પાકિસ્તાનની બે સુંદરીના હની ટ્રેપમાં ફસાયો ભારતીય જવાન, પછી દેશ સાથે કર્યો દગો

ભારતીય સેનાના (Indian Army) જવાન શાંતિમોય રાણા (24) ગામ કંચનપુર જિલ્લા, બાગુંડા પશ્ચિમ બંગાળના રહેવાસી, જે પાકિસ્તાની મહિલા એજન્ટે બિછાવેલ જાળમાં ફસાયો હતો. પાકિસ્તાનની (Pakistan) મહિલાના પ્રેમ અને પૈસાની લાલચમાં પણ આવ્યો હોવાનું સામે આવ્યું છે. ભારતીય સેનાના જવાન શાંતિમોય રાણાની CID ઇન્ટેલિજન્સ જયપુરની ટીમ દ્વારા ધરપકડ કરવામાં આવી છે. આરોપી જવાન શાંતિમોય રાણા (Shantimoy Rana) સોશિયલ મીડિયા દ્વારા મહિલા એજન્ટને ભારતીય સેનાના વ્યૂહાત્મક મહત્વ વિશેની માહિતી શેર કરી રહ્યો હતો.

ડીજી ઈન્ટેલિજન્સ ઉમેશ મિશ્રાએ જણાવ્યું હતું કે પાકિસ્તાની ગુપ્તચર એજન્સી દ્વારા રાજસ્થાનમાં જે જાસૂસી પ્રવૃત્તિઓ કરવામાં આવી રહી છે તેના પર ઓપરેશન સરહદ હેઠળ સીઆઈડી ઈન્ટેલિજન્સ દ્વારા સતત નજર રાખવામાં આવે છે. આ સર્વેલન્સ દરમિયાન, એવું ધ્યાનમાં આવ્યું કે આર્મી જવાન શાંતિમોય રાણા સોશિયલ મીડિયા દ્વારા પાકિસ્તાની ગુપ્તચર હેન્ડલર્સ સાથે સતત સંપર્કમાં છે. ઈન્ટેલિજન્ટ જયપુરની ટીમ દ્વારા જ્યારે જવાનની ગતિવિધિઓ પર નજર રાખવામાં આવી ત્યારે જાણવા મળ્યું કે તે હનીટ્રેપ (honey trap) અને પૈસાની લાલચમાં સોશિયલ મીડિયા દ્વારા પાકિસ્તાની મહિલા એજન્ટને સૈન્યના વ્યૂહાત્મક મહત્વ વિશેની માહિતી શેર કરી રહ્યો હતો. જયપુરના CID ઇન્ટેલિજન્સ દ્વારા 25 જુલાઈના રોજ શાંતિ મોય રાણાને કસ્ટડીમાં લેવામાં આવ્યો હતો.

યુદ્ધ કવાયતની વ્યૂહાત્મક માહિતી અને વીડિયો મોકલ્યાં

ડીજી મિશ્રાએ જણાવ્યું કે, આરોપી જવાનની વિવિધ ગુપ્તચર એજન્સીઓ દ્વારા સંયુક્ત પૂછપરછ કેન્દ્ર, જયપુરમાં તપાસ અને જરૂરી પૂછપરછ કરવામાં આવી હતી. પૂછપરછ દરમિયાન આરોપી જવાને જણાવ્યું કે તે 2018થી ભારતીય સેનામાં છે. લાંબા સમયથી મહિલાઓ સાથે વોટ્સએપ ચેટ કરે છે અને વોટ્સએપ ઓડિયો અને વીડિયો કોલિંગ દ્વારા પાકિસ્તાનની મહિલા એજન્ટના સંપર્કમાં હતો. મિશ્રાએ જણાવ્યું કે ગુરનૂર કૌર ઉર્ફે અંકિતા નામની મહિલાએ તે પોતે ઉત્તર પ્રદેશના શાહજહાંપુરની રહેવાસી હોવાનું અને ત્યાં મિલિટરી એન્જિનિયરિંગ સર્વિસમાં કામ કરતી હોવાનું જણાવ્યું હતું. અન્ય એક મહિલા કે જેણે પોતાનું નામ નિશા હોવાનું અને તે મિલિટરી નર્સિંગ સર્વિસમાં હોવાનું જણાવીને જવાનને હની ટ્રેપ અને પૈસાની લાલચ આપીને ફસાવ્યો હતો. આ બન્ને યુવતીઓએ સેના સંબંધિત ગોપનીય દસ્તાવેજોના ફોટોગ્રાફ્સ અને યુદ્ધ અભ્યાસના વીડિયોની માંગણી કરી હતી.

વીડિયો સોશિયલ મીડિયા દ્વારા મોકલવામાં આવી રહ્યો હતો

હની ટ્રેપમાં ફસાયેલા આરોપી જવાન પોતાની રેજિમેન્ટના ગોપનીય દસ્તાવેજો અને સૈન્ય દાવપેચના વીડિયો સોશિયલ મીડિયા દ્વારા પાકિસ્તાની મહિલા એજન્ટોને મોકલતો હતો. જેના માટે પાકિસ્તાની મહિલા એજન્ટ દ્વારા તેના બેંક ખાતામાં પૈસા મોકલવામાં આવ્યા હતા. DG મિશ્રાએ કહ્યું કે આરોપીની પૂછપરછ અને મોબાઈલ ફોનના ટેકનિકલ વિશ્લેષણમાં તથ્યોની પુષ્ટિ કર્યા પછી, આરોપીઓ વિરુદ્ધ ગવર્નમેન્ટ સિક્રેટ એક્ટ, 1923 હેઠળ કેસ નોંધવામાં આવ્યો છે અને તેની ધરપકડ કરવામાં આવી છે.