Modi Govt 8 Years: કોંગ્રેસના 60 વર્ષ પર મોદી સરકારના 8 વર્ષ કેટલા ભારે?

આંકડા દર્શાવે છે કે નરેન્દ્ર મોદીની સરકારના 8 વર્ષમાં જે કામ થયું તે કોંગ્રેસના 60 વર્ષમાં પણ નથી થયું. પછી ભલે તે વાત શિક્ષણની હોય, સંરક્ષણની હોય, વ્યાપારની હોય, ખાદ્ય ઉત્પાદનની હોય, ગરીબીની હોય કે પછી રોડ અને વિજળી નિર્માણની વાત હોય બધામાં મોદી સરકાર (Modi government) અવ્વલ છે.

The Narendra Modi government did many big things in eight years. (Illustration - Uday Shankar)

TV9 Gujarati | Edited By: Nidhi Bhatt | Updated on: May 26, 2022 | 3:01 PM

200 વર્ષની બરબાદી અને લૂંટના શાસનની પશ્ચાદભૂ પછી 1947માં અસ્તિત્વમાં આવેલા લોકતાંત્રિક દેશ તરીકે ભારત સામે પડકારોનો એક મોટો પહાડ ઉભો હતો. તેમાં કોઈ શંકા નથી કે ભારતના તત્કાલિન નીતિ ઘડવૈયાઓએ ભારત (India) માટે મજબૂત પાયો નાખ્યો હતો અને ત્યારપછીની સરકારોએ પણ તેને વધુ મજબૂત કરવાની પ્રક્રિયા આગળ ધપાવી હતી. વર્ષ 2014 માં, વડાપ્રધાન નરેન્દ્ર મોદીને (PM Narendra Modi) આઝાદી પછીના સમયગાળામાં તુલનામાં મજબૂત અર્થતંત્ર, સક્રિય લોકશાહી અને નવા ઉદ્યોગપતિઓ વારસામાં મળ્યા હતા. વિકાસ, દરવર્ષે 2 કરોડ નોકરીઓ તેમજ એક હથ્થુ શાસન (પરીવાર વાદ) સમાપ્ત કરવાના વચનો પુરા કરવાની આશા જગાડીને નરેન્દ્ર મોદીએ 2014માં ભારતની સૌથી મોટી ચૂંટણી જીતી હતી, તેને હવે 8 વર્ષ થયા છે.

જો કે 2014 પહેલા તેમના ચૂંટણી પ્રચારમાં મોદીએ દેશની જનતા પાસે કોંગ્રેસના 60 વર્ષની તુલનામાં માત્ર 60 મહિના માંગ્યા હતા, પરંતુ જનતાએ 2019માં 60 મહિનાનો બીજો હપ્તો આપ્યો હતો. આવી સ્થિતિમાં, લોકો હવે 60 અને 8 વર્ષ વચ્ચેનો તફાવત સમજવા માંગે છે. જો કે 60 વર્ષની સરખામણીમાં 8 વર્ષ ખૂબ જ નાનો સમય છે, પરંતુ તેનું વિશ્લેષણ જરૂર કરવું જોઈએ. કે 2014 પહેલાની સરકારોએ 60-65 વર્ષમાં દેશના વિકાસ માટે જે કંઈ કર્યું તેને આ 8 વર્ષમાં કેટલું આગળ ધપાવવામાં આવ્યું અને 8 વર્ષમાં મોદી સરકારે એવું શું નવું કર્યું જે અગાઉની સરકારો કરી શકતી હતી, પરંતુ થયુ ન હતું.

