‘મને દફનાવવામાં આવશે કે અગ્નિદાહ અપાશે?’: આસિમ રિયાઝ સાથે ધર્મ પરિવર્તન અંગે હિમાંશી ખુરાનાનો મોટો ખુલાસો

પંજાબી અભિનેત્રી હિમાંશી ખુરાનાએ ‘બિગ બોસ 13’ ના સહ-સ્પર્ધક આસિમ રિયાઝ સાથેના પોતાના સંબંધો દરમિયાન ધર્મને લઈને થયેલા આંતરિક સંઘર્ષ વિશે ખુલીને વાત કરી છે. તેમણે તે સમયને યાદ કર્યો જ્યારે તેમને લાગવા માંડ્યું હતું કે કદાચ તેમણે પોતાનો જન્મજાત ધર્મ છોડવો પડી શકે છે. પારસ છાબડાના પોડકાસ્ટમાં વાતચીત દરમિયાન હિમાંશીએ જણાવ્યું કે આ સંઘર્ષની તેમના માનસિક સ્વાસ્થ્ય પર ઊંડી અસર પડી હતી અને એક તબક્કે તેઓ પોતાના ધાર્મિક અસ્તિત્વ અને ઓળખ વિશે ગંભીર ચિંતામાં મુકાઈ ગયા હતા.

હિમાંશી ખુરાના અને આસિમ રિયાઝ વચ્ચેનો સંબંધ

હિમાંશી અને આસિમની મુલાકાત 2019 માં ‘બિગ બોસ 13’ ના ઘરમાં થઈ હતી. હિમાંશી વાઇલ્ડ કાર્ડ સ્પર્ધક તરીકે પ્રવેશી હતી. બંને વચ્ચે નિકટતા વધી અને શો પૂરો થયા બાદ તેમણે ડેટિંગ કરવાનું શરૂ કર્યું. તેઓ લગભગ ચાર વર્ષ સુધી સંબંધમાં રહ્યા હતા. હિમાંશીએ જણાવ્યું કે તે સંબંધ દરમિયાન ધાર્મિક મતભેદો એક મોટો વ્યક્તિગત મુદ્દો બની ગયા હતા. તેમણે કહ્યું, “તેઓ મને પોતાના ધર્મની સારી બાબતો જણાવતા હતા. દરેક વ્યક્તિ પોતાના ધર્મ વિશે જણાવે છે, તેમાં કંઈ ખોટું નથી. તેઓ ઈચ્છતા હતા કે હું તેને સમજું અને સ્વીકારું, પરંતુ હું તેના માટે તૈયાર નહોતી. તેમનામાં કોઈ ખરાબી નહોતી, તેમણે ક્યારેય મારી સાથે ખરાબ વર્તન નથી કર્યું, પરંતુ ધર્મ પરિવર્તન ન કરવું એ મારો પોતાનો અંગત નિર્ણય હતો.”

ધર્મ પરિવર્તન અને ચારધામ યાત્રાનો નિર્ણય

હિમાંશીએ જણાવ્યું કે આ વિચારો તેમના પર એટલા હાવી થઈ ગયા હતા કે તેઓ પોતાના ધર્મને કેટલો ગુમાવશે તે અંગે વિચારવા લાગ્યા હતા. તેમણે જણાવ્યું કે ધર્મ બદલવાનો વિચાર આવ્યા બાદ તેમણે ચારધામ યાત્રા કરવાનો નિર્ણય કર્યો હતો.

હિમાંશીએ કહ્યું, “એક રાત્રે એવી ઘટના બની જેમાં મને કહેવામાં આવ્યું કે આના પછી તું અમુક ધાર્મિક કાર્યો કે રીતિ-રિવાજો નહીં કરી શકે. મેં તે જ વખતે કહ્યું કે મારે પહેલા ચારધામ યાત્રા કરવી છે અને તમામ મંદિરોના દર્શન પૂરા કરવા છે, કારણ કે કદાચ પછી મને ક્યારેય આ મોકો નહીં મળે. જાણે હું મારા આરાધ્ય દેવોને વિદાય આપી રહી હોઉં તેવું મને લાગ્યું હતું.”

તેમણે ઉમેર્યું, “પછી એક દિવસ મારા મનમાં પ્રશ્ન થયો કે મૃત્યુ પછી મારું શું થશે? મને દફનાવવામાં આવશે કે અગ્નિદાહ આપવામાં આવશે? મારું આંતરમન મારી જાતને આ પ્રશ્ન પૂછી રહ્યું હતું. કોઈપણ વ્યક્તિની પોતાની પસંદગી હોવી જોઈએ કે તે શું અપનાવવા માંગે છે. દરેક વ્યક્તિને ધર્મ અને આસ્થા પસંદ કરવાની સ્વતંત્રતા હોવી જોઈએ.”

View this post on Instagram

A post shared by Paras S Chhabra (@paraschhabra)

કિન્નૌર કૈલાશ યાત્રાથી મળી સ્પષ્ટતા

પોતાના આંતરિક સંઘર્ષને ઉકેલવા અને પોતાને વધુ સારી રીતે સમજવા માટે હિમાંશીએ અત્યંત કઠિન ગણાતી કિન્નૌર કૈલાશની પદયાત્રા કરી હતી. તેમણે કહ્યું, “જ્યારે હું ત્યાં પહોંચી ત્યારે હું ખૂબ રડી પડી. તે યાત્રાએ મને જીવન અને આસ્થા અંગે નવી દ્રષ્ટિ આપી. મારા મનમાં સ્પષ્ટ થઈ ગયું કે મારે મારી મૂળ ઓળખ ગુમાવવી નથી.”

હિમાંશી અને આસિમ ચાર વર્ષ સુધી સાથે રહ્યા હતા અને ‘કલ્લા સોહણા નહીં’, ‘અફસોસ કરોગે’ જેવા હિટ મ્યુઝિક વીડિયોમાં પણ સાથે જોવા મળ્યા હતા. ડિસેમ્બર 2023 માં બંનેએ સત્તાવાર રીતે અલગ થવાની (બ્રેકઅપ) જાહેરાત કરી હતી.

રેલવે ટિકિટ બુકિંગ પર વધી શકે છે ચાર્જ? UPI થી ટિકિટ બુકિંગ 51% ને પાર થતાં IRCTC ની કમાણી પર અસર, જાણો વિગતો