બુધવારે તમિલનાડુના કુન્નુરમાં આર્મીનું હેલિકોપ્ટર Mi-17V5 ક્રેશ થયું હતું. બોર્ડમાં સીડીએસ બિપિન રાવત, તેમની પત્ની મધુલિકા રાવત અને કેટલાક અન્ય સેના અધિકારીઓ સહિત કુલ 14 લોકો સવાર હતા. ક્રેશ થતાં જ હેલિકોપ્ટરમાં આગ લાગી અને આસપાસના વૃક્ષો પણ સળગવા લાગ્યા. દુર્ઘટના બાદ રેસ્ક્યુ ટીમ ઘટનાસ્થળે પહોંચી ગઇ હતી અને સ્થાનિક લોકોની મદદથી આગ પર કાબૂ મેળવ્યો હતો.
CDS બિપિન રાવત ક્યાં જતા હતા?
તમિલનાડુમાં ઉટીના વેલિંગ્ટનમાં ડિફેન્સ સ્ટાફ કોલેજ છે, જ્યાં CDS બિપિન રાવતનો કાર્યક્રમ આયોજિત કરવામાં આવ્યો હતો. આ કાર્યક્રમમાં બિપિન રાવત પ્રવચન આપવાના હતા. CDS રાવત, આર્મીનું Mi-17V5 હેલિકોપ્ટર કોઈમ્બતુરના સુલુર એરબેઝથી વેલિંગ્ટન તરફ જઈ રહ્યું હતું. આ હેલિકોપ્ટરમાં સીડીએસ અને તેમની પત્ની ઉપરાંત બ્રિગેડિયર રેન્કના અધિકારીઓ પણ સાથે હતા. આ સાથે 2 પાયલટ અને અન્ય લોકો પણ સવાર હતા.
હેલિકોપ્ટર ક્યાં ક્રેશ થયું?
અહેવાલો અનુસાર, CDS બિપિન રાવતનું હેલિકોપ્ટર સુલુરથી વેલિંગ્ટન જતી વખતે કુન્નૂરમાં ક્રેશ થયું હતું. નીલગીરી પર્વતો તમિલનાડુના કુન્નુરથી શરૂ થાય છે. આ વિસ્તાર ટી એસ્ટેટ તરીકે પણ ઓળખાય છે. CDS બિપિન રાવતનું હેલિકોપ્ટર નીલગીરીના આ જંગલોમાં ક્રેશ થયું હતું.
કેવી રીતે થયો અકસ્માત?
ભારતીય વાયુસેનાએ અકસ્માતનું કારણ જાણવા તપાસના આદેશ આપ્યા છે. તે જ સમયે, કેટલાક અહેવાલોમાં એવું માનવામાં આવે છે કે તેની પાછળ ખરાબ હવામાન પણ એક કારણ હોઈ શકે છે.
An IAF Mi-17V5 helicopter, with CDS Gen Bipin Rawat on board, met with an accident today near Coonoor, Tamil Nadu.
An Inquiry has been ordered to ascertain the cause of the accident.— Indian Air Force (@IAF_MCC) December 8, 2021
તમને જણાવી દઈએ કે જનરલ બિપિન રાવત જે Mi-17V5 હેલિકોપ્ટરથી જઈ રહ્યા હતા તે VVIP હેલિકોપ્ટર છે, તેમાં 2 એન્જિન છે. સેના આ હેલિકોપ્ટરનો ઉપયોગ મુશ્કેલ વિસ્તારો માટે કરે છે. તે વિશ્વનું સૌથી અદ્યતન પરિવહન હેલિકોપ્ટર છે. આ હેલિકોપ્ટરનો ઉપયોગ સૈન્ય અને શસ્ત્રોના પરિવહન, ફાયર સપોર્ટ, પેટ્રોલિંગ અને શોધ-અને-બચાવ મિશનમાં થાય છે.