Maharashtra: મુંબઈમાં થશે કેબિનેટ વિસ્તાર પર વાત, દિલ્હી વડાપ્રધાન મોદી સહિત વરિષ્ઠ નેતાઓ પાસે આર્શીવાદ લેવા આવ્યા: CM એકનાથ શિંદે

મહારાષ્ટ્રના મુખ્યપ્રધાન એકનાથ શિંદે (CM Eknath Shinde) અને નાયબ મુખ્યપ્રધાન દેવેન્દ્ર ફડણવીસ (Dy CM Devendra Fadnavis) દિલ્હીના પ્રવાસે છે. આ પ્રવાસના બીજા અને છેલ્લા દિવસે સીએમ શિંદે અને ડેપ્યુટી સીએમ ફડણવીસે પત્રકાર પરિષદ કરી હતી. આ પ્રેસ કોન્ફરન્સમાં સીએમ શિંદેએ કહ્યું કે નવી સરકારની રચના બાદ તેઓ કેન્દ્ર સરકારના વરિષ્ઠ નેતાઓને મળવા દિલ્હી આવ્યા છે. તેમણે કહ્યું કે તેઓ રાષ્ટ્રપતિ રામનાથ કોવિંદ સહિત કેન્દ્રીય ગૃહપ્રધાન અમિત શાહ, ભાજપ અધ્યક્ષ જેપી નડ્ડા અને સંરક્ષણ પ્રધાન રાજનાથ સિંહને મળ્યા છે. થોડીવારમાં પીએમ નરેન્દ્ર મોદી (PM Narendra Modi) સાથે મુલાકાત થવાની છે. એકનાથ શિંદેએ કહ્યું, ‘લોકોના હૃદયમાં જે કલ્પના હતી તે પ્રમાણે સરકારની રચના કરવામાં આવી છે. મહારાષ્ટ્રના વિકાસ માટે કેન્દ્ર સરકારે તેના સંપૂર્ણ સહયોગની ખાતરી આપી છે.

સીએમ શિંદેએ કહ્યું ‘સમૃદ્ધિ, જલયુક્ત શિવાર અને મેટ્રો વિકાસના કામને ઝડપી ગતિએ આગળ ધપાવશે. અષાઢી એકાદશી પછી મુંબઈમાં કેબિનેટ વિસ્તરણની ચર્ચા થશે. અમે OBC અનામતના મુદ્દે સોલિસિટર જનરલ તુષાર મહેતાને મળ્યા હતા. રાજ્યના સર્વાંગી વિકાસ માટે સરકાર સંપૂર્ણ રીતે તૈયાર છે. મહારાષ્ટ્રમાં આજે જે સરકાર બની છે, જે પ્રકારની સરકાર અઢી વર્ષ પહેલા બની હોવી જોઈતી હતી, તે સરકાર હવે બની છે.

આ પણ વાંચો

The Chief Minister of Maharashtra Shri @mieknathshinde and the Deputy Chief Minister Shri @Dev_Fadnavis called on PM @narendramodi. @CMOMaharashtra pic.twitter.com/i2ljZTeuFB

— PMO India (@PMOIndia) July 9, 2022

‘દિલ્હીમાં કેબિનેટ વિસ્તરણની નથી થઈ ચર્ચા’

સીએમ એકનાથ શિંદેએ તેમની પ્રેસ કોન્ફરન્સમાં ઈનકાર કર્યો હતો કે તેઓ દિલ્હીમાં કેબિનેટ વિસ્તરણ અંગે ચર્ચા કરવા માટે પીએમ મોદી, ગૃહ પ્રધાન અમિત શાહ, ભાજપ અધ્યક્ષ જેપી નડ્ડા, સંરક્ષણ પ્રધાન રાજનાથ સિંહ જેવા વરિષ્ઠ નેતાઓને મળવા આવ્યા હતા. તેમણે કહ્યું કે સરકારની સ્થાપના પછી આ એક સારી ભેટ છે. મને કેન્દ્ર સરકારના વરિષ્ઠ નેતાઓ તરફથી ખાતરી મળી છે કે રાજ્યની પ્રગતિમાં તેમનો સંપૂર્ણ સહકાર મળશે. જે રાજ્યને કેન્દ્રનું સમર્થન મળે છે, તે રાજ્ય ઝડપથી આગળ વધે છે.