સ્વતંત્ર ભારતની પ્રથમ વસ્તી ગણતરી 1951 માં હાથ ધરવામાં આવી હતી અને તેના આંકડા દર્શાવે છે કે તે સમયે દેશની વસ્તી 35.90 કરોડ હતી, જેમાંથી લગભગ 75 ટકા ગરીબ હતા, જ્યારે આજે 130 કરોડની વસ્તીમાંથી માત્ર 10 ટકા જ ગરીબ છે. કોરોના મહામારી છતાં 8 વર્ષ જૂની મોદી સરકાર માટે આ એક મોટી ઉપલબ્ધિ છે. 2014માં જ્યારે મોદી સરકારે સત્તા સંભાળી ત્યારે ગરીબીનો આંકડો 21 ટકાની આસપાસ હતો. એ અલગ વાત છે કે કોરોના મહામારી બાદથી સરકાર દેશના 80 કરોડ લોકોને સતત મફત રાશન આપી રહી છે. મતલબ કે 80 કરોડ લોકો પાસે રાશન લેવા માટે પૂરતી આવક નથી.

સડક નિર્માણની વાત કરીએ તો 1951માં ભારતમાં 3.99 લાખ કિમી રોડ હતા. 2014માં તે વધીને 54 લાખ કિ.મી. થઈ ગયા. મોદી સરકારના સત્તાના 8 વર્ષની વાત કરીએ તો તે લગભગ 65 લાખ કિલોમીટર સુધી પહોંચી ગયા છે. રોડ નેટવર્કમાં અમેરિકા પછી ભારત બીજા ક્રમે છે. એવી અપેક્ષા રાખવામાં આવે છે કે 2025 સુધીમાં, ભારતનું રોડ નેટવર્ક યુએસને પછાડીને વિશ્વમાં સૌથી મોટું બની જશે.

1947માં જ્યારે દેશ આઝાદ થયો ત્યારે વીજ ઉત્પાદન ક્ષમતા માત્ર 1362 મેગાવોટ હતી. 2013-14માં તે વધીને લગભગ 1.75 લાખ મેગાવોટ અથવા 175 ગીગાવોટ થયું હતું. ભારત સરકારના ઉર્જા મંત્રાલયની વેબસાઈટ અનુસાર, હાલમાં ભારત પાસે 3 લાખ 99 હજાર 497 મેગાવોટ એટલે કે લગભગ 400 ગીગાવોટ વીજળી ઉત્પન્ન કરવાની ક્ષમતા છે. જ્યારે પીક ડિમાન્ડ 205 GW આસપાસ છે. કહેવાનો અર્થ એ છે કે મોદી સરકારમાં વીજળીનું સરપ્લસ ઉત્પાદન છે. વીજ ઉત્પાદન ક્ષમતામાં છેલ્લા 8 વર્ષમાં 225 GW નો વધારો થયો છે, જે આશ્ચર્યજનક છે. ત્યારે એક પ્રશ્ન એ ઉભો થાય છે કે દેશમાં વારંવાર વીજળીની કટોકટી કેમ સર્જાય છે? આનો સરળ જવાબ એ છે કે સરકારની વીજળી વિતરણ વ્યવસ્થાપન વ્યવસ્થા યોગ્ય નથી. તેને ઠીક કરવાની જરૂર છે.

Web Stories View more

લાલ લહેંગો, હાથમાં ચૂડો અને હેવી જ્વેલરી..લગ્નમાં પરી જેવી લાગી આરતી સિંહ

વિરાટ કોહલીએ ફટકારી અડધી સદી, છતાં આ મામલે કર્યા નિરાશ

જમતા પહેલા, જમતી વખતે કે જમ્યા બાદ જાણો ક્યારે ખાવું જોઈએ સલાડ?

Nita Ambani Tea Cup: 3 લાખના કપમાં ચા પીવે છે 'નીતા અંબાણી', જાણો તે કપ ક્યાં અને શેમાંથી બને છે?

