Wrestlers Protest: ‘કુસ્તીબાજોના આંદોલન પર સચિન તેંડુલકર ચૂપ કેમ છે?’ મુંબઈ યુથ કોંગ્રેસે લગાવ્યા ઠેર ઠેર પોસ્ટરો
Sachin Tendulkar's Silence Over Wrestler's Protest: મુંબઈ પ્રદેશ યુથ કોંગ્રેસે સચિન તેંડુલકરને મહિલા કુસ્તીબાજોના વિરોધ પર મૌન રાખવા બદલ આકરી ટીકા કરી છે. પોસ્ટર અને બેનર લગાવીને મહાન બેટ્સમેનને પૂછવામાં આવ્યું છે કે, ક્રિકેટના ભગવાનની અંદરનો માણસ ક્યાં ગયો?
Mumbai Youth Congress: સચિન તેંડુલકર મહિલા રેસલર્સના વિરોધ પર કેમ ચૂપ છે? મુંબઈ પ્રદેશ યુથ કોંગ્રેસે પોસ્ટર લગાવીને આ સવાલ પૂછ્યો છે. આ પોસ્ટર વાયરલ થઈ રહ્યું છે. રાજધાની દિલ્હીમાં દેશની મેડલ વિજેતા મહિલા કુસ્તીબાજો યૌન શોષણનો વિરોધ કરી રહી છે. તે બ્રિજભૂષણ શરણ સિંહ પર ગંભીર આરોપ લગાવીને તેની ધરપકડની માંગ કરી રહી છે. આવી સ્થિતિમાં, કોંગ્રેસે સચિન તેંડુલકરને દિલ્હી પોલીસ અથવા કેન્દ્ર સરકારની ભૂમિકાને લઈને સીધો સવાલ કર્યો છે અને પૂછ્યું છે કે તેણે અત્યાર સુધી આ અંગે કેમ કોઈ અભિપ્રાય નથી આપ્યો?
થોડા દિવસો પહેલા, કુસ્તીબાજ વિનેશ ફોગાટે પણ ભારતના રમત જગતના દિગ્ગજો તરફથી સમર્થન ન મળવા બદલ અફસોસ વ્યક્ત કર્યો હતો. દેશની અનેક વિપક્ષી પાર્ટીઓ મહિલા કુસ્તીબાજોના પક્ષમાં આગળ આવી છે. ઈન્ટરનેશનલ લેવલ પર પણ આ મહિલા રેસલર્સને ઘણો સપોર્ટ મળી રહ્યો છે, પરંતુ દેશના સ્પોર્ટ્સ દિગ્ગજોએ આ મુદ્દે કંઈ પણ કહેવાનું ટાળ્યું છે. એટલા માટે મુંબઈ પ્રદેશ યુથ કોંગ્રેસે સચિન તેંડુલકરને નિશાન બનાવતા બેનરો લગાવ્યા છે, જે સોશિયલ મીડિયા પર વાયરલ થઈ રહ્યા છે.
શું તમે પણ સીબીઆઈ-આઈટીના દરોડાના ડરથી બેસી ગયા છો ? કોંગ્રેસે સચિન તેંડુલકરને પૂછ્યું
આ પોસ્ટરો અને બેનરો દ્વારા સચિન તેંડુલકર વિશે કહેવામાં આવ્યું છે કે, ‘ભારત રત્ન સચિન તેંડુલકર, જેનો કોઈ અભિપ્રાય નથી, તમે ભારતના આંતરિક મુદ્દાઓ પર મોઢું બંધ રાખીને કેમ બેઠા છો? તમે ખેડૂત આંદોલન પર બોલનાર વિદેશી મહિલા ખેલાડીને જવાબ આપ્યો હતો કે દેશની આંતરિક બાબતો પર ના બોલો. પણ આજે સચિન, તમારી દેશભક્તિ ક્યાં ગઈ? શું તમે સીબીઆઈ-ઈન્કમ ટેક્સ વિભાગના દરોડાના ડરથી દબાણમાં આવી ગયા છો?
Mumbai Youth Congress puts up a poster to question Sachin Tendulkar’s silence on Women wrestler’s issue.. pic.twitter.com/rOqROEpVoZ
— Spirit of Congress✋ (@SpiritOfCongres) May 31, 2023
‘ક્રિકેટના ભગવાનની અંદરનો માણસ ક્યાં ગયો?’
સચિન તરફ ઈશારો કરીને પોસ્ટરમાં એવું પણ લખવામાં આવ્યું છે કે તમને ક્રિકેટના ભગવાન માનવામાં આવે છે. ભારત રત્ન પણ છો. રમત જગતની કેટલીક મહિલાઓ જાતીય સતામણી સામે અવાજ ઉઠાવી રહી છે. આવી સ્થિતિમાં હવે તમારી એ માનવતા ક્યાંય કેમ દેખાતી નથી?
સચિનના મૌન પર સંજય રાઉતે આવુ જણાવ્યું
સચિન તેંડુલકરના મૌન પર જ્યારે સંજય રાઉતને સવાલ પૂછવામાં આવ્યો તો તેણે કહ્યું કે વડાપ્રધાને આ અંગે સ્ટેન્ડ લેવું જોઈએ. કેન્દ્ર સરકારે સ્ટેન્ડ લેવું જોઈએ. મહારાષ્ટ્રમાં તો દરેકે પોતપોતાની ભૂમિકા નક્કી કરી છે. દરેકનો અભિપ્રાય છે કે મહિલા રેસલરોને ન્યાય મળવો જોઈએ. કેન્દ્ર સરકાર તેમને ન્યાય આપવાનો ઈન્કાર કરી રહી છે. આ રીતે સંજય રાઉતે સચિન તેંડુલકર પર કંઈપણ કહેવાનું ટાળ્યું હતું.
