નરેન્દ્ર મોદી સરકાર IPO દ્વારા સરકારી કંપનીનો હિસ્સો વેચશે,સરકારના નિર્ણય ઉપર કેબિનેટે મંજૂરીની મહોર લગાવી

કેબિનેટે ભારતીય રિન્યુએબલ એનર્જી ડેવલપમેન્ટ એજન્સી લિમિટેડ એટલે કે IRDEA ના IPOને મંજૂરી આપી છે. સરકાર તેમાં પોતાનો હિસ્સો વેચીને ભંડોળ એકત્ર કરશે. વડાપ્રધાન નરેન્દ્ર મોદીના નેતૃત્વ હેઠળની કેબિનેટ કમિટી ઓન ઈકોનોમિક અફેર્સ -CCEA એ IREDAના લિસ્ટિંગને મંજૂરી આપી દીધી છે. આ કંપની રિન્યુએબલ એનર્જી અને સંબંધિત પ્રોજેક્ટ માટે નાણાં પૂરાં પાડે છે. આ કંપની નાણાકીય વર્ષ 2023-24માં શેરબજારમાં લિસ્ટ થશે. IREDA એ સેન્ટ્રલ પબ્લિક સેક્ટર અંડરટેકિંગ – CPSE છે જે નવી અને નવીનીકરણીય ઉર્જા મંત્રાલય હેઠળ આવે છે.

આગામી નાણાકીય વર્ષમાં IPO આવી શકે છે

લિસ્ટિંગ પ્રક્રિયાનું કામ DIPAM દ્વારા પૂર્ણ કરવામાં આવશે. આ IPO આવતાની સાથે જ સરકારના રોકાણનું મૂલ્ય ખુલશે. દેશની સામાન્ય જનતા પણ તેમાં હિસ્સો ખરીદી શકે છે. લિસ્ટિંગ બાદ કંપનીનું ગવર્નન્સ વધુ સારું રહેશે અને વધુ પારદર્શિતા આવશે.

NTPC હવે NGELમાં મર્યાદાથી વધુ રોકાણ કરી શકે છે

કેબિનેટે NTPC અંગે પણ નિર્ણય લીધો છે. આ નિર્ણય હેઠળ હવે મહારત્ન કંપની એનટીપીસીને એનટીપીસી ગ્રીન એનર્જી લિમિટેડમાં નિર્ધારિત મર્યાદા કરતાં વધુ રોકાણ કરવાની મંજૂરી મળી ગઈ છે. આ સિવાય NTPC ગ્રીન એનર્જી લિમિટેડ એટલે કે NGEL હવે NTPC રિન્યુએબલ એનર્જી લિમિટેડ એટલે કે NREL અથવા અન્ય પેટાકંપનીઓ અને સંયુક્ત સાહસોમાં પણ રોકાણ કરી શકે છે.

ગ્રીન ઈકોનોમીને લઈને ઈમેજ મજબૂત રહેશે

NREL એટલે કે NTPC રિન્યુએબલ એનર્જી લિમિટેડ પાસે આવનારા સમયમાં મોટી યોજનાઓ છે. કંપની વર્ષ 2032 સુધીમાં રિન્યુએબલ એનર્જીની તેની ક્ષમતાને 60 GW સુધી વધારવાનું લક્ષ્ય ધરાવે છે. એનટીપીસીને એનટીપીસી ગ્રીન એનર્જી લિમિટેડમાં રોકાણ કરવા માટે મુક્તિ મળવાથી ભારતની હરિયાળી અર્થવ્યવસ્થાની છબી મજબૂત થશે. રિન્યુએબલ એનર્જીના વિકાસથી કોલસા પરની નિર્ભરતા ઓછી થશે. દેશની કોલસાની આયાત ઘટશે. આ તમામ લાભો ઉપરાંત રોજગારની નવી તકો ખુલશે.

22 માર્ચે વધુ એક  કંપનીનો IPO આવશે

આવતા અઠવાડિયે રોકાણ માટે IPO ખુલવા જઈ રહ્યો છે. આ IPO મેઇડન ફોર્જિંગનો છે. કંપનીનો IPO આવતા અઠવાડિયે 22 માર્ચે ખુલશે. રોકાણકારો 24 માર્ચ સુધી તેમાં રોકાણ કરી શકશે. સ્ટીલ રોડ્સ અને વાયર ઉત્પાદક મેઇડન ફોર્જિંગ્સે શુક્રવારે જણાવ્યું હતું કે તે પ્રારંભિક જાહેર ભરણું -IPO દ્વારા રૂ. 24 કરોડ એકત્ર કરવાની યોજના ધરાવે છે. કંપનીએ એક નિવેદનમાં જણાવ્યું કે IPO 22 થી 24 માર્ચ સુધી ખુલશે.