અનંત અંબાણીની મદદથી 7 અઠવાડિયાના હાથીના બચ્ચા ‘રાજા’ને મળશે નવું જીવન, આસામના CM હિમંતા બિસ્વા સરમાએ કરી પ્રશંસા
આસામમાં સાત અઠવાડિયાના હાથીના બચ્ચા 'રાજા'ને ગંભીર ઈજા અને રોગોનો સામનો કરવો પડ્યો હતો. અનંત અંબાણીએ તેની દયનીય સ્થિતિ જોઈને તેને આસામથી જામનગરના વનતારા ખાતે વિશેષ સારવાર માટે એરલિફ્ટ કરાવ્યો.

આસામમાં જન્મના પ્રથમ દિવસથી જ જીવન માટે સંઘર્ષ કરી રહેલા સાત અઠવાડિયાના હાથીના બચ્ચા ‘રાજા’ને હવે નવું જીવન મળવાની આશા જાગી છે. અનંત અંબાણીએ આ નાનકડા હાથીની ગંભીર સ્થિતિને ધ્યાનમાં રાખીને તેને આસામથી ગુજરાતના જામનગર સ્થિત વનતારા ખાતે એરલિફ્ટ કરવાની વ્યવસ્થા કરી છે. અહીં નિષ્ણાત વેટરનરી ડૉક્ટરોની ટીમ દ્વારા તેની વિશેષ સારવાર કરવામાં આવશે. અનંત અંબાણીના આ માનવતાભર્યા પ્રયાસની આસામના મુખ્યમંત્રી હિમંતા બિસ્વા સરમાએ પણ પ્રશંસા કરી છે.
આસામના મુખ્યમંત્રીએ અનંત અંબાણી અને વનતારા ટીમની કરી પ્રશંસા
રાજાને જામનગર પહોંચાડવા માટે આસામના મુખ્યમંત્રી હિમંતા બિસ્વા સરમાએ પણ વ્યક્તિગત રસ દાખવ્યો હતો. રાજાના માલિક ભોલાનાથ પેગુની વિનંતી બાદ મુખ્યમંત્રીએ વનતારાનો સંપર્ક કર્યો હતો અને ત્યારબાદ રાજાને વિશેષ સારવાર માટે જામનગર ખસેડવાની વ્યવસ્થા કરવામાં આવી હતી.
મુખ્યમંત્રી હિમંતા બિસ્વા સરમાએ સોશિયલ મીડિયા પ્લેટફોર્મ X પર પોસ્ટ કરીને અનંત અંબાણી અને વનતારાની ટીમની કામગીરીને બિરદાવી હતી. તેમણે જણાવ્યું હતું કે માલિકની વિનંતી બાદ તેમણે વનતારાનો સંપર્ક કર્યો હતો. વનતારાની ટીમે તાત્કાલિક પગલાં લઈને રાજાને જામનગરના રિહેબિલિટેશન સેન્ટરમાં એરલિફ્ટ કર્યો છે અને તે સારવારને સારો પ્રતિસાદ આપી રહ્યો છે. સાથે જ તેમણે અનંત અંબાણી અને વનતારા ટીમના આ ઉદાર પ્રયાસને બિરદાવતાં રાજાના ઝડપથી સાજા થવાની પ્રાર્થના પણ કરી હતી.
Born on 2nd October, Raja was rejected by his mother and missed out on colostrum, the first milk that builds immunity. That left him extremely vulnerable.
At the request of his owner, Shri Bholanath Pegu, I reached out to Vantara. They stepped in and airlifted Raja to their rehabilitation centre in Jamnagar this morning for specialised care, and he is responding well.
Well done, Shri Anant Ambani and Team Vantara, for this generous gesture.
We pray for Raja’s swift recovery.
