પોતાને લેડી ડોન અને દબંગ ગણાવતી કીર્તિ પટેલની ટિકટોકથી જેલ સુધીની સફર અને ગુનાઓની ક્રાઈમ કુંડળી- વાંચો

ગુજરાતમાં સોશિયલ મીડિયા પર સતત છવાયેલી રહેતી અને સતત વિવાદો માટે જાણીતી ‘ટિકટોક ગર્લ’ કીર્તિ પટેલ (Kirti Patel) છેલ્લા થોડા દિવસોથી ચર્ચાનો વિષય બની છે. વિવાદોનો પર્યાય ગણાતી કીર્તિ પટેલે જ્યારથી મહાશિવરાત્રી પર્વે ભવનાથના મેળામાં મૃગકુંડમાં સાધુઓ વચ્ચે જઈને પરંપરા તોડીને સ્નાન કર્યુ ત્યારથી તેના વીડિયો સોશિયલ મીડિયા પર ખૂબ વાયરલ થઈ રહ્યા છે. સોશિયલ મીડિયા પર સતત એક્ટિવ રહેતા લોકો માટે કીર્તિ પટેલ જરા પણ અજાણી નથી. ટિકટોકથી રાતોરાત પ્રસિદ્ધિ મેળવનારી કીર્તિ પટેલ તેની ચિત્ર વિચીત્ર રીલ્સ ની સાથે તેના કેટલાક નિવેદનો માટે પણ વિવાદમાં આવી ચુકી છે.

કેવી રીતે બની વિવાદોનો પર્યાય

સોશિયલ મીડિયા ઈન્ફ્લુએન્સર તરીકે જાણીતી કીર્તિ પટેલનો વિવાદો સાથે જુનો નાતો રહ્યો છે. સીનસપાટમાં માહેર કીર્તિ પટેલ જેલની હવા પણ ખાઈ ચૂકી છે. અત્યાર સુધી કીર્તિ પટેલની સામે અનેક કેસ પણ નોંધાયા છે. કીર્તિ પટેલનો વિવાદ કોઈ સમાજ હોય કે પછી કોઈ સામાન્ય વ્યક્તિ કોઈને પણ છોડતી નથી.  ટિકટોક દ્વારા પ્રસિદ્ધિ મેળવનારી કીર્તિ પટેલ તેના બેફામ નિવેદનોને કારણે પ્રખ્યાત ઓછી અને કુખ્યાત વધુ બની ગઈ છે. માત્ર 30 વર્ષની ઉમરે કીર્તી સામે અત્યાર સુધીમાં કૂલ 10 થી વધુ ગુના નોંધાઈ ચુક્યા છે. જેમા ધમકી આપવી, ખંડણી માગવી સહિત સુસાઈડ માટે ઉશ્કેરણી કરવી અને પાસા સહિતના ગુના સામેલ છે.

એક સમયે ફેશન ડિઝાઈનિંગ સાથે સંકળાયેલી કીર્તિ પટેલ સોશિયલ મીડિયા પર વીડિયો બનાવી ફેમસ થઈ હતી. પરંતુ હવે તેનું નામ વિવાદોમાં વધુ રહે છે. સોશિયલ મીડિયા પર અપશબ્દો માટે ઓળખાતી કીર્તિ પટેલ જ્યારે પોલીસ સ્ટેશનમાં જાય છે. ત્યારે પણ એમ કહેતી જોવા મળે છે કે, ટકાટક વીડિયો લેજો. તે પોતાના કરેલા કારનામાની માટે લેશમાત્ર પણ શરમ અનુભવતી નથી.

સોશિયલ મીડિયા પ્લેટફોર્મ પર ટીકટોકથી ફેમસ થયેલી કીર્તિ મૂળ સુરતની છે અને તે સતત ચર્ચાનું કેન્દ્ર રહે છે. કીર્તિના કૌભાંડો લાખોમાં નહીં પરંતુ કરોડો રૂપિયાના હોય છે. કીર્તિના પરિવારની જો વાત કરીએ તો કીર્તિ પટેલને ચાર બહેનો છે અને એક ભાઈ છે.