ગામડાઓને વીજળી પૂરી પાડવાની વાત છે, 1950 સુધી, 3061 ગામોમાં વીજળીકરણ કરવામાં આવ્યું હતું. 2013-14 સુધીમાં આ સંખ્યા વધીને 5.60 લાખ ગામો થઈ ગઈ. મોદી સરકારનો દાવો છે કે દેશના 100% ગામડાઓમાં વીજળી પહોંચી ગઈ છે. જો કે, વાસ્તવિકતા એ છે કે દેશના ઘણા દુર્ગમ અને અંતરિયાળ ગામો હજુ પણ વીજળીની સુવિધાથી વંચિત છે. અગાઉની સરકારોએ પણ દરેક ગામમાં વીજળી પહોંચાડવાના આંકડામાં રમત રમી હતી અને વર્તમાન સરકારના આંકડા પણ સાચા નથી.

છેલ્લા 8 વર્ષમાં પ્રાથમિક શાળાઓ બમણી થઈ છે

પ્રાથમિક શાળાઓની વાત કરીએ તો, 1950-51 દરમિયાન દેશમાં લગભગ 2.10 લાખ પ્રાથમિક શાળાઓ હતી, જે 2014 સુધીમાં 8.47 લાખ સુધી પહોંચી ગઈ. આજે આ સંખ્યા લગભગ 15 લાખને સ્પર્શી ગઈ છે. જો કે તેમાં સરકારી, સરકારી ભંડોળ અને ખાનગી શાળાઓનો પણ સમાવેશ થાય છે. છેલ્લા 8 વર્ષમાં પ્રાથમિક શાળાઓમાં 6 લાખથી વધુનો વધારો એ સરકારની મોટી સિદ્ધિ ગણવી જોઈએ. એ જ રીતે, જો આપણે સાક્ષરતા દર વિશે વાત કરીએ, તો 1950-51માં ભારતનો સાક્ષરતા દર 18.33 ટકા હતો. 2014માં આ દર વધીને 69 ટકા થયો હતો. 2022ની વાત કરીએ તો આ આંકડો 75 ટકાની નજીક છે. છેલ્લાં 8 વર્ષમાં સાક્ષરતા દરમાં 6 ટકાનો વધારો ઓછો આંકી શકાય તેમ નથી.

રિન્યુએબલ એનર્જીની વાત કરીએ તો, છેલ્લા પાંચ વર્ષમાં સૌર અને પવન ઊર્જામાં ભારતની ક્ષમતા બમણી થઈ ગઈ છે. હાલમાં તે 100 ગીગાવોટથી વધુ છે, જે 2023 સુધીમાં 175 ગીગાવોટ થવાની સંભાવના છે. પીએમ મોદીની મોટાભાગની જન કલ્યાણકારી અને લોકપ્રિય યોજનાઓ દેશને પસંદ આવી છે. આ યોજનાઓમાં ખુલ્લામાં શૌચથી છૂટકારો મેળવવા માટે શૌચાલયોનું નિર્માણ, ઘરો માટે લોન આપવી, ગરીબોના ઘરોમાં સબસિડી પર રાંધણ ગેસ અને પાઈપથી પાણીનો સમાવેશ થાય છે. પરંતુ સમસ્યા એ છે કે પાણીની અછતને કારણે મોટાભાગના શૌચાલયોનો ઉપયોગ થતો નથી. બીજી તરફ ઈંધણના ભાવમાં વધારાને કારણે સબસિડીનો લાભ ઓછો થયો છે. સિલિન્ડર મોંઘા હોવાના કારણે ઉજ્જવલા સ્કીમ ફ્લોપ સાબિત થઈ રહી છે.