— Himanta Biswa Sarma (@himantabiswa) November 20, 2026
વનતારાના પ્રવક્તાએ પણ આસામના મુખ્યમંત્રીનો આભાર વ્યક્ત કર્યો હતો. તેમણે જણાવ્યું કે રાજા આસામનો છે અને તેની સારવાર તથા સ્વસ્થ થવું સૌની સહિયારી જવાબદારી છે. છેલ્લા સાત અઠવાડિયાથી રાજાની સંભાળ રાખી રહેલા માલિક અને સ્થાનિક સંભાળકર્તાઓની મહેનતને પણ વનતારાએ બિરદાવી હતી.
જન્મના પ્રથમ દિવસથી જ શરૂ થયો હતો રાજાનો સંઘર્ષ
રાજાનો જન્મ 2 ઓક્ટોબર, 2026ના રોજ આસામના ગોગામુખમાં થયો હતો. તેની માતા પોતે માત્ર 11 વર્ષની હોવાથી નવજાત બચ્ચાની સંભાળ રાખવાનો અનુભવ ધરાવતી નહોતી. પ્રસૂતિ બાદ ગભરાટ અને અસ્વસ્થતાને કારણે માતાએ બચ્ચાને લાત મારી દીધી હતી, જેના કારણે રાજાના પાછળના જમણા પગની જાંઘના હાડકામાં ગંભીર ફ્રેક્ચર થયું હતું. આ ઈજાને કારણે તે ઊભો પણ રહી શકતો નહોતો.
એટલું જ નહીં, રાજાને તેની માતાનું પ્રથમ દૂધ એટલે કે કોલોસ્ટ્રમ પણ મળી શક્યું નહોતું. આ દૂધ નવજાત હાથીના બચ્ચાની રોગપ્રતિકારક શક્તિ માટે ખૂબ જ મહત્વપૂર્ણ હોય છે. નાનકડા રાજા માટે શરૂઆતના દિવસો ખૂબ જ મુશ્કેલ રહ્યા હતા.
સાત અઠવાડિયા સુધી ઘરે જ કરવામાં આવી સારવાર
રાજાની ગંભીર સ્થિતિને ધ્યાનમાં રાખીને તેના માલિકે વનતારાની મદદ માગી હતી. 8 ઓક્ટોબરના રોજ વનતારાની રેપિડ રિસ્પોન્સ ટીમ આસામ પહોંચી હતી. એક્સ-રેમાં તેના પગના હાડકામાં ગંભીર ફ્રેક્ચર હોવાનું સામે આવ્યું હતું. ત્યારબાદ ટીમે પ્લાસ્ટર કાસ્ટ અને પટ્ટીઓની મદદથી પગને સ્થિર કર્યો હતો. તેને ઊભા રહેવામાં મદદ મળે અને ઈજાગ્રસ્ત પગ પર ઓછો ભાર પડે તે માટે ખાસ સ્લિંગનો પણ ઉપયોગ કરવામાં આવ્યો હતો.
રાજાને માતાના દૂધના વિકલ્પ તરીકે ખાસ તૈયાર કરેલું દૂધ આપવામાં આવતું હતું. 10 ઓક્ટોબરથી તેને આસામના પોહુમારા ખાતે તેના માલિકના ઘરે રાખીને સતત સારવાર અને દેખરેખ આપવામાં આવી રહી હતી. તેના શરીરની હલનચલન સુધરે અને ઈજાગ્રસ્ત પગ પર ભાર ન પડે તે માટે નજીકમાં હાઇડ્રોથેરાપી પોન્ડ પણ તૈયાર કરવામાં આવ્યો હતો.
તબિયત વધુ બગડતાં હોસ્પિટલમાં દાખલ કરવાનો નિર્ણય
જોકે, માતાના દૂધથી વંચિત રહેવા અને લાંબા સમય સુધી એક જ સ્થિતિમાં રહેવાને કારણે રાજાની તબિયતમાં અનેક મુશ્કેલીઓ ઊભી થઈ હતી. તેને ઝાડા થવાની સમસ્યા થઈ હતી અને તપાસમાં Klebsiella pneumoniae નામના બેક્ટેરિયલ ઇન્ફેક્શનની પણ પુષ્ટિ થઈ હતી. આ ઉપરાંત વારંવાર બ્લડ સુગર ઘટવાની સમસ્યા, લિવરના રિપોર્ટમાં ફેરફાર, માથા પર દબાણને કારણે ઘા અને નાભિ પાસે હર્નિયાની સમસ્યા પણ સામે આવી હતી.
