મુશળધાર વરસાદને કારણે આવેલા ધસમસતા પૂરથી જમ્મુ અને કાશ્મીરના રાજૌરીમાં ભારે ખાનાખરાબી સર્જાઈ છે. બેલા બસ સ્ટેન્ડનો નીચાણવાળો વિસ્તાર સંપૂર્ણપણે પાણીમાં ડૂબી ગયો હતો, પૂરના વહેતા પાણીમાં અનેક વાહનો તણાઈ ગયા હતા. એકાએક ઘસી આવેલા પૂરના પાણી રહેણાંક વિસ્તારોમાં ઘૂસી જતાં રહેવાસીઓને નોંધપાત્ર નુકસાન થયું છે.

જમ્મુ અને કાશ્મીરમાં વરસાદે ભારે તબાહી મચાવી છે. રાજૌરી, અનંતનાગ અને ઉધમપુર સહિત અનેક જિલ્લાઓમાં ભારે વરસાદને કારણે સ્થાનિક લોકો માટે ભારે મુશ્કેલીઓ ઊભી થઈ છે. રાજૌરી શહેરમાં ગઈકાલે રાત્રે થયેલા મુશળધાર વરસાદ બાદ આવેલા પૂરના કારણે વ્યાપક વિનાશ થયો છે. શહેરના અનેક ભાગોમાં પાણી ભરાઈ ગયા છે, જેના કારણે રહેવાસીઓને ભારે નુકસાન થયું છે.

અહેવાલો અનુસાર, રાજૌરી જિલ્લામાં પૂરના પાણી ઝડપથી વધી રહ્યા છે. બે મકાનો સંપૂર્ણપણે ધરાશાયી થઈ ગયા છે, જ્યારે બેલા બસ સ્ટેન્ડનો નીચાણવાળો વિસ્તાર સંપૂર્ણપણે પાણીમાં ડૂબી ગયો છે. અહીં પાર્ક કરેલા અસંખ્ય વાહનો પૂરના ધસમસતા પ્રવાહમાં તણાઈ ગયા હતા. આ ઘટના મધ્યરાત્રીના આશરે ત્રણ વાગ્યાની આસપાસ બની હતી. બસ સ્ટેન્ડનો કોઈ પત્તો નથી.

પૂરના પાણીમાં ગાડીઓ તણાઈ ગઈ

પાણીના સ્તરમાં વધારો થયા પછી, આશરે 200 થી 250 જેટલી ગાડીઓ પૂરના પાણીમાં તણાઈ ગઈ હતી. આ દ્રશ્ય એક વીડિયોમાં કેદ થયું છે જે ઝડપથી વાયરલ થઈ રહ્યો છે. વીડિયોમાં કુદરતના પ્રકોપની હદ સ્પષ્ટપણે દેખાય છે, જેમાં અસંખ્ય વાહનોને ભારે નુકસાન થયું છે. ઘરોને પણ નુકસાન થયું છે. સ્થાનિક રહેવાસીઓએ વહીવટીતંત્રને મદદ માટે અપીલ કરી છે, અને જણાવ્યું છે કે બસ સ્ટેન્ડ સંપૂર્ણપણે નાશ પામ્યું છે.

Breaking News : ખરાબ હવામાનની આગાહીને પગલે, વૈષ્ણોદેવી-અમરનાથ યાત્રા આજથી અચોક્કસ મુદત માટે સ્થગિત