નહીં CCTV, બંધ સ્ટ્રીટ લાઈટો, ફટાકડાનો અવાજ…બાબા સિદ્દીકી હત્યા કેસમાં હુમલાખોરોનો ફૂલપ્રૂફ પ્લાન હતો?
બાબા સિદ્દીકીને ગોળી મારનારા હુમલાખોરોએ મોઢા પર રૂમાલ બાંધેલા હતા. સિદ્દીકીને 15 દિવસ પહેલા જાનથી મારી નાખવાની ધમકી પણ મળી હતી. તેમને Y લેવલની સુરક્ષા મળી હતી. બાબા સિદ્દીકી સાથે એક પોલીસ કોન્સ્ટેબલ તૈનાત હતો. જો કે ફાયરિંગ વખતે આ પોલીસકર્મી ક્યાં હતો તે અંગેની માહિતી હજુ સામે આવી નથી.
અજિત પવાર જૂથના દિગ્ગજ નેતા બાબા સિદ્દીકીની શનિવારે મહારાષ્ટ્રના મુંબઈમાં ગોળી મારીને હત્યા કરવામાં આવી હતી. જે જગ્યાએ આ ઘટના બની ત્યાં સીસીટીવી કેમેરા લગાવવામાં આવ્યા ન હતા. રોડ પરની સ્ટ્રીટ લાઇટો બંધ કરી દેવામાં આવી હતી. ગુનેગારોએ મોઢા પર રૂમાલ બાંધ્યો હતો. મતલબ કે સમગ્ર આયોજન સાથે આ ઘટનાને અંજામ આપવામાં આવ્યો હતો.
બાબા સિદ્દીકીને નિશાન બનાવીને છ રાઉન્ડ ફાયરિંગ કરવામાં આવ્યું હતું. ત્રણ ગોળી તેની છાતીમાં વાગી હતી. ગોળી વાગ્યા બાદ બાબા સિદ્દીકીને તાત્કાલિક લીલાવતી હોસ્પિટલમાં દાખલ કરવામાં આવ્યા હતા. અહીં તેમનું અવસાન થયું. ગુનેગારોએ 12 ઓક્ટોબરે રાત્રે 9.15 કલાકે આ ગુનો કર્યો હતો.
બાબા સિદ્દીકીની કાર બુલેટપ્રુફ હતી
બાંદ્રાના ખેરવાડી જંક્શન વિસ્તારમાં બાબા સિદ્દીકી પર હુમલો થયો હતો. ત્રણ લોકોએ મળીને આ ગુનો કર્યો હતો. બે બંદૂકોમાંથી કુલ છ રાઉન્ડ ફાયરિંગ કરવામાં આવ્યું હતું. જેમાંથી બે ગોળી બાબા સિદ્દીકીની કારને પણ વાગી હતી. બાબા સિદ્દીકીની કાર બુલેટપ્રુફ હતી. જો કે તો પણ ગોળી કાચમાં ઘૂસી ગઈ હતી. જેથી હુમલાખોરો પાસે અત્યાધુનિક પિસ્તોલ હોઈ શકે તેવું અનુમાન લગાવવામાં આવી રહ્યું છે.
હુમલાખોરોએ મોઢા પર રૂમાલ બાંધ્યો હતો
બાબા સિદ્દીકીની હત્યા કેસમાં પણ એક મહત્વની માહિતી સામે આવી છે. બાબા સિદ્દીકીને ગોળી મારનારા હુમલાખોરોએ મોઢા પર રૂમાલ બાંધેલા હતા. રસપ્રદ વાત એ છે કે, 15 દિવસ પહેલા તેને જાનથી મારી નાખવાની ધમકી આપવામાં આવી હતી. બાબા સિદ્દીકીને પોલીસ દ્વારા Y સ્તરની સુરક્ષા આપવામાં આવી હતી. બાબા સિદ્દીકી સાથે એક પોલીસ કોન્સ્ટેબલ તૈનાત હતો. જોકે, ફાયરિંગ વખતે આ પોલીસકર્મી ક્યાં હતો અને ખરેખર શું થયું તે અંગેની માહિતી હજુ સુધી સામે આવી નથી.
બિશ્નોઈ ગેંગ સામેલ ?
કારણ કે તે વિજયાદશમીનો દિવસ હતો. આથી વિજયાદશમીને લઈને વિસ્તારમાંથી શોભાયાત્રા કાઢવામાં આવી રહી હતી. શોભાયાત્રા દરમિયાન ફટાકડા પણ ફોડવામાં આવ્યા હતા. જેનો લાભ હુમલાખોરોએ ઉઠાવ્યો હતો. જે ક્ષણે બાબા સિદ્દીકી પર ગોળી ચલાવવામાં આવી તે જ ક્ષણે ફટાકડાના અવાજથી તે અવાજ પણ ડૂબી ગયો. શરૂઆતમાં આસપાસના લોકોને ખબર પણ ન પડી કે ગોળી ચલાવવામાં આવી છે.
બાબા સિદ્દીકીની હત્યા અંગે શંકા છે કે હુમલાખોરોએ અગાઉથી તેની યોજના બનાવી હતી. સંભવતઃ હુમલાખોરોને ખબર હતી કે બાબા સિદ્દીકી કયા સમયે ઘરેથી બહાર જાય છે અને ક્યાં જાય છે. વળી શું બિશ્નોઈ ગેંગ પણ આ કેસમાં સંડોવાયેલી છે? પોલીસ આ દિશામાં પણ તપાસ કરી રહી છે.
