Delhi: કુતુબ મિનારના વિવાદ વચ્ચે મૂર્તિઓની આઈકોનોગ્રાફી થશે, ASIની ટીમે લીધી મુલાકાત

કુતુબ મિનારને (Qutub Minar) લઈને ચાલી રહેલા વિવાદ વચ્ચે ઐતિહાસિક સંકુલમાં ખોદકામ કરવામાં આવશે. સાંસ્કૃતિક મંત્રાલયે સૂચના આપી છે કે કુતુબ મિનારમાં મૂર્તિઓની આઈકોનોગ્રાફી (Iconography) કરાવવી જોઈએ. રિપોર્ટના આધારે કુતુબ મિનાર સંકુલમાં ખોદકામની કામગીરી કરવામાં આવશે. આ પછી, ASI તેનો રિપોર્ટ સાંસ્કૃતિક મંત્રાલયને સોંપશે. સાંસ્કૃતિક સચિવે અધિકારીઓ સાથે નિરીક્ષણ કર્યા બાદ આ નિર્ણય લીધો છે. તેથી, કુતુબ મિનારની દક્ષિણમાં અને મસ્જિદથી 15 મીટરના અંતરે ખોદકામની કામગીરી શરૂ કરી શકાય છે.

કુતુબ મિનારની સાથે અનંગતાલ અને લાલકોટ કિલ્લા પર પણ ખોદકામ કરવામાં આવશે. કુતુબ મિનાર સંકુલમાં ખોદકામ કરવાનો નિર્ણય લેતા પહેલા સંસ્કૃતિ સચિવ ગોવિંદ મોહને 12 લોકોની ટીમ સાથે નિરીક્ષણ કર્યું હતું. આ ટીમમાં 3 ઈતિહાસકારો, 4 ASI અધિકારીઓ અને સંશોધકો હતા. આ મામલે ASI અધિકારીઓનું કહેવું છે કે કુતુબ મિનારમાં 1991થી ખોદકામ કરવામાં આવ્યું નથી.

1991 પછી ખોદકામ થયું નથી

ASI અધિકારીઓનું કહેવું છે કે 1991થી કુતુબ મિનારમાં કોઈ ખોદકામ કરવામાં આવ્યું નથી. આ સિવાય ઘણા સંશોધનો પણ પેન્ડિંગ છે જેના કારણે આ નિર્ણય લેવામાં આવ્યો છે. કુતુબ મિનારનું નામ બદલવાની માગ પણ તાજેતરમાં કરવામાં આવી હતી. આ પછી હિન્દુ સંગઠનોના કેટલાક કાર્યકરોએ હનુમાન ચાલીસાના પાઠ કર્યા હતા. હિન્દુ સંગઠનોએ કુતુબ મિનારનું નામ બદલીને વિષ્ણુ સ્તંભ રાખવાની માગ કરી હતી.

વિષ્ણુ સ્તંભની માગ

હિન્દુ સંગઠનના કાર્યકર્તાએ કહ્યું હતું કે મુઘલોએ તેને અમારી પાસેથી છીનવી લીધો હતો. આ અંગે અમે અમારી માંગણીઓ મૂકી રહ્યા છીએ. અમારી માગ છે કે કુતુબ મિનારનું નામ બદલીને વિષ્ણુ સ્તંભ રાખવામાં આવે. કુતુબ મિનારમાં રાખવામાં આવેલી ભગવાન ગણેશની મૂર્તિઓને લઈને પણ વિવાદ થયો હતો.

કાઉન્સિલરે માગ ઉઠાવી હતી

મહેરૌલીના બીજેપી કોર્પોરેટર આરતી સિંહે માંગણી કરી હતી કે કુતુબ મિનારમાં મૂર્તિઓને યોગ્ય જગ્યાએ રાખવામાં આવે અને ત્યાં પૂજા-આરતી કરવામાં આવે. કુતુબ મિનારમાં મંદિર અને દેવી-દેવતાઓની મૂર્તિઓની અપવિત્રતાનો વિવાદ દાયકાઓ જૂનો છે.