રૂપિયા 50ના દરની 5644 બનાવટી ચલણી નોટ ઝડપાઇ, સુરતનો શ્રોફ અંક્લેશ્વરમાંથી ઝડપાયો

ભરૂચ સ્પેશ્યલ ઓપરેશન ગ્રુપની ટીમે અંકલેશ્વરમાંથી રૂપિયા 2.82 લાખની બનાવટી ચલણી નોટ ઝડપી પાડી સુરતના શ્રોફની ધરપકડ કરી છે. પ્રથમ વાર રૂપિયા 50ના દરની બનાવટી ચલણી નોટ ઝડપાતા ચકચાર મચી જવા પામી છે. ૫૦ રુ.ની નોટ માટે લોકો ખાસ ચોકસાઈ રાખતા ન હોવાના કારણે ૫૦ રૂપિયાની બનાવતી ચલણી નોટ છાપી તેને વટાવવામાં આવતી હતી.

ભરૂચ સ્પેશ્યલ ઓપરેશન ગ્રુપની ટીમના સભ્યોને બાતમી મળી હતી કે એક ઈસમ બનાવટી ચલણી નોટ સાથે અંકલેશ્વરના અંસાર માર્કેટમાં ખરીદી કરવા આવનાર છે જેના આધારે પોલીસે વોચ ગોઠવી બાતમી વાળી બાઈક પર એક ઈસમ આવતા તેને અટકાવી તપાસ કરતા તેની પાસેથી ચલણી નોટ ભરેલ બેગ મળી આવી હતી. પોલીસે ચલણી નોટની ખરાઈ કરતા તે બનાવટી હોવાનું બહાર આવ્યું હતું.

પોલીસે સુરતના મોરથાણા ગામે રહેતા જીગ્નેશ રાણીંગા નામના આરોપીની ધરપકડ કરી તેની પાસેથી રૂપિયા 2.82 લાખની કિંમતની 50ના દરની 5644 બનાવટી ચલણી નોટ કબ્જે કરી કાયદેસરની કાર્યવાહી હાથ ધરી છે.પોલીસની પુછ્તાચ્માં આરોપીએ જાતે જ આ ચલણી નોટ બનાવી હોવાનું બહાર આવ્યું છે.

અત્રે મહત્વપૂર્ણ છે કે સામાન્યતઃ: રૂપિયા 500 અને 2000ની ચલણી નોટનું ડૂપ્લિકેશન થતું હોય છે ત્યારે પ્રથમ વાર રૂપિયા 50ના દરની બનાવતી ચલણી નોટ ઝડપાઇ છે. લોકો ૫૦ રૂપિયા જેવા નાના ચલણ માટે ખાસ ચોકસાઈ રાખતા ન હોવાથી આરોપીએ સરળતાથી ચલણ વહેતું કરવા નાના દરની નોટ બનાવી હતી. સિરિયલ નમ્બર બદલવા કોપ્યુટર ઉપર એકસાથે મોટા જથ્થામાં સ્કેન કરી નોટ બનાવી તેની પ્રિન્ટ કાઢી વટાવતો હતો.

અંકલેશ્વરના વિભાગીય પોલીસ અધિક્ષક ચિરાગ દેસાઈએ જણાવ્યું હતું કે અંકલેશ્વર રૂરલ પોલીસ સ્ટેશનમાં ઘટના સંદર્ભે ગુનો દાખલ કરવામાં આવ્યો છે. આરોપી સાથે અન્ય કોઈ સંકળાયેલું છ કે કેમ ? અને અન્ય ક્યાં ક્યાં નોટ વટાવવામાં આવી છે આવી છે? તે સહિતના પ્રશ્નનો જવાબ મેળવવા પૂછપરછ શરુ કરાઈ છે.