Trending Video : QUAD ફોટો સેશનમાં PM મોદીએ જીત્યું સૌનું દિલ, જમીન પર પડેલો તિરંગો ઉઠાવી મૂક્યો ખિસ્સામાં
વડાપ્રધાન નરેન્દ્ર મોદીનો એક વીડિયો સોશિયલ મીડિયા પર વાયરલ થઈ રહ્યો છે. જે દરેક ભારતીયનું દિલ જીતી રહ્યો છે. QUAD સમિટ દરમિયાન ફોટો સેશન વખતે PM મોદીએ જમીન પર પડેલો તિરંગો ઉઠાવીને પોતાના ખિસ્સામાં મૂકી લીધો હતો.

વડાપ્રધાન નરેન્દ્ર મોદીનો રાષ્ટ્રધ્વજ તિરંગા પ્રત્યેનો આદર ફરી એકવાર જોવા મળ્યો છે. ફિલિપાઈન્સની રાજધાની મનીલામાં યોજાયેલી QUAD બેઠક દરમિયાન ફોટો સેશન માટે ઊભા રહેવાની જગ્યા દર્શાવવા માટે જમીન પર મૂકવામાં આવેલા ભારતીય તિરંગાને PM મોદીએ ઉઠાવીને પોતાના ખિસ્સામાં રાખ્યો હતો. આ ઘટનાનો વીડિયો સોશિયલ મીડિયા પર ખૂબ વાયરલ થઈ રહ્યો છે. લોકો તિરંગા પ્રત્યે PM મોદીએ દર્શાવેલા સન્માનની પ્રશંસા કરી રહ્યા છે.
PM મોદીએ તિરંગા પ્રત્યે સન્માન દર્શાવ્યું
વીડિયોમાં જોવા મળે છે કે PM મોદી કાર્પેટ પર પડેલા નાના તિરંગાના કાર્ડને નીચે નમીને ઉઠાવે છે અને પોતાના ખિસ્સામાં મૂકી દે છે. દરેક ભારતીયનું દિલ જીતી લેતી આ ઘટના ત્યારે બની હતી, જ્યારે QUAD સમિટ દરમિયાન PM મોદી, અમેરિકાના રાષ્ટ્રપતિ ડોનાલ્ડ ટ્રમ્પ, ઓસ્ટ્રેલિયાના વડાપ્રધાન એન્થની અલ્બાનીઝ અને જાપાનના વડાપ્રધાન સાને તાકાઈચી સાથે ફોટો સેશન માટે પોતાની જગ્યા લઈ રહ્યા હતા.
फिलीपींस की राजधानी मनीला में क्वाड बैठक के दौरान प्रधानमंत्री नरेंद्र मोदी का तिरंगे के प्रति सम्मान देखने को मिला. बैठक स्थल पर जगह चिह्नित करने के लिए रखा गया भारतीय तिरंगा पीएम मोदी ने उठाया और अपनी जेब में सुरक्षित रख लिया. देखें वीडियो…
#PMModi #NarendraModi #IndianFlag #Tiranga #QUADSummit #Manila #Philippines #TV9Reel
— TV9 Bharatvarsh (@TV9Bharatvarsh) November 17, 2026
વીડિયોમાં જોઈ શકાય છે કે PM મોદી સ્ટેજ પર પહોંચતાની સાથે જ તેમની નજર જમીન પર પડેલા તિરંગાવાળા કાર્ડ પર પડે છે. ત્યારબાદ તેઓ નીચે નમીને તેને ઉઠાવે છે અને પોતાના ખિસ્સામાં રાખી લે છે. આ દરમિયાન તેઓ રાષ્ટ્રધ્વજને જમીન પર છોડી શકાય નહીં તેવી વાત કરતા પણ જોવા મળે છે.
જોહાનિસબર્ગમાં પણ જોવા મળ્યો હતો તિરંગા પ્રત્યે PM મોદીનો આદર
જોકે, વિદેશની ધરતી પર PM મોદીએ તિરંગા પ્રત્યે આદર દર્શાવ્યો હોય તેવી આ પહેલી ઘટના નથી. આ પહેલાં પણ દક્ષિણ આફ્રિકાના જોહાનિસબર્ગમાં તિરંગા પ્રત્યેનો તેમનો આવો જ આદર જોવા મળ્યો હતો. વર્ષ 2023માં જોહાનિસબર્ગમાં યોજાયેલી BRICS સમિટ દરમિયાન પણ PM મોદીએ સ્ટેજ પરથી ભારતીય તિરંગો ઉઠાવ્યો હતો.
ભારત માટે QUAD એક રચનાત્મક અને વિશ્વસનીય ભાગીદારી
QUAD બેઠક દરમિયાન PM મોદીએ કહ્યું કે ચારેય દેશોના વિદેશ મંત્રીઓ ગયા વર્ષે જાન્યુઆરીથી અત્યાર સુધીમાં પાંચ વખત મુલાકાત કરી ચૂક્યા છે. તેમણે આ મુલાકાતોને ભાગીદારી પ્રત્યેની રાજકીય ઇચ્છાશક્તિ અને સહિયારી પ્રતિબદ્ધતાનું પ્રમાણ ગણાવ્યું હતું. તેમણે કહ્યું કે ભારત માટે QUAD એક રચનાત્મક અને વિશ્વસનીય ભાગીદારી છે.
શું QUAD વિશ્વસનીય ઉકેલો પૂરા પાડશે ?
PM મોદીએ વધુમાં જણાવ્યું હતું કે, “દરિયાઈ સુરક્ષાથી લઈને વિશ્વસનીય સપ્લાય ચેઇન, નવી ટેક્નોલોજીથી લઈને આપત્તિ વ્યવસ્થાપન સુધી, અમારા પ્રયાસો રહ્યા છે કે QUAD વિશ્વસનીય ઉકેલો પૂરા પાડે.” તેમણે વિશ્વાસ વ્યક્ત કર્યો હતો કે આ બેઠક સહયોગના આગામી તબક્કા માટે નક્કર લક્ષ્યો નક્કી કરવામાં મદદરૂપ થશે. સાથે જ તેમણે અન્ય દેશોના નેતાઓનો સતત સહયોગ આપવા બદલ આભાર માન્યો હતો.
