સંપૂર્ણપણે બદલાશે IITનો સિલેબસ, IIT દિલ્હીના ડિરેક્ટરની મોટી જાહેરાત

ઈન્ડિયન ઈન્સ્ટિટ્યૂટ ઓફ ટેક્નોલોજી એટલે કે આઈઆઈટીમાં (IIT) ભણતા અને આઈઆઈટીમાં એડમિશનની તૈયારી કરી રહેલા વિદ્યાર્થીઓ માટે મોટી માહિતી સામે આવી છે. IIT દિલ્હીના (IIT Delhi) નવા ડાયરેક્ટર રંગન બેનર્જીએ (Rangan Banarjee) દેશની સર્વશ્રેષ્ઠ એન્જિનિયરિંગ સંસ્થાનો અભ્યાસક્રમ બદલવાની માહિતી આપી છે. એક ઈન્ટરવ્યુમાં આઈઆઈટી દિલ્હીના ડાયરેક્ટર રંગન બેનર્જીએ કહ્યું કે, આઈઆઈટીનો અભ્યાસક્રમ સંપૂર્ણ રીતે બદલાઈ જવાનો છે. આ IITDના તમામ અભ્યાસક્રમો માટે હશે. તેમણે કહ્યું કે, આ સમયની જરૂરિયાત છે. તો નવો અભ્યાસક્રમ કેવો હશે?

રંગન બેનર્જીએ કહ્યું કે, માત્ર એક એન્જિનિયરિંગ ઇન્સ્ટિટ્યૂટથી શરૂ કરીને આજે IIT સંપૂર્ણપણે યુનિવર્સિટીઓમાં ફેરવાઈ ગઈ છે. હવે સમયની ગતિ સાથે તમારા અભ્યાસક્રમમાં ફેરફાર કરવાની જરૂર છે. આઈઆઈટી દિલ્હી લગભગ એક દાયકા પછી તેના અભ્યાસક્રમમાં (Syllabus) ફેરફાર કરવા જઈ રહી છે.

IIT દિલ્હીનો નવો અભ્યાસક્રમ કેવો હશે?

આઈઆઈટી દિલ્હીના નવા ડિરેક્ટરે પીટીઆઈને એક ઈન્ટરવ્યુમાં જણાવ્યું હતું કે, ‘અમે અમારા અભ્યાસક્રમની સંપૂર્ણ સમીક્ષા કરી રહ્યા છીએ, જેથી અમે વિદ્યાર્થીઓના અનુભવને સુધારી શકીએ. આ માટે એક પેનલ બનાવવામાં આવી છે. જે સંસ્થામાં ચાલતા તમામ કોર્સના અભ્યાસક્રમની સમીક્ષા કરી રહી છે.

તો નવો અભ્યાસક્રમ કેવો હશે? આ પ્રશ્નના જવાબમાં, તેમણે કહ્યું કે ‘અમે અમારા અભ્યાસક્રમમાં વિદ્યાર્થીઓને વાસ્તવિક દુનિયાની સમસ્યાઓનો પરિચય આપીને અને તેના ઉકેલ માટે તૈયાર કરવાનો પ્રયાસ કરી રહ્યા છીએ. તે મુજબ અભ્યાસક્રમ પણ તૈયાર કરવામાં આવશે.

IIT દિલ્હીના ડાયરેક્ટર બનતા પહેલા IIT બોમ્બેમાં પ્રોફેસર રહેલા રંગન બેનર્જીએ કહ્યું હતું કે, ‘આશા છે કે આવતા વર્ષે તમે ઘણા બધા બદલાવ જોશો. હાલમાં, અમે ફેકલ્ટી, વિદ્યાર્થીઓ અને અમારા ભૂતપૂર્વ વિદ્યાર્થીઓ સાથે ઊંડાણપૂર્વક ચર્ચા અને પરામર્શ કરી રહ્યા છીએ.

IIT દિલ્હીમાંથી અત્યાર સુધીમાં 54,000 સ્નાતકો

પ્રોફેસર બેનર્જીએ કહ્યું, ‘જ્ઞાન અને ટેકનોલોજીનો વ્યાપ ખૂબ જ ઝડપથી બદલાઈ રહ્યો છે. અમારે તેની ગતિ સાથે અમારો અભ્યાસક્રમ મેળવવો પડશે. તેના માટે અભ્યાસક્રમનો સતત વિકાસ કરવો અને તેને સુસંગત રાખવો જરૂરી છે. વર્ગખંડના અભ્યાસ અને પ્રેક્ટિકલ વચ્ચે સમાનતા હોવી જોઈએ.

IIT દિલ્હીની શરૂઆતથી અત્યાર સુધીમાં લગભગ 54 હજાર વિદ્યાર્થીઓ એન્જિનિયરિંગ, ભૌતિક વિજ્ઞાન, મેનેજમેન્ટ, સામાજિક વિજ્ઞાન સહિતના તમામ અભ્યાસક્રમોમાંથી સ્નાતક થયા છે.

નવા IIT Syllabusમાં વધુ ફ્લેક્સિબિલિટી

રંગન બેનર્જીએ કહ્યું કે, નવા અભ્યાસક્રમમાં વિદ્યાર્થીઓને વધુ ફ્લેક્સિબિલિટી મળશે તેવી અપેક્ષા છે. આજનો પડકાર એ છે કે, અમે વિદ્યાર્થીઓની એક પેઢી સાથે કામ કરી રહ્યા છીએ. જેમાં એકાગ્રતાનો અભાવ છે. તેઓ ખૂબ જ ટૂંકા સમય માટે કોઈ વસ્તુ પર ધ્યાન આપવામાં સક્ષમ છે. આવી સ્થિતિમાં માત્ર વર્ગખંડમાં ભણાવવાથી કામ નહીં ચાલે. અમારે તેમને રિયલ લાઇફ પ્રોજેક્ટ્સ પર કામ કરાવવાનું છે.