બિલ્ડર પાસે 2 કરોડની ખંડણી માગવાનો આરોપ

કીર્તિ પટેલની સુરત પોલીસે 17 જૂન અમદાવાદ ખાતેથી ધરપકડ કરી હતી. કીર્તિ પટેલ સામે લગભગ એક વર્ષ પહેલાં જાણીતા બિલ્ડર વજુભાઈ કત્રોડિયા દ્વારા સુરતના કાપોદ્રા પોલીસ સ્ટેશનમાં ફરિયાદ દાખલ કરાઈ હતી. જેમાં તેમણે આરોપ લગાવ્યો હતો કે, ‘કીર્તિ પટેલે મારી પાસે 2 કરોડ રૂપિયાની ખંડણી માંગી હતી. જો હું આ 2 કરોડ રૂપિયા ન આપું તો મને ખોટા હનીટ્રેપના કેસમાં ફસાવવાની પણ ધમકી આપી છે.’ પોલીસે બિલ્ડર વજુભાઈ કત્રોડિયાના ફરિયાદના આધારે એક વર્ષ પહેલાં કીર્તિ પટેલ સામે ગુનો દાખલ કર્યો હતો. જોકે, ફરિયાદ દાખલ થયાથી કીર્તિ પટેલ ફરાર હતી, જે અમદાવાદ ખાતે હોવાની બાતમી મળતા સુરત પોલીસે અમદાવાદથી કીર્તિ પટેલની ધરપકડ કરી હતી. કીર્તિ પટેલ ખંડણીના (Extortion) ના ગુનામાં જેલમાં પણ ગયેલી છે. આ કેસમાં કોર્ટે બે વાર તેની જામીન અરજી ફગાવી હતી. એ કેસમાંથી જેલમુક્ત થયા બાદ થોડા દિવસો પહેલા જ જુનાગઢના મૃગીકુંડમાં પરવાનગી વિના સ્નાન કરવા બાબતે તેનું નામ ઉછળ્યુ છે

ગુજરાતમાં કીર્તિ પટેલ વિરુદ્ધ 10 થી વધુ ગુના

સોશિયલ મીડિયા પર વાઇરલ વીડિયો અને વિવાદો માટે જાણીતી ‘ટિકટોક ગર્લ’ કીર્તિ પટેલ પાસા એક્ટ હેઠળ ધરપકડ થઈ હતી વડોદરા સેન્ટ્રલ જેલમાં ધકેલાઈ હતી. જે બાદ કીર્તિ પટેલ વિરુદ્ધ સુરતના લસકાણા પોલીસ સ્ટેશનમાં વધુ એક ગુનો નોંધાયો.

ધમકી અને બદનામીનો આરોપ

પ્રાપ્ત વિગતો મુજબ સુરતના જ વેપારી અલ્પેશ ડોંડા (રેતી-કપચીના વેપારી)એ કીર્તિ પર ધમકી, અપશબ્દો અને સોશિયલ મીડિયા પર બદનામ કરવાના આરોપ લગાવ્યા છે. આ મામલે ફરિયાદ નોંધાતા પોલીસે તપાસ શરૂ કરી હતી. અલ્પેશ ડોંડાની ફરિયાદ મુજબ, કીર્તિ પટેલે તેમને અને તેમના પરિવારને ફોન કરીને અપશબ્દો બોલ્યા, મારામારીની ધમકી આપી અને સોશિયલ મીડિયા પર બદનામ કરવાની પોસ્ટ્સ વાઇરલ કરી. આ પોસ્ટ્સમાં તેમને નુકસાન પહોંચાડવાનો પ્રયાસ કર્યો હોવાનું જણાવાયું છે. પોલીસે કીર્તિ પટેલ સામે ધમકી આપવા અને બદનામ કરવાની ફરિયાદ નોંધી હતી. કીર્તિ પટેલ સામે અગાઉ મારામારી, ખંડણી, અને સોશિયલ મીડિયા દ્વારા બદનામ કરવા જેવી અનેક ફરિયાદો નોંધાઈ ચૂકી છે.

વૃદ્ધ દંપતીની જમીન પચાવી પાડવાના કાવતરામાં કીર્તિની સંડોવણી

સોશિયલ મીડિયા પર લાખો ફોલોઅર્સ ધરાવતી કીર્તિ પટેલએે કોરોના સમયે ફ્લાઈટમાં માસ્ક ન પહેરવાને લઈને ઝઘડો કરી ઍરહોસ્ટેસને માર માર્યો હતો. કીર્તિ પટેલ અનેકવાર કાયદાના સકંજામાં આવી ચુકી છે. સમગ્ર ગુજરાતના પોલીસ સ્ટેસનોમાં કીર્તિ વિરુદ્ધ ઓછામાં ઓછા 10 FIR નોંધાયેલી છે. જેમા હત્યાનો પ્રયાસ (2020 પૂણા પોલીસ), ખંડણી (વસ્ત્રાપુર પોલીસ) અને ગુનાહિત ધાકધમકીનો, જમીન પચાવી પાડવા(લેન્ડગ્રેબિંગ) જેવા ગુનાઓ નોંધાયેલા છે. આ સહિત ગાંધીનગર, પાટણ, જુનાગઢ અને સુરત ગ્રામીણ પોલીસ હદમાં તેની વિરુદ્ધ હુમલાથી લઈને દારૂબંધી સુધીના કેસ પણ નોંધાયેલા છે.જુલાઈ 2025મા સુરતના એક વૃદ્ધ દંપતીની જમીન હડપ કરવાના કાવતરામાં તેની સંડોવણી સામે આવી છે.

