અમેરિકા જવા માટે વિઝા મેળવવાની રાહ જોઈ રહેલા ભારતીય અરજદારો માટે મુશ્કેલી વધી છે. અમેરિકાના નવા અહેવાલ મુજબ, વર્ષ 2025માં ભારતીય અરજદારોએ નોન-ઇમિગ્રન્ટ વિઝાના ઇન્ટરવ્યૂ માટે સરેરાશ 346 દિવસ રાહ જોવી પડી હતી. કોરોનાની મહામારી પહેલાં આ સમયગાળો માત્ર 42 દિવસની આસપાસનો જ હતો. જોકે, GAOના આંકડા મુજબ FY2019માં વૈશ્વિક સ્તરે વિઝિટર વિઝા ઇન્ટરવ્યૂ માટે સરેરાશ રાહ જોવાનો સમયગાળો 26 દિવસનો હતો.

1.45 મિલિયનથી વધુ અરજીઓ, માત્ર 68 અધિકારીઓ

US Government Accountability Office (GAO) દ્વારા, 28 સપ્ટેમ્બર, 2026ના રોજ જાહેર કરાયેલા અહેવાલમાં જણાવાયું છે કે, FY2025 દરમિયાન ભારતમાં આશરે 14.55 લાખ નોન-ઇમિગ્રન્ટ વિઝા અરજીઓ આવી હતી. આ અરજીઓની કામગીરી માટે માત્ર 68 કોન્સ્યુલર અધિકારીઓ ઉપલબ્ધ હતા. આ પ્રમાણે એક અધિકારી ઉપર સરેરાશ 21,401 અરજીઓનો બોજ હતો. GAOના વિશ્લેષણમાં ભારત માટે વિઝા અરજીઓની સંખ્યા અને ઉપલબ્ધ સ્ટાફ વચ્ચેનું મોટું અંતર ઇન્ટરવ્યૂની લાંબી રાહ સાથે જોડાયેલું હોવાનું સામે આવ્યું છે.

કોરોના પહેલાંના સમયની સરખામણીએ રાહ જોવાનો સમય ખૂબ વધ્યો

કોરોનાની મહામારી બાદ અમેરિકાના વિઝા માટેની માંગમાં ઝડપથી વધારો થયો છે. FY2019માં અમેરિકાએ વિશ્વભરમાં આશરે 92 લાખ વિઝિટર વિઝા અરજીઓ પર નિર્ણય લીધો હતો. આ સંખ્યા FY2025માં વધીને 1.17 કરોડ થઈ હતી. બીજી તરફ, નોન-ઇમિગ્રન્ટ વિઝા પર કામ કરતા કોન્સ્યુલર અધિકારીઓની સંખ્યા FY2024માં 1,342 હતી, જે FY2025માં ઘટીને 904 થઈ ગઈ હતી. GAOએ સ્ટાફમાં ઘટાડા પાછળ ભરતી પરના નિયંત્રણો અને કર્મચારીઓની અછત જેવા કારણો દર્શાવ્યા છે.

ભારતની સ્થિતિ અન્ય દેશોની સરખામણીએ

GAOના FY2025ના આંકડા પ્રમાણે ભારત અને મેક્સિકોમાં વિઝા અરજીઓની સરખામણીએ અધિકારીઓની સંખ્યા ઓછી હતી. ભારતમાં ઇન્ટરવ્યૂ માટેનો સરેરાશ રાહ સમય 346 દિવસ, જ્યારે મેક્સિકોમાં 283 દિવસ હતો. તેની સામે બ્રાઝિલમાં સરેરાશ રાહ 32 દિવસ અને ચીનમાં 34 દિવસ હતી. GAO મુજબ સ્ટાફ અને અરજીઓ વચ્ચેનું પ્રમાણ રાહના સમયને અસર કરતું મુખ્ય પરિબળોમાંનું એક હતું.

વિઝા પ્રક્રિયામાં લાંબી રાહનું મુખ્ય કારણ શું?

GAOના અહેવાલ પ્રમાણે અમેરિકાના કોન્સ્યુલર વિભાગ પાસે સ્ટાફની જરૂરિયાત અને કામના ભારણને સંતુલિત કરવા માટેની પ્રક્રિયા છે, પરંતુ તેનો નિયમિત ઉપયોગ થતો નથી. GAOએ અમેરિકાના સ્ટેટ ડિપાર્ટમેન્ટને સ્ટાફની જરૂરિયાતનું નિયમિત વૈશ્વિક મૂલ્યાંકન કરવાની વ્યવસ્થા સુનિશ્ચિત કરવાની ભલામણ કરી છે.

અહેવાલમાં એ પણ જણાવાયું છે કે લાંબા ઇન્ટરવ્યૂ વેઇટિંગ ટાઈમની અસર આંતરરાષ્ટ્રીય પ્રવાસ પર પડી શકે છે. 2025માં આંતરરાષ્ટ્રીય પ્રવાસનથી અમેરિકાની અર્થવ્યવસ્થામાં અંદાજે 176 અબજ ડોલરનું યોગદાન આવ્યું હતું.

Breaking News : પેટ્રોલ પંપ પર UPI પેમેન્ટ માટે વધારાના રૂ. 5 વસૂલવામાં આવે તો ફરિયાદ ક્યાં કરશો ?