Breaking News: પરમાણુ યુદ્ધના ખતરા વચ્ચે રશિયાનો માસ્ટરપ્લાન! ઈરાનના ‘યુરેનિયમ’ પર પુતિને લીધો મોટો નિર્ણય; શું આ પગલું દુનિયાને બચાવશે?

વિશ્વ અત્યારે પરમાણુ શક્તિઓના વિવાદ વચ્ચે શ્વાસ અધ્ધર કરીને બેઠું છે, ત્યારે રશિયાએ ઈરાનના એનરિચ્ડ યુરેનિયમ (સંવર્ધિત યુરેનિયમ) મામલે મહત્વની જાહેરાત કરી છે. ચીનની મુલાકાતે ગયેલા રશિયાના વિદેશ મંત્રી સર્ગેઈ લવરોવે સ્પષ્ટ કર્યું છે કે મોસ્કો આ જટિલ સમસ્યા ઉકેલવા માટે સીધી ભૂમિકા ભજવવા તૈયાર છે.

રશિયાનો ‘રીપ્રોસેસિંગ’ પ્લાન

લવરોવે બીજિંગમાં પત્રકારોને જણાવ્યું કે, રશિયા ઈરાન પાસે રહેલા અત્યંત સંવર્ધિત યુરેનિયમને ઈંધણ-ગ્રેડ યુરેનિયમમાં ફરીથી પ્રોસેસ કરી શકે છે. સરળ શબ્દોમાં કહીએ તો, જે યુરેનિયમ પરમાણુ બોમ્બ બનાવવામાં વપરાય છે, તેને રશિયા એવા સ્વરૂપમાં બદલી નાખશે જેનો ઉપયોગ માત્ર શાંતિપૂર્ણ ઉર્જા કાર્યો માટે થઈ શકે. રશિયાએ તૈયારી બતાવી છે કે ઈરાનને જે રીતે સ્વીકાર્ય હોય તે રીતે તેઓ મદદ કરવા તૈયાર છે.

પુતિને સીધો વોશિંગ્ટન મોકલ્યો પ્રસ્તાવ

આ સમાચાર એટલા માટે મહત્વના છે કારણ કે તાજેતરમાં પાકિસ્તાનમાં અમેરિકા-ઈરાન વચ્ચેની શાંતિ વાર્તા નિષ્ફળ ગઈ હતી. આ નિષ્ફળતા બાદ ક્રેમલિનના પ્રવક્તા દિમિત્રી પેસ્કોવે ખુલાસો કર્યો છે કે રાષ્ટ્રપતિ વ્લાદિમીર પુતિને આ પ્રસ્તાવ સીધો અમેરિકા સુધી પહોંચાડ્યો છે. એટલું જ નહીં, પુતિને ઈરાનના રાષ્ટ્રપતિ મસૂદ પેજેશકિયાન સાથે ફોન પર વાત કરી તેમને રાજદ્વારી સમર્થન આપવાની ખાતરી પણ આપી છે.

IAEA ની કડક નજર

બીજી તરફ, સંયુક્ત રાષ્ટ્રની પરમાણુ એજન્સી (IAEA) ના વડા રાફેલ ગ્રોસીએ પણ મોટું નિવેદન આપ્યું છે. તેમણે કહ્યું કે જો અમેરિકા અને ઈરાન વચ્ચે કોઈ સમજૂતી થાય, તો ઈરાનની પરમાણુ ગતિવિધિઓની અત્યંત ઝીણવટભરી તપાસ થવી જોઈએ. ટ્રમ્પ પ્રશાસન પહેલેથી જ કહી ચૂક્યું છે કે તેઓ કોઈ પણ સંજોગોમાં ઈરાનને પરમાણુ હથિયાર બનાવવા દેશે નહીં.

શું ઈતિહાસનું પુનરાવર્તન થશે?

ઉલ્લેખનીય છે કે 2015 માં પણ જ્યારે પરમાણુ કરાર થયો હતો, ત્યારે રશિયાએ ઈરાનમાંથી મોટી માત્રામાં યુરેનિયમ હટાવી લીધું હતું. હવે જ્યારે ફરી એકવાર યુદ્ધ જેવી સ્થિતિ સર્જાઈ છે, ત્યારે શું રશિયા ફરીથી મધ્યસ્થી બનીને દુનિયાને પરમાણુ જોખમમાંથી બહાર કાઢી શકશે? આ પ્રશ્ન અત્યારે આખી દુનિયામાં ચર્ચાઈ રહ્યો છે.

H-1B વિઝા પર જેડી વેન્સનું મહત્વનું નિવેદન; સાસરીયાના ખભે બંદૂક મૂકીને કહી આ મોટી વાત