શાહરૂખ ખાનની ‘જવાન’ મુશ્કેલીમાં, ફિલ્મની સ્ટોરી કોપી કરી હોવાનો લાગ્યો આરોપ, તપાસ થશે

શાહરૂખ ખાનની ફિલ્મ ‘જવાન’ મુશ્કેલીમાં હોય તેવું લાગી રહ્યું છે. આ ફિલ્મના નિર્માતાઓ પર વાર્તાની કોપી કરવાનો આરોપ છે. ફિલ્મ નિર્માતા મણિકમ નારાયણને આ અંગે તમિલ ફિલ્મ પ્રોડ્યુસર્સ કાઉન્સિલ (TFPC)માં ફરિયાદ નોંધાવી છે. મણિકમનો આરોપ છે કે ફિલ્મ જવાનની વાર્તા તેની 2006ની ફિલ્મ પેરારાસુ (Perarasu) જેવી છે. જવાનનું દિગ્દર્શન પ્રખ્યાત તમિલ નિર્દેશક એટલી કરી રહ્યા છે.

એટલી શાહરૂખ ખાન સ્ટારર જવાનથી બોલિવૂડમાં ડેબ્યૂ કરી રહ્યા છે. હાલમાં આ ફિલ્મનું શૂટિંગ ચાલી રહ્યું છે અને તે આવતા વર્ષે જૂનમાં રિલીઝ થશે. આ ફિલ્મમાં શાહરૂખ ખાન ઉપરાંત તમિલ અભિનેત્રી નયનતારા, વિજય સેતુપતિ, યોગી બાબુ અને પ્રિયમણિ જેવા સ્ટાર્સ પણ જોવા મળશે. જોકે, શૂટિંગ વચ્ચે હવે આ ફિલ્મ વિવાદોમાં ઘેરાયેલી જોવા મળી રહી છે. ફિલ્મ પેરારાસુના નિર્માતાએ વાર્તાની કોપી કરવા બદલ પ્રોડ્યુસર્સ કાઉન્સિલમાં એટલી વિરુદ્ધ ફરિયાદ નોંધાવી છે. ટાઈમ્સ ઓફ ઈન્ડિયાના અહેવાલ મુજબ તમિલ પ્રોડ્યુસર્સ કાઉન્સિલ 7 નવેમ્બર પછી મણિકમની ફરિયાદની તપાસ કરશે.

પેરારાસુમાં મુખ્ય અભિનેતા ડબલ રોલમાં હતો

અહેવાલોમાં કહેવામાં આવ્યું છે કે, નિર્માતા મણિકમ નારાયણન પાસે તે વાર્તાના અધિકારો છે. વિજયકાંતે પેરારાસુ ફિલ્મમાં જોડિયા ભાઈઓની ડબલ ભૂમિકા ભજવી હતી. આમાં એક પાત્રનું નામ પેરારાસુ અને બીજાનું નામ ઈલાવારાસુ હતું. હવે શાહરૂખ જવાનમાં ડબલ રોલમાં છે કે નહીં તે અંગે કોઈ સત્તાવાર માહિતી સામે આવી નથી, જો કે અહેવાલો અનુસાર શાહરૂખ પણ ફિલ્મમાં ડબલ રોલમાં જોવા મળશે.

એટલી પર ભૂતકાળમાં વાર્તાની કોપી કરવાનો હતો આરોપ

આ પહેલીવાર નથી જ્યારે દિગ્દર્શક એટલી પર ફિલ્મની વાર્તાની નકલ કરવાનો આરોપ લાગ્યો હોય. અગાઉ, એટલાની પ્રથમ ફિલ્મ રાજા રાની મણિરત્નમની મૌના રાગમ જેવી જ હોવાનું કહેવાય છે. તેની બીજી ફિલ્મ થેરી વિશે એવું પણ કહેવામાં આવ્યું હતું કે, તે ચિથરિયાન જેવી જ છે. આ સિવાય તેના મર્સલ પર પણ આવા જ આરોપો લગાવવામાં આવ્યા હતા. એવું કહેવાય છે કે મર્સલ કમલ હાસનની ફિલ્મ અબુર્વા સગોથરાર્ગલ સાથે ઘણી મળતી આવે છે. જો કે, આ વસ્તુઓ ક્યારેય સાબિત થઈ શકી નથી.