Ahmedabad: ટ્રેનમાં મુસાફરો સાથે ઠગાઈ કરતી ટોળકીનો પર્દાફાશ, નવા કાયદાનો ડર બતાવી થતી છેતરપીંડી
અમદાવાદના કાલુપુર રેલવે સ્ટેશનમાં ટ્રેનમાં નવા કાયદા મુજબ વધુ પૈસા લઈને મુસાફરી નહિ કરવાનો ડર બતાવતી ટોળકીની રેલવે પોલીસે ધરપકડ કરી.
Ahmedabad: કાલુપુર રેલવે સ્ટેશનમાં ટ્રેનમાં નવા કાયદા મુજબ વધુ પૈસા લઈને મુસાફરી નહિ કરવાનો ડર બતાવતી ટોળકીની રેલવે પોલીસે ધરપકડ કરી. આર્થિક સંકડામણ વધતા BSCના વિધાર્થીએ મિત્ર સાથે મળીને ઠગાઈ શરૂ કરી દીધી.
પોલીસ કસ્ટડીમાં જોવા મળતા આ શખ્સોએ ટ્રેનમાં મુસાફરી કરતા લોકોને નવા કાયદા અને નિયમો બતાવીને છેતરપીંડી આચરી છે. કાલુપુર રેલવે સ્ટેશનમાં ટ્રેનમાં નવા કાયદાનો ડર બતાવીને છેતરપીંડી કરતા પોલીસે 3 આરોપીની ધરપકડ કરી છે. ભેમા કુમાવત અને ઓમાંરામ પટેલએ મોદી સરકારના નવા કાયદા મુજબ ટ્રેનમાં મુસાફરી કરતા લોકોને પ્રવાસ દરમિયાન 2000 રૂપિયા જ રાખવા પડશે અને બીજા પૈસા જમા કરાવીને રેલવેનું પાસ લેવું પડશે તેવું કહીને મુસાફરો પાસેથી પૈસા પડાવતા હતા. આ મોડસ ઓપરેન્ડીથી સોનુ શર્મા નામના વ્યકિતએ પણ ઠગાઈ કરતા રેલવે પોલીસે ત્રણેયની ધરપકડ કરીને રૂ 13 હજાર અને 4 મોબાઈલ જપ્ત કર્યા છે.
પકડાયેલા આરોપીમા ભેમા કુમાવત અને ઓમાંરામ પટેલ બન્ને મૂળ રાજેસ્થાનના રહેવાસી છે. જેમા ભેમા કુમાવત BSCનો વિદ્યાર્થી છે. જયારે તેનો મિત્ર ઓમારામ 10 સુધીનો અભ્યાસ કરેલો છે. આર્થિક સંકડામણ વધતા ભેમાએ છેતરપિંડીથી પૈસા પડાવવાનુ પ્લાનીંગ શરૂ કર્યુ અને ટ્રેનમા મુસાફરી કરતા લોકોને નવા કાયદા અને નિયમોના નામે ડરાવતો હતો. તેના પહેરવેશ અને વાત કરવાની છટાથી મુસાફરો વિશ્વાસમાં આવી જતા અને પૈસા આપી દેતા હતા.
જયારે પાસ લેવા મુસાફર પહોચે ત્યારે ખબર પડતી કે તેમની સાથે છેતરપિંડી થઈ છે. આ બન્ને આ પ્રકારે અનેક લોકોને ચુનો લગાવ્યો હોવાની શકયતાને લઈને પોલીસે પુછપરછ શરૂ કરી છે. આ ઉપરાંત સુરતના સોનુ શર્મા નામનો બીજા ઠગ પણ આ મોડસ ઓપરેન્ડીથી લોકોને ચુનો લગાવતો હોવાથી પોલીસે તેની પણ ધરપકડ કરીને તપાસ શરૂ કરી છે.
ટ્રેનમા મુસાફરો સાથે મોદી સરકારના નવા કાયદા અને નિયમોના નામે ઠગાઈ કરતા આ ત્રણેય શખ્સોની રેલવે પોલીસે ધરપકડ કરીને તેમનુ મેડીકલ તપાસ કરીને રિમાન્ડની કાર્યવાહી શરૂ કરી છે. મહત્વનુ છે કે એક જ મોડસ ઓપરેન્ડીથી જુદી-જુદી ટોળકી વચ્ચે કોઈ સંબંધ છે કે નહિ અને અગાઉ કેટલા લોકો સાથે ઠગાઈ કરી છે. તે તમામ મુદ્દે હાલ પોલીસે તપાસ શરૂ કરી છે.