‘મુંબઈ તોડવાની યોજના, જનતાને ગેરમાર્ગે દોરવાનો પ્રયાસ’

સીએમ એકનાથ શિંદેએ કહ્યું કે સંજય રાઉત જેવા નેતાઓ દ્વારા આપવામાં આવેલા નિવેદન કે ભાજપ અને શિંદે જૂથની સરકાર મુંબઈને મહારાષ્ટ્રથી અલગ કરવાનું કાવતરું કરી રહી છે તે બકવાસ છે, જનતાને ગેરમાર્ગે દોરવાનો પ્રયાસ છે. સીએમ શિંદેએ સંજય રાઉતના નિવેદનની પણ મજાક ઉડાવી હતી કે શિંદે જૂથના ધારાસભ્યોને બળવો કરવા બદલ 50-50 લાખ રૂપિયાના ખોખા મળ્યા હતા. તેમણે કહ્યું કે આ ખોખા કઈ વસ્તુના મળ્યા, શું મીઠાઈના ખોખા મળ્યા?

‘ઓબીસી અનામત વગર ચૂંટણી નહીં, આ અમારી ભૂમિકા છે’

મહારાષ્ટ્રના મુખ્યમંત્રીએ કહ્યું કે રાજ્યમાં જે નવી સરકાર બની છે, તેમાં ડેપ્યુટી સીએમ દેવેન્દ્ર ફડણવીસનું યોગદાન અમૂલ્ય છે. ઓબીસી અનામત વિના પંચાયતની ચૂંટણીઓ ન થવી જોઈએ. અમે ચૂંટણી પંચ સાથે ચર્ચા કરીશું કે શું વરસાદ પછી નગરપાલિકાઓની ચૂંટણી યોજવી જોઈએ. 16 ધારાસભ્યોને સસ્પેન્શન નોટિસ પર 11 જુલાઈએ સુપ્રીમ કોર્ટમાં થનારી સુનાવણીના સંદર્ભમાં સીએમ શિંદેએ કહ્યું કે તેમને ન્યાય પ્રણાલીમાં વિશ્વાસ છે. તેમના ધારાસભ્યોએ કંઈ ખોટું કે ગેરબંધારણીય કર્યું નથી.

‘અમે જ અસલી શિવસેના છીએ, જલ્દી સાબિત થશે’: સીએમ એકનાથ શિંદે

સીએમ એકનાથ શિંદેએ કહ્યું કે અમે જ અસલી શિવસેના છીએ. તે ટૂંક સમયમાં સાબિત થશે. બાળાસાહેબ ઠાકરેએ કહ્યું હતું કે જ્યારે કોંગ્રેસ અને એનસીપી સાથે જવાની વાત આવશે તો શિવસેના રોકશે. અમે શું કર્યું, ક્યાં ખોટું કર્યું? અમે માત્ર બાળાસાહેબ ઠાકરેના વિચારોને આગળ લઈ જઈ રહ્યા છીએ. અમે મહારાષ્ટ્રના તમામ ઘટકોના વિકાસ માટે સાથે મળીને કામ કરીશું. આગામી ચૂંટણીમાં અમારા 200 ધારાસભ્યો ચૂંટાશે.

દિલ્હી પ્રવાસનો કોઈ રાજકીય એજન્ડા નથીઃ દેવેન્દ્ર ફડણવીસ

સીએમ શિંદે ઉપરાંત ડેપ્યુટી સીએમ ફડણવીસે કહ્યું કે જ્યારે મુખ્યમંત્રી શિંદે અષાઢી પૂજા કરીને પંઢરપુરથી પરત ફરશે, ત્યારે અમે મુંબઈમાં કેબિનેટ વિસ્તરણ અંગે ચર્ચા કરીશું. સીએમ શિંદેની દિલ્હી મુલાકાતનો કોઈ રાજકીય એજન્ડા નથી, પરંતુ સરકારની સ્થાપના બાદ તેઓ અહીં ભાજપના કેન્દ્રીય નેતૃત્વને મળવા આવ્યા છે. 2019ની ચૂંટણી બાદ જનતા છેતરાયાની લાગણી અનુભવી રહી છે. તેમને લાગ્યું કે અમારો મત ભાજપ અને શિવસેનાના ગઠબંધન માટે છે, પરંતુ સરકાર કોઈ બીજાએ બનાવી છે. હવે લોકોના મનની સરકાર બની છે. ભાજપ સીએમ શિંદેની સરકારને સારી રીતે ચલાવવા માટે શક્ય તમામ પ્રયાસ કરશે.