Goa Election Exit Poll Result 2022: ગોવામાંં કોંગ્રેસને મળશે બહુમતી કે ભાજપ બનાવશે સરકાર ? જાણો અન્ય પાર્ટીઓની સ્થિતિ
એક્ઝિટ પોલ મુજબ ગોવામાં બીજેપીને 17-19 સીટો મળી રહી છે. તે જ સમયે, કોંગ્રેસ બીજા નંબરની પાર્ટી તરીકે ઉભરી રહી છે. ગોવામાં કોંગ્રેસને 11-13 બેઠકો મળવાની ધારણા છે.
ગોવામાં (Goa Assembly Election 2022) 40 સભ્યોની વિધાનસભા બેઠકો માટેનો એક્ઝિટ પોલ આવી ગયો છે. TV9-Polstrat અનુસાર, ભાજપને (BJP) બહુમતી મળતી દેખાઈ રહી છે. પોલસ્ટ્રેટ મુજબ ગોવામાં બીજેપીને 17-19 સીટો મળી રહી છે. તે જ સમયે, કોંગ્રેસ બીજા નંબરની પાર્ટી તરીકે ઉભરી રહી છે. ગોવામાં કોંગ્રેસને 11-13 બેઠકો મળવાની ધારણા છે, જ્યારે 2017ની ચૂંટણીમાં કોંગ્રેસને સૌથી વધુ 17 બેઠકો મળી હતી. બીજી તરફ, TV9-Polstrat અનુસાર, આમ આદમી પાર્ટીને 1-4 સીટો મળતી જોવા મળી રહી છે. ગોવામાં અન્ય પક્ષોને 2-4 બેઠકો મળતી જણાય છે.
TV9-Pollstrat મુજબ, ભાજપનો વોટ શેર 36.6 ટકા, કોંગ્રેસ 28.4 ટકા, આમ આદમી પાર્ટી 7.2 ટકા અને અન્ય પક્ષો 27.8 ટકા છે. એક્ઝિટ પોલ પરથી અંદાજો લગાવી શકાય છે કે ગોવામાં કોની સરકાર બની શકે છે. ગોવામાં 14 ફેબ્રુઆરીએ 40 સભ્યોની ગોવા વિધાનસભા માટે મતદાન થયું હતું. દેશના પાંચ રાજ્યોમાં યોજાયેલી વિધાનસભા ચૂંટણીના પરિણામ 10 માર્ચે આવશે.
ગોવામાં ભાજપ સરકાર બનાવશે તેવું લાગી રહ્યું છે
40 વિધાનસભા બેઠકો ધરાવતા ગોવામાં મુખ્ય મુકાબલો ભાજપ-કોંગ્રેસ, આમ આદમી પાર્ટી, ટીએમસી, ગોવા ફોરવર્ડ પાર્ટી, મહારાષ્ટ્ર ગોમાંતક પાર્ટી વચ્ચે છે. તમને જણાવી દઈએ કે યુપીમાં આજે સાતમા અને છેલ્લા તબક્કાનું મતદાન થયું હતું, જ્યારે ગોવામાં 14 ફેબ્રુઆરીએ માત્ર એક જ તબક્કામાં મતદાન થયું હતું. જણાવી દઈએ કે 14 ફેબ્રુઆરીના રોજ થયેલા મતદાન દરમિયાન 78.94 ટકા મતદાન નોંધાયું હતું. એક્ઝિટ પોલ મુજબ ભાજપ ગોવામાં સૌથી મોટી પાર્ટી તરીકે ઉભરી રહી છે.
301 ઉમેદવારોના ભાવિ EVMમાં કેદ
ગોવામાં 14 ફેબ્રુઆરીએ મતદાન થયું હતું, જેમાં 301 ઉમેદવારોના ભાવિ ઈવીએમમાં નક્કી થઈ ગયા હતા. હવે 10 માર્ચે મતગણતરી બાદ હાર-જીતની જાહેરાત થશે. ગોવા વિધાનસભા ચૂંટણીમાં સીએમ અને બીજેપી નેતા પ્રમોદ સાવંત, પૂર્વ સીએમ અને ટીએમસીના ઉમેદવાર ચર્ચિલ અલેમાઓ, વિપક્ષી નેતા અને કોંગ્રેસના ઉમેદવાર દિગંબર કામત, બીજેપી નેતા રવિ નાઈક, અપક્ષ ઉમેદવાર લક્ષ્મીકાંત પારસેકર અને પૂર્વ સીએમ વિજય સરદેસાઈની વિશ્વસનીયતા દાવ પર છે.
બીજી તરફ ગોવાના પૂર્વ સીએમ અને ભાજપના દિગ્ગજ નેતા મનોહર પર્રિકરના પુત્ર ઉત્પલ પર્રિકરનો સામનો AAPના સીએમ ચહેરા અમિત પાલેકર સાથે છે. ગોવામાં 2017ની વિધાનસભા ચૂંટણીમાં કોંગ્રેસ સૌથી મોટી પાર્ટી તરીકે ઉભરી આવી હતી. 2017માં કોંગ્રેસને 17 અને ભાજપને 13 સીટો મળી હતી, જ્યારે અન્યને 10 સીટો મળી હતી.
આ પણ વાંચો : UP Election Exit Poll Result 2022: યુપીમાં ફરી બનશે ભાજપની સરકાર, અખિલેશને મળશે 140થી વધુ બેઠકો
આ પણ વાંચો : Punjab Election Exit Poll Result 2022: આમ આદમી પાર્ટી પંજાબમાં કરશે કમાલ ! કેજરીવાલની પાર્ટીને મળી શકે છે આટલી સીટ