22 AIIMS નેટવર્ક અને બમણા કરતાં વધુ મેડિકલ સીટો

જ્યાં સુધી હેલ્થકેરનો સવાલ છે, છેલ્લા 60 વર્ષની સરખામણીમાં મોદી સરકારના છેલ્લા આઠ વર્ષમાં હેલ્થ ઈન્ફ્રાસ્ટ્રક્ચરનું કદ ખૂબ જ વધ્યું છે. વિશ્વની સૌથી મોટી આરોગ્ય યોજના ‘આયુષ્માન ભારત’ હેઠળ પ્રથમ વખત 20 મિલિયનથી વધુ લોકોને મફત સારવારની સુવિધા મળી છે. આયુષ્માન ભારત ડિજિટલ હેલ્થ મિશન હેઠળ 21.9 કરોડ આયુષ્માન ભારત હેલ્થ એકાઉન્ટ આઈડી બનાવવામાં આવ્યા છે. પ્રાથમિક આરોગ્ય કેન્દ્રો હોય, મેડિકલ કોલેજો હોય કે AIIMS જેવી સુપર સ્પેશિયાલિટી હોસ્પિટલ હોય, તેમનું નેટવર્ક છેલ્લાં 8 વર્ષમાં ઝડપથી વિકસ્યું છે. આપણે ખૂબ ગર્વ સાથે કહી શકીએ કે આજે ભારત 6 AIIMSથી આગળ વધીને 22 AIIMSના મજબૂત નેટવર્કમાં આગળ વધી રહ્યું છે. તેમાંથી 7 એઈમ્સ (નાગપુર, કલ્યાણી, મંગલગીરી, ગોરખપુર, ભટિંડા, બિલાસપુર અને દેવઘર) એ મોદી સરકારના કાર્યકાળ દરમિયાન કામ કરવાનું શરૂ કર્યું છે.

છેલ્લાં 8 વર્ષમાં 170 થી વધુ નવી મેડિકલ કોલેજોની સ્થાપના કરવામાં આવી છે અને 100 થી વધુ નવી મેડિકલ કોલેજો પર કામ ઝડપથી ચાલી રહ્યું છે. મતલબ કે આ સમયગાળામાં મેડિકલ કોલેજોની સંખ્યામાં લગભગ 45 ટકાનો વધારો થયો છે. ડોકટરોની સંખ્યામાં પણ 12 લાખથી વધુનો વધારો થયો છે. પરંતુ ડબ્લ્યુએચઓના માનક અનુસાર, એક લાખની વસ્તી દીઠ બેડ અને ડોકટરોની સંખ્યા હજુ પણ ઓછી છે. જો કે આઝાદી સમયે બેડની સંખ્યાની વાત કરીએ તો તે 90 હજાર પણ ન હતી. આજે આ સંખ્યા 20 લાખને પાર કરી ગઈ છે. હાલમાં, એક લાખની વસ્તી માટે લગભગ 90 ડૉક્ટર્સ અને લગભગ 60 બેડ ઉપલબ્ધ છે.

રેકોર્ડ ખાદ્ય ઉત્પાદન

ખાદ્ય ઉત્પાદન: 2021-22 માટે કૃષિ અને ખેડૂત કલ્યાણ મંત્રાલય દ્વારા જાહેર કરાયેલા મુખ્ય પાકોના ઉત્પાદનના ડેટા વિશે વાત કરીએ તો, દેશમાં 316.06 મિલિયન ટન (316.60 મિલિયન ટન) નું વિક્રમી ખાદ્ય અનાજ ઉત્પાદન થયું છે. કેન્દ્રીય કૃષિ અને ખેડૂત કલ્યાણ મંત્રી નરેન્દ્ર સિંહ તોમરના જણાવ્યા અનુસાર, દેશમાં અનાજનું ઉત્પાદન સતત નવો રેકોર્ડ બનાવી રહ્યું છે. કદાચ એટલે જ કોવિડ સમયગાળાથી મોદી સરકાર દ્વારા પ્રધાનમંત્રી ગરીબ કલ્યાણ અન્ન યોજના હેઠળ દેશના 80 કરોડ લોકોને મફત રાશન આપવાની શરૂઆત આજે પણ ચાલુ છે. જો આઝાદી પછી 1950-51ની વાત કરીએ તો દેશમાં અનાજનું કુલ ઉત્પાદન 51 મિલિયન ટન હતું, જે 2012-13માં વધીને 255 મિલિયન ટન થયું. એટલે કે ખાદ્યાન્ન ઉત્પાદનના મામલામાં છેલ્લા 8 વર્ષમાં લગભગ 56 મિલિયન ટનનો વધારો થયો છે.