ભવનાથમાં મૃગીકુંડમાં સ્નાન કરી પરંપરા પર કર્યો પ્રહાર

મહાશિવરાત્રી પર્વે કીર્તિ પટેલે ભવનાથના મૃગીકુંડમાં અચાનક સ્નાન માટે પહોંચી જઈ લક્ષ્મણ રેખા ઓળંગી હતી. મહાશિવરાત્રી પર્વે મૃગીકુંડમાં માત્ર સન્યાસીઓને જ સ્નાન કરવાની પરંપરા છે, કોઈ સંસારી ત્યા જઈને સ્નાન કરી શક્તુ નથી પરંતુ પરંપરા પર પ્રહાર કરતી હોય તેમ કીર્તિ પટેલ મૃગીકુંડમમાં સ્નાન કરતી જોવા મળી હતી અને આ વીડિયો પણ સોશિયલ મીડિયામાં વાયરલ થયા હતા. જે બાદ ભવનાથ આશ્રમના ઈન્દ્રભારતી બાપુએ તેને ત્યાંથી બહાર કાઢવા માટે સુરક્ષાકર્મીઓને જણાવ્યુ તો કીર્તિ પટેલે મહિલા પોલીસ કર્મી સાથે પણ અભદ્ર વ્યવહાર કર્યો અને અપશબ્દો બોલ્યા હતા. આ વિવાદ બાદ કીર્તિ પટેલે સતત સોશિયલ મીડિયા પર વીડિયો પોસ્ટ પર ઈન્દ્રભારતી બાપુ વિશે એલફેલ બોલતી અને મનઘડંત આરોપ લગાવ્યા હતા. આટલુ ઓછુ હોય તેમ કીર્તિ ખુદને મહાદેવની ભક્ત ગણાવે છે અને પોતાને ઋષિ ભારતી બાપુની સેવક ગણાવે છે. કીર્તિએ વીડિયોમાં એવો પણ દાવો કર્યો કે તેણે ઋષિભારતી બાપુ પાસેથી દીક્ષા લીધેલી છે.

યુટ્યુબરને ધમકી આપી 20 લાખની ખંડણી માગી

કીર્તિના આવા વીડિયોના વિરોધમાં જ્યારે જિદ્દીબોય નામથી યુટ્યુબ ચેનલ ચલાવતા જેતપુરના યુટ્યુબરે વીડિયો બનાવ્યો તો કીર્તિ પટેલ અને તેના સાગરીતોએ તેને પણ વારંવાર ધમકી આપી  અને બળાત્કારના કેસમાં ફસાવી દેવાની ધમકી આપી. કીર્તિએ યુવકને વીડિયો ડિલિટ કરવા તેમજ 20 લાખની ખંડણી માગી હોવાનો આરોપ છે. જેનાથી ત્રાસી જઈ યુવકે ફિનાઈલ ગટગટાવી હતી. આ કેસમાં કીર્તિ સામે ફરિયાદ દાખલ થઈ હતી.  જુનાગઢ કોર્ટમાં તેને રજૂ કરવામાં આવી હતી જ્યા એક દિવસના રિમાન્ડ બાદ કીર્તિને જેલમુક્ત થઈ છે.

પોલીસ સાથે તુમાખીભર્યો વ્યવહાર

મહાશિવરાત્રીમાં મૃગીકુંડમાં સ્નાન કરવા, પોલીસની ફરજમાં રૂકાવટ અને અશોભનિય વર્તન કરવા સહિતના આરોપસર તેની સામે અલગ અલગ ત્રણ ગુના નોંધાયા છે. કીર્તિ સામે ગીરસોમનાથના એક સાધુ દ્વારા પણ ધાર્મિક લાગણી દુભવવાની ફરિયાદ કરેલી છે.

કીર્તિ પટેલનો વિવાદિત ઇતિહાસ

કીર્તિ પટેલ પોતાને ‘લેડી ડોન’ તરીકે પણ ઓળખાવે છે, ઇન્સ્ટાગ્રામ પર તેના લાખો ફોલોવર્સ છે પરંતુ તેની વિરુદ્ધ ગુજરાતના વિવિધ જિલ્લાઓમાં ગંભીર આરોપો નોંધાયા છે. કીર્તિ પટેલની પ્રવૃત્તિઓમાં સોશિયલ મીડિયાનો મુખ્ય ઉપયોગ જોવા મળે છે . તે વીડિયો બનાવીને ધમકી આપે, બદનામ કરે અને પછી ‘સમાધાન’ના નામે પૈસા વસૂલે છે. તે વારંવાર બેલ પર છૂટીને પણ ગુનાહિત પ્રવૃત્તિઓ ચાલુ રાખે છે, જેને કારણે પાસા એક્ટ લગાવવામાં આવ્યો છે. કીર્તિ પટેલ સોશિયલ મીડિયાનો દુરુપયોગ કરીને સમાજમાં ભયનું વાતાવરણ ઊભું કરે છે. કીર્તિના ફોલોવર્સને કારણે તેની પોસ્ટ્સ ઝડપથી વાઇરલ થાય છે, જે વેપારીઓ અને સામાન્ય લોકોને નુકસાન પહોંચાડે છે.

Breaking News: વિવાદોની ક્વિન કીર્તિ પટેલનો જેલમાંથી થયો છુટકારો, જુનાગઢ કોર્ટે જામીન મુક્ત કરવા કર્યો ઓર્ડર