વનતારાની ટીમ દ્વારા એન્ટિબાયોટિક્સ, IV ફ્લુઇડ્સ, વિટામિન્સ, પોષક તત્ત્વો, પ્રોબાયોટિક્સ અને ઘાની સારવાર સહિતની તમામ જરૂરી સારવાર આપવામાં આવી હતી. જોકે, રાજાની સ્થિતિ હજુ પણ ગંભીર હોવાથી તેને હવે અદ્યતન સુવિધાઓ ધરાવતી હોસ્પિટલમાં દાખલ કરવો જરૂરી બન્યો હતો.
ખાસ વિમાનમાં આસામથી જામનગર પહોંચાડાયો રાજા
રાજાને 20 નવેમ્બર, 2026ના રોજ ગુવાહાટીથી જામનગર સુધી ખાસ વિમાન મારફતે લાવવામાં આવ્યો છે. આશરે ચાર કલાકની આ મુસાફરી માટે તેના શરીરના કદ અને ઈજાને ધ્યાનમાં રાખીને ખાસ ક્રેટ તૈયાર કરવામાં આવ્યું હતું. તેમાં નરમ ગાદી અને સુરક્ષિત વ્યવસ્થા કરવામાં આવી હતી, જેથી મુસાફરી દરમિયાન તેના ઈજાગ્રસ્ત પગને કોઈ નુકસાન ન થાય.
મુસાફરી દરમિયાન વનતારાના વેટરનરી ડૉક્ટરો અને સંભાળકર્તાઓની ટીમ સતત તેની સાથે રહી હતી. તેના હૃદયના ધબકારા, શ્વાસ, શરીરનું તાપમાન, પાણીનું પ્રમાણ અને બ્લડ સુગર પર સતત નજર રાખવામાં આવી હતી. રસ્તા મારફતે 2,500 કિલોમીટરથી વધુની મુસાફરી કરવાને બદલે વિમાન દ્વારા તેને થોડા કલાકોમાં જામનગર પહોંચાડવામાં આવ્યો છે.
વનતારામાં હવે નિષ્ણાત ડૉક્ટરોની દેખરેખમાં થશે સારવાર
જામનગર પહોંચ્યા બાદ રાજાને વનતારાની વિશેષ હાથી હોસ્પિટલમાં દાખલ કરવામાં આવશે. અહીં તેની સંપૂર્ણ તબીબી તપાસ, દુખાવાનું નિયંત્રણ, દવાઓ, હાડકાની સારવાર, પોષણ અને પુનર્વસન પ્રક્રિયા હાથ ધરવામાં આવશે. તેની ઈજાની ગંભીરતાને જોતા ભવિષ્યમાં પણ લાંબા સમય સુધી તબીબી દેખરેખ અને સારવારની જરૂર પડી શકે છે.
અનંત અંબાણી દ્વારા કરવામાં આવેલી આ ત્રીજી પ્રકારની એરલિફ્ટ છે, જેમાં ગંભીર સ્થિતિમાં રહેલા પ્રાણી માટે હવાઈ પરિવહનની વ્યવસ્થા કરવામાં આવી છે. વનતારાની ટીમે રાજાને ફરી પોતાના પગ પર ઊભો કરવા અને સ્વસ્થ જીવન આપવાના તમામ પ્રયાસો કરવાની પ્રતિબદ્ધતા વ્યક્ત કરી છે. હવે સૌની નજર નાનકડા રાજાની ઝડપથી સાજા થવાની રાહ પર છે.
ભારતના ઐતિહાસિક કિલ્લેથી વિશ્વને શાંતિ અને સહયોગનો સંદેશ, PM મોદીની મોટી વાત