નિકાસમાં નવો રેકોર્ડ

વિશ્વ વેપારની વાત કરીએ તો, કોવિડ મહામારીને કારણે મંદી હોવા છતાં, ભારતના વિદેશ વેપારમાં નોંધપાત્ર પ્રગતિ થઈ છે. નાણાકીય વર્ષ 2021-22માં ભારતની માલસામાનની નિકાસ $418 બિલિયનના રેકોર્ડ સ્તરે પહોંચી ગઈ છે. પેટ્રોલિયમ પ્રોડક્ટ્સ, એન્જિનિયરિંગ ગુડ્સ, જેમ્સ એન્ડ જ્વેલરી અને કેમિકલ્સ સેક્ટરની સારી કામગીરીને કારણે આ બધું શક્ય બન્યું છે. ડેટા અનુસાર, વર્ષ 2021-22 દરમિયાન, ભારતનો કોમોડિટી વેપાર (નિકાસ અને આયાત) એક ટ્રિલિયન ડૉલરને વટાવી ગયો, કારણ કે દેશની આયાત પણ $610 બિલિયનની સર્વકાલીન ઉચ્ચતમ સપાટીએ પહોંચી ગઈ છે. તેથી વેપાર ખાધ ઘટાડવી મુશ્કેલ બની રહી છે. વર્ષ 1947ની વાત કરીએ તો ભારતે 403 કરોડ રૂપિયાના ઉત્પાદનોની નિકાસ કરી હતી, જે 2013-14માં વધીને 312.60 બિલિયન યુએસ ડોલર થઈ હતી.

લશ્કરી સાધનોમાં આત્મનિર્ભરતા તરફ

ભારતનું સંરક્ષણ બજેટ 49 અબજ 600 મિલિયન ડોલર એટલે કે લગભગ 3.7 લાખ કરોડ રૂપિયા છે. આ સંદર્ભમાં, ભારત વિશ્વના 140 દેશોમાં છઠ્ઠા ક્રમે છે. અમેરિકા $770 બિલિયનના સંરક્ષણ બજેટ સાથે મોખરે છે. તે પછી ચીન બીજા સ્થાને, રશિયા ત્રીજા, બ્રિટન ચોથા અને જર્મની પાંચમા સ્થાને છે. વર્ષ 2014 થી 2022 સુધીમાં ભારતે સંરક્ષણ ક્ષેત્રને મજબૂત કરવા માટે ઘણા મહત્વપૂર્ણ ફેરફારો પણ કર્યા છે. આત્મનિર્ભર ભારત અને મેક ફોર વર્લ્ડ અભિયાન હેઠળ દરેક ભારતીય માટે ગર્વની વાત છે કે હવે ભારતમાં બનેલા સંરક્ષણ સાધનો વિદેશમાં ખરીદવામાં આવી રહ્યા છે. સંરક્ષણ ક્ષેત્રમાં કરાયેલા સુધારાનું પરિણામ છે કે આજે ભારતીય સંરક્ષણ ઉત્પાદનોની કુલ નિકાસ કિંમત 2014-15માં રૂ. 1,941 કરોડથી વધીને 2020-21માં રૂ. 10,000 કરોડ થઈ ગઈ છે. સંરક્ષણ ક્ષેત્રમાં FDI મર્યાદા 49% થી વધારીને 74% કરવામાં આવી છે. તેથી 2014માં 1330 કરોડના વિદેશી રોકાણનો આંકડો વધીને 3000 કરોડની નજીક પહોંચી ગયો છે.