સાબરકાંઠામાં સતત બીજા દિવસે વરસાદી માહોલ, હાઈવે અને માર્કેટયાર્ડમાં પાણી ભરાયા
તલોદ, હિંમતનગર, પ્રાંતિજ, ઈડર અને વિજયનગર સહિતના તાલુકાઓમાં વરસાદ નોંધાયો હતો. ખાસ કરીને તલોદ અને પ્રાંતિજ તાલુકામાં સિઝનમાં સૌથી ઓછો વરસાદ વરસતા ખેડૂતો ચિંતામાં હતા. પરંતુ બે દિવસથી પ્રાંતિજ-તલોદ અને આસપાસના ગ્રામ્ય વિસ્તારોમાં વરસાદ વરસવાને લઈ રાહત સર્જાઈ છે.
સાબરકાંઠા જિલ્લામાં સતત બીજા દિવસે વરસાદી માહોલ જળવાઈ રહેવાને લઈ આનંદ છવાયો હતો. વરસાદની લાંબી રાહ જોયા બાદ હવે વરસાદી માહોલ છવાયો છે. જિલ્લામાં બે દિવસ દરમિયાન સાર્વત્રિક વરસાદ વરસ્યો છે. ગ્રામ્ય વિસ્તારોમાં પણ વરસાદ વરસવાને લઈ ખેડૂતો પણ ખુશહાલ જોવા મળી રહ્યા છે અને હવે ખેડૂતો વાવણી માટે તૈયારીઓમાં વ્યસ્ત બન્યા છે.
જિલ્લામાં તલોદ, હિંમતનગર, પ્રાંતિજ, ઈડર અને વિજયનગર સહિતના તાલુકાઓમાં વરસાદ નોંધાયો હતો. ખાસ કરીને તલોદ અને પ્રાંતિજ તાલુકામાં સિઝનમાં સૌથી ઓછો વરસાદ વરસતા ખેડૂતો ચિંતામાં હતા. પરંતુ બે દિવસથી પ્રાંતિજ-તલોદ અને આસપાસના ગ્રામ્ય વિસ્તારોમાં વરસાદ વરસવાને લઈ રાહત સર્જાઈ છે. હિંમતનગરના મોતીપુરામાં નેશનલ હાઈવે પર વરસાદી પાણી સોમવારે સાંજે ભરાઈ જવા પામ્યા હતા. આવી જ રીતે હિંમતનગરના માર્કેટયાર્ડમાં પણ વરસાદી પાણી ભરાઈ જવા પામ્યા હતા. વરસાદી પાણી ભરાઈ જતા હાલાકી સર્જાઈ હતી.
તલોદમાં સૌથી વધારે વરસાદ
સાબરકાંઠામાં સૌથી ઓછો વરસાદ જૂન માસમાં તલોદ તાલુકામાં નોંધાયો હતો. ચોમાસાનો વરસાદ જૂન માસમાં માંડ 4 મીમી જેટલો વરસ્યો હતો. ત્યા હવે જુલાઈની શરુઆત સાથે જ વરસાદી માહોલ જામતા તલોદ અને આસપાસના વિસ્તારમાં રાહત સર્જાઈ છે. તલોદ તાલુકામાં 44 મિલીમીટર જેટલો વરસાદ અંતિમ 24 કલાક દરમિયાન વરસ્યો છે. આસપાસના ગ્રામ્ય વિસ્તારોમાં પણ વરસાદ વરસવાને લઈ ખેડૂતોને રાહત થઈ છે.
પ્રાંતિજમાં પણ એક ઈંચ આસપાસ વરસાદ નોંધાયો છે. પ્રાંતિજમાં 22 મિલીમીટર વરસાદ નોંધાયો હતો. પ્રાંતિજમાં પણ વરસાદની રાહ ખૂબ જોવાઈ રહી હતી. આ દરમિયાન પ્રાંતિજ અને તેની આસપાસના વિસ્તારમાં સોમવારે મૂશળધાર વરસાદ નોંધાતા ખેડૂતોમાં આનંદ છવાયો છે. હિંમતનગરમાં સવા ઈંચ જેટલો વરસાદ નોંધાયો હતો. જ્યારે ઈડર અને વિજયનગરમાં પોણો ઈંચ વરસાદ અંતિમ 24 કલાકમાં વરસ્યો હતો. વડાલીમાં હળવો વરસાદ રહ્યો હતો અને 5 મિલીમીટર વરસાદ નોંધાયો હતો. આમ એંકદરે જિલ્લાના 6 તાલુકાઓમાં વરસાદ નોંધાયો હતો. ખેડબ્રહ્મા અને પોશીના તાલુકાઓમાં સોમવારે વરસાદ નોંધાયો નહોતો.
સાબરકાંઠામાં નોંધાયેલ વરસાદ
મંગળવારે સવારે 6 કલાક સુધીના અંતિમ 24 કલાક દરમિયાન સાબરકાંઠા જિલ્લામાં 8 પૈકી 6 તાલુકાઓમાં વરસાદ નોંધાયો હતો. છેલ્લા બે દિવસથી જામેલા વરસાદી માહોલ મુજબ જિલ્લામાં વરસાદ વરસ્યો છે. મંગળવારે સવારે પણ આવો જ માહોલ જળવાઈ રહ્યો હતો. અંતિમ 24 કલાક દરમિયાન વરસેલ વરસાદના આંકડાઓ પર કરીશું નજર
- તલોદ 44 મીમી
- હિંમતનગર 29 મીમી
- પ્રાંતિજ 22 મીમી
- ઈડર 17 મીમી
- વિજયનગર 16 મીમી
- વડાલી 05 મીમી
અરવલ્લીમાં નોંધાયેલ વરસાદ
જિલ્લાના તમામ 6 તાલુકામાં વરસાદ વરસ્યો હતો. મંગળવારે સવારે 6 કલાક સુધીના અંતિમ 24 કલાક દરમિયાન નોંધાયેલ વરસાદના આંકડાઓ પર નજર કરીશું.
- ધનસુરા 27 મીમી
- ભિલોડા 25 મીમી
- મોડાસા 21 મીમી
- મેઘરજ 17 મીમી
- બાયડ 07 મીમી
- માલપુર 03 મીમી