ગુજરાતમાં આગામી 4 દિવસ સુધી ગરમીનું મોજૂ ફરી વળવાની આગાહી હવામાન વિભાગે કરી છે. રાજ્યભરમાં વહેતા સુકા અને ગરમ પવનને કારણે ગરમીના પ્રમાણમાં એકાએક વધારો થયો છે. હવામાન વિભાગે આગાહી કરી છે કે, રાજ્યભરમાં આગામી ચાર દિવસ સુધી ગરમીનું મોજૂ ફરી વળશે. ખાસ કરીને સૌરાષ્ટ્ર અને કચ્છના અનેક શહેરમાં હીટવેવની અસર જોવા મળશે. દિવસનું સામાન્ય તાપમાન કરતા પ્રમાણમાં વધુ રહેશે. દિવસ અને રાત્રીના તાપમાનમાં કોઈ મોટો ફેરફાર થવાની સંભાવની નહીંવત છે. દિવસના મહત્તમ તાપમાનના પ્રમાણમાં ઉત્તરોતર વધારો થવાની પણ આગાહી હવામાન વિભાગે કરી છે.

ગુજરાતમાં વહેતા ગરમ અને સુકા પવનને કારણે ગરમીનો પારો એકાએક ઉચકાયો છે. આજે ગુજરાતના અનેક શહેરોમાં નોંધાયેલ ગરમી, સામાન્ય કરતા 4 ડિગ્રીથી માંડીને 9 ડિગ્રી સુધી વધુ નોંધાઈ છે. કચ્છના કંડલા ખાતે ગરમીનો પારો 41.4 ડિગ્રીએ નોંધાયો છે. જે સામાન્ય કરતા 9.3 ડિગ્રી વધુ તાપમાન નોંધાયું છે.

ગુજરાતમાં આજે સૌથી વઘુ તાપમાન રાજકોટમાં નોંધાયું છે. રાજકોટમાં ગરમીનો પારો 41.6 ડિગ્રીએ પહોચી ગયો છે. જે રોજબરોજ નોંધાતી ગરમીના પ્રમાણ કરતા 7.3 ડિગ્રી વધુ નોંધાયું છે. અમદાવાદ શહેરમાં ગરમીનો પારો 41.2 ડિગ્રીએ અટક્યો છે. જે સામાન્ય કરતા 7 ડિગ્રી વધુ તાપમાન નોંધાયું છે.

અમરેલીમાં 40.5 ડિગ્રી તાપમાન નોંધાયું છે. જે 5.5 ડિગ્રી વધુ છે. વડોદરા ખાતે 40.4 ડિગ્રી તાપમાન નોંધાયું હતું જે 5.2 ડિગ્રી વધુ રહેવા પામ્યું છે. ભાવનગરમાં 38.6 ડિગ્રી તાપમાન રહ્યું છે. જે સામાન્ય કરતા 5.1 ડિગ્રી વધુ રહ્યું હતું.

કચ્છના ભૂજમાં ગરમીનો પારો 40.4 ડિગ્રીએ અટક્યો હતો. જે 6.4 ડિગ્રી વધુ તાપમાન નોંધાયું છે. બનાસકાંઠાના ડીસામાં પણ ગરમીનો પારો 41.1 ડિગ્રીએ પહોચ્યો હતો. ડીસામાં નોંધાયેલ ગરમી સામાન્ય કરતા 7.4 ડિગ્રી વધુ તાપમાન છે. ગુજરાતના હરિયાળા પાટનગર એવા ગાંધીનગરમાં પણ તાપમાનનો પારો વધીને 40.6 ડિગ્રીએ પહોચ્યો છે. જે સમાન્ય તાપમાન કરતા 6.5 ડિગ્રી વધુ ગરમી છે. નલિયામાં 37.4 ડિગ્રી ગરમી નોંધાઈ છે. જે 4.8 ડિગ્રી વધુ છે.

ગુજરાતમાં આજે સોમવારને 9 માર્ચે દિવસનુ મહત્તમ તાપમાન સામાન્ય કરતા 9 ડિગ્રી સુધી વધુ નોંધાયું છે. જેના કારણે આકાશમાંથી અગનજ્વળા વરસતી હોય તેવો અનુભવ દિવસે થઈ રહ્યો હતો.

આખું ગુજરાત લૂની લપેટમાં ! કાળઝાળ ગરમીનો ‘કિલર’ રાઉન્ડ શરૂ; 9 શહેરમાં પારો 40 ને પાર – જુઓ Video