Tapi : વ્યારામાં ધર્મ પરિવર્તન કરાવવાના ગુનામાં એક જ પરિવારના 5 સભ્યો વિરૂદ્ધ ફરિયાદ
વ્યારા પોલીસે (Police) ધર્માંતરણના ગુનામાં સામેલ એક મહિલા ત્રણ યુવકો અને પ્રાથમિક પોલીસ તપાસમાં જાણવા મુજબ ચર્ચનો પાદરી એમ કુલ પાંચેય આરોપીઓને ધરપકડ કરી આગળની તપાસ હાથ ધરી છે.
તાપી (Tapi) જિલ્લાના વ્યારા પોલીસ સ્ટેશનમાં ધર્મ પરિવર્તન (Conversion) કરાવવાના ગુનામાં એક જ પરિવારના 5 સભ્યો વિરુદ્ધ ફરિયાદ (Complaint) દાખલ થતાં પોલીસ એક્શનમાં આવી હતી. પોલીસે ગુનામાં સામેલ પાદરી સહિત પાંચ આરોપીઓની રાત્રે જ ધરપકડ કરી વધુ તપાસ હાથ ધરી છે. સમગ્ર ઘટનાને પગલે પંથકમાં ભારે ચર્ચાનો વિષય બનવા પામ્યો છે.
વ્યારા શહેરના તાડકુવા સ્થિત અંબિકા નગરમાં રહેતા 2 યુવકો અને પરિવારના 3 સભ્યો સહિત 5 સામે અલગ અલગ પરિવારોની 2 હિન્દૂ યુવતીઓને પ્રેમજાળમાં ફસાવી ઘરે લઈ જઈ એક રાત સુધી ગોંધી રાખી ધર્મ પરિવર્તનની પ્રક્રિયા હાથ ધરી હતી. જેની જાણ યુવતીઓના પરિવારજનોને થતાં યુવતીના પરિવારના સભ્યોએ રાત્રે વ્યારા પોલીસ મથકે ગુનો દાખલ કરાવ્યો હતો.
વ્યારા પોલીસે ધર્માંતરણના ગુનામાં સામેલ એક મહિલા ત્રણ યુવકો અને પ્રાથમિક પોલીસ તપાસમાં જાણવા મુજબ ચર્ચનો પાદરી એમ કુલ પાંચેય આરોપીઓને ધરપકડ કરી આગળની તપાસ હાથ ધરી છે.
અત્રે ઉલ્લેખનીય છે કે ધર્માંતરણને લઈને રાજ્યમાં કડક કાયદો અમલી થવા છતાં ધર્માંતરણના કિસ્સાઓ અવારનવાર પ્રકાશમાં આવતાં જ રહ્યા છે, એવો જ એક તાપીના વ્યારામાં ગેરકાયદેસર રીતે ધર્માંતરણનો બનાવ બન્યો છે. વ્યારાની હિંદુ પરિવારની બે યુવતીઓને પ્રેમજાળમાં ફસાવી ઘરમાં લઈ જઈ એક રાત સુધી ગોંધી રાખી ખ્રિસ્તી ધર્મ પરિવર્તન કરાવવાની પ્રક્રિયા ચાલતી હતી. એક મહિલા સહિત પાંચ સામે આ બાબતે પોલીસમાં ફરિયાદ નોંધાતાં પોલીસે તાત્કાલિક અસરથી તમામ પાંચ આરોપીઓને ઝડપી સમગ્ર ઘટના ક્રમને લઈ વધુ તપાસ હાથ ધરી છે. પોલીસની તલસ્પર્શી અને ઝીણવટભરી તપાસ બાદ સત્ય હકીકત બહાર આવશે.