રાજ્યમાં સ્માર્ટ સહાય યોજના અંતર્ગત ખેડૂતોને સ્માર્ટ ફોનની ખરીદ કિંમતના 40 ટકા સુધીની સહાય આપવાની યોજના અમલી, 13 હજારથી વધુ ખેડૂતોના પેમેન્ટ ઓર્ડર થયા ઈશ્યુ
Farmers' Scheme: રાજ્યમાં સ્માર્ટ ફોન સહાય યોજના અંતર્ગત 13 હજારથી વધુ ખેડૂતના પેમેન્ટ ઓર્ડર ઈશ્યુ કરાયા છે. આ યોજના અંતર્ગત રાજ્યના ખેડૂતોને સ્માર્ટ ફોનની ખરીદી માટે 40 ટકા અથવા 6 હજાર રૂપિયા સુધીની સહાય આપવાની જોગવાઈ કરવામાં આવી છે.
ગુજરાત સરકાર (Gujarat Government) દ્વારા ખેડૂતોને સ્માર્ટ ફોનની ખરીદી માટે 40 ટકા સુધીની અથવા 6 હજાર રૂપિયા સુધીની સહાય આપવાની યોજના લાવવામાં આવી છે. આ યોજના રાજ્યના ખેડૂતને ખેતી સબંધિત માહિતી મેળવવામાં મદદ મળી રહે તે હેતુથી લાવવામાં આવી છે. ખેડૂતો ખેતીવાડી ખાતાની વિવિધ સહાયકારી યોજનાઓમાં લાભ મેળવવા માટે ઘરે બેઠા સરળતાથી ઓનલાઈન અરજી કરી શકે તે માટે ગુજરાત સરકાર દ્વારા સૌપ્રથમ વર્ષ 2021-2022માં રાજયનાં ખેડૂતોને સ્માર્ટફોન(Smart Phone)ની ખરીદી પર સહાય આપવા અંગેની યોજના અમલી બનાવી હતી.
ચાલુ વર્ષ: 2022-23માં રાજ્ય સરકાર દ્વારા આ યોજના હેઠળ રૂ. 1 હજાર લાખની જોગવાઈ કરાઈ છે. આ સહાયનો લાભ મેળવવા રાજ્યભરમાંથી 33,079 ખેડૂતો દ્વારા આઈ.ખેડૂત પોર્ટલ (Farmers Portal) પર અરજી કરવામાં આવી છે. જે પૈકી 13,074ના પેમેન્ટ ઓર્ડર ઈસ્યૂ કરીને સહાયની ચૂકવણી કરવામાં આવી રહી છે. જ્યારે ગત વર્ષ 2021-22માં આ માટે રૂ.1500 લાખની જોગવાઇ કરવામાં આવી હતી. જે અંતર્ગત માર્ચ-2022 સુધીમાં 16,104 ખેડૂતોને રૂ. 921.18 લાખની સહાય ચૂકવી દેવામાં આવી છે તેમ કૃષિ વિભાગની યાદીમાં જણાવાયું છે.
ખેડૂતો ફોન દ્વારા ઘરે બેઠા જાણી શકશે અરજીનું સ્ટેટસ
કૃષિક્ષેત્રે ડિજિટલ સેવાનો વ્યાપ દિવસેને દિવસે વધી રહ્યો છે. કૃષિક્ષેત્રે ડગલેને પગલે ખેડૂતો આઈ.ટી. ટેકનોલોજીના ઉપયોગ થકી નવી ખેત ઉપયોગી અદ્યતન તકનીકો અપનાવી પોતાની આવકમાં વધારો મેળવતા થયા છે. જેમાં ખેડૂતો દ્વારા હવામાન ખાતાની આગાહી, વરસાદની આગાહી, સંભવિત રોગ જીવાત ઉપગ્રહની માહિતી, ખેડૂત ઉપયોગી પ્રકાશનો, નવીનતમ ખેત પદ્ધતિ, રોગ-જીવાત નિયંત્રણની તકનીકી, ખેતીવાડી ખાતાની સહાય યોજનાઓની માહિતી મેળવવા તથા ખેતીવાડી ખાતાની યોજનાઓમાં સહાય મેળવવા ઓનલાઈન અરજી કરવા વગેરે જેવી બાબતો માટે ખેડૂતો દ્વારા બહોળા પ્રમાણમાં સ્માર્ટફોનનો ઉપયોગ કરવામાં આવી રહ્યો છે.
સ્માર્ટ ફોનની ખરીદી માટે 40 ટકા અથવા 6000 સુધીની સરકાર તરફથી સહાય
રાજ્ય સરકાર દ્વારા ખેડૂતોના હિતમાં સ્માર્ટફોનની ખરીદી માટે સ્માર્ટ ફોન પર સહાય યોજના અમલી બનાવી છે. આ યોજના અંતર્ગત ખેડૂતોને સ્માર્ટફોનની ખરીદ કિંમતના 40 ટકા અથવા રૂ.6000/- બે માંથી જે ઓછુ હોય તે મુજબ સહાયનું ધોરણ મંજુર કરવામાં આવે છે. જેનો લાભ મેળવવા ખેડૂતોએ આઈ-ખેડૂત પોર્ટલ પર અરજી કરવાની રહે છે તેમ યાદીમાં વધુ જણાવવામાં આવ્યું છે. આ યોજના થકી ખેડૂતોને ખેતી લક્ષી માહિતી મેળવવા પણ ઘણી મદદ મળી રહેશે.
ઈનપુટ ક્રેડિટ- કિંજલ મિશ્રા- ગાંધીનગર
