G20 સમિટ બાદ PM મોદી રશિયા જશે ! રાષ્ટ્રપતિ પુતિન સાથે મુલાકાત કરશે
પીએમ મોદી (PM MODI)રશિયાના પ્રવાસ દરમિયાન રાષ્ટ્રપતિ વ્લાદિમીર પુતિનને મળી શકે છે. જો કે હજુ સુધી આ અંગે કોઈ સત્તાવાર સમર્થન સામે આવ્યું નથી.
વડાપ્રધાન નરેન્દ્ર મોદી જી-20 સમિટમાં ભાગ લેવા ઈન્ડોનેશિયા જવા રવાના થઈ ગયા છે. 15-16 નવેમ્બરના રોજ બાલીમાં G20 સમિટ યોજાશે. આ G-20 સમિટ ભારત માટે ખૂબ જ મહત્વપૂર્ણ છે, કારણ કે સમિટના સમાપન સમારોહમાં ઈન્ડોનેશિયાના રાષ્ટ્રપતિ જોકો વિડોડો ભારતને G20નું અધ્યક્ષપદ સોંપશે. ભારત માટે આ એક મહત્વપૂર્ણ ક્ષણ હશે. એવું કહેવામાં આવી રહ્યું છે કે પીએમ મોદી જી-20 સમિટ સમાપ્ત થયાના થોડા દિવસો બાદ રશિયા માટે રવાના થઈ શકે છે. વડાપ્રધાનના રશિયા પ્રવાસને લઈને બંને દેશોમાં તૈયારીઓ પણ ચાલી રહી છે.
સૂત્રોનું માનીએ તો પીએમ મોદી રશિયાના પ્રવાસ દરમિયાન રાષ્ટ્રપતિ વ્લાદિમીર પુતિનને મળી શકે છે. જો કે હજુ સુધી આ અંગે કોઈ સત્તાવાર સમર્થન સામે આવ્યું નથી. સૂત્રોએ જણાવ્યું કે વડાપ્રધાન નરેન્દ્ર મોદી ડિસેમ્બરના પ્રથમ સપ્તાહમાં રશિયાની મુલાકાત લેશે અને ભારત-રશિયા વાર્ષિક સમિટમાં ભાગ લેશે. અગાઉ, પુતિન-પીએમ મોદીએ છેલ્લે સપ્ટેમ્બરમાં ઉઝબેકિસ્તાનના સમરકંદ શહેરમાં આયોજિત શાંઘાઈ કોઓપરેશન ઓર્ગેનાઈઝેશન (SCO) સમિટની બાજુમાં દ્વિપક્ષીય બેઠક યોજી હતી.
પુતિને પીએમ મોદીના વખાણ કર્યા
આ દ્વિપક્ષીય બેઠકમાં પીએમ મોદીએ કહ્યું હતું કે આ યુગ યુદ્ધનો નથી. ઉલ્લેખનીય છે કે, ભારતે હજુ સુધી યુક્રેન વિરુદ્ધ રશિયાની સૈન્ય કાર્યવાહીની નિંદા કરી નથી અને તેનું વલણ એ રહ્યું છે કે સંકટનો ઉકેલ વાતચીત દ્વારા થવો જોઈએ. થોડા દિવસો બાદ પુતિને પીએમ મોદીના વખાણ કરતા કહ્યું કે વડાપ્રધાન મોદી દુનિયાના એવા લોકોમાંથી એક છે જેઓ પોતાના દેશ અને લોકોના હિતમાં સ્વતંત્ર વિદેશ નીતિ પર કામ કરી રહ્યા છે, તેમને કોઈ રોકવાનો પ્રયાસ કરી રહ્યું નથી.
PM બાલીની મુલાકાતે G20 નેતાઓ સાથે વાતચીત કરશે
રશિયા ભારતને સૈન્ય સાધનોનો મહત્વપૂર્ણ સપ્લાયર છે. ઑક્ટોબર 2018માં ભારતે રશિયા સાથે S-400 મિસાઇલ ડિફેન્સ સિસ્ટમના પાંચ યુનિટ ખરીદવા માટે પાંચ અબજ ડૉલરમાં કરાર કર્યો હતો. અમેરિકાના પ્રતિબંધોની ચેતવણી છતાં ભારતે આ કરાર કર્યો હતો. પીએમ મોદી હાલમાં જ ઈન્ડોનેશિયાની રાજધાની બાલીના પ્રવાસ માટે રવાના થયા છે. તેઓ 14-16 નવેમ્બર સુધી બાલીની મુલાકાત લેશે અને G20 સમિટમાં ભાગ લેશે અને G20 દેશોના નેતાઓ સાથે દ્વિપક્ષીય બેઠક કરશે.
