષ કરવાનો નિર્ણય લીધો ત્યારે દેશને વધુ એક મુદ્દો ચર્ચા માટે મળ્યો. વિરોધ પક્ષોએ પણ આ નિર્ણયનો જોરદાર વિરોધ કર્યો હતો. સરકારે શિયાળુ સત્રમાં The Prohibition of Child Marriage Amendment Bill 2021 રજૂ કર્યું હતું. બિલમાં મહિલાઓની લગ્નની ઉંમર 18 વર્ષથી વધારીને 21 વર્ષ કરવાની જોગવાઈ છે. જોકે, આ બિલને રાષ્ટ્રપતિની સંમતિ મળ્યાના બે વર્ષ બાદ લાગુ કરવામાં આવશે. આ કાયદો તમામ ધર્મો અને જાતિઓને સમાન રીતે લાગુ પડશે.
ચૂંટણી સુધારણા બિલ
નકલી વોટિંગ રોકવા માટે મોદી સરકારે વધુ એક મોટો નિર્ણય લીધો છે. આ નિર્ણય મતદાર કાર્ડને આધાર સાથે લિંક કરવાનો નિર્ણય હતો. ચૂંટણી પંચની ભલામણના આધારે સરકારે સંસદના શિયાળુ સત્રમાં ચૂંટણી સુધારણા સંબંધિત બિલ રજૂ કર્યું હતું, જેને સંસદમાંથી મંજૂરી પણ મળી હતી. આ અંતર્ગત આધાર નંબરને વોટર આઈડી કાર્ડ સાથે લિંક કરવાની જોગવાઈ છે, જેના દ્વારા નકલી વોટર આઈડી કાર્ડને કારણે થતી ગરબડને રોકી શકાય છે.
આ પણ વાંચો : Year Ender 2021: બીજી લહેરના ભયાનક દ્રશ્યોથી લઈને રસીકરણ મુદ્દે રાજકોટની આ ઘટનાઓએ ખેચ્યું સમગ્ર ગુજરાતનું ધ્યાન
Latest News Updates
