ભારતીય શેરબજારમાં કડાકાનો 19 મહિનાનો રેકોર્ડ તૂટ્યો, રોકાણકારોના 4.50 લાખ કરોડ સ્વાહા

દેશની સૌથી મોટી ખાનગી ધિરાણકર્તા HDFC બેંકના નબળા ત્રિમાસિક પરિણામોના કારણે શેરબજારમાં 19 મહિના પછી એક જ દિવસમાં સૌથી મોટો ઘટાડો જોવા મળ્યો હતો.બુધવારે સેન્સેક્સ  1600 પોઈન્ટથી વધુના ઘટાડા સાથે બંધ થયો હતો. બીજી તરફ નિફ્ટીમાં 2 ટકાથી વધુનો ઘટાડો જોવા મળ્યો છે.

જૂન 2022 પછી પહેલીવાર શેરબજારમાં આટલો મોટો ઘટાડો જોવા મળ્યો છે. બુધવારે HDFC બેન્કના શેરમાં 8 ટકાનો ઘટાડો થયો હતો અને માર્કેટ કેપમાંથી રૂપિયા 1 લાખ કરોડનું નુકસાન થયું હતું. શેરબજારમાં એકંદરે ઘટાડાને કારણે બજારના રોકાણકારોને પણ રૂપિયા 4.50 લાખ કરોડથી વધુનું નુકસાન થયું છે.

19 મહિનામાં સૌથી મોટો ઘટાડો નોંધાયો

સ્થાનિક શેરબજારોમાં તાજેતરના ઉછાળા પછી બુધવારે મોટો ઘટાડો નોંધાયો હતો અને BSE સેન્સેક્સમાં 1,628 પોઈન્ટનો ઘટાડો થયો હતો. છેલ્લા 19 મહિનામાં સેન્સેક્સમાં એક દિવસનો આ સૌથી મોટો ઘટાડો છે. બોમ્બે સ્ટોક એક્સચેન્જનો મુખ્ય સૂચકાંક સેન્સેક્સ 1,628.01 પોઈન્ટ અથવા 2.23 ટકા ઘટીને 71,500.76 પોઈન્ટ પર પહોંચ્યો હતો. ટ્રેડિંગ દરમિયાન એક સમયે તે ઘટીને 1,699.47 પોઈન્ટ પર પહોંચી ગયો હતો. નેશનલ સ્ટોક એક્સચેન્જનો મુખ્ય સૂચકાંક નિફ્ટી પણ 460.35 પોઈન્ટ અથવા 2.09 ટકા ઘટીને 21,571.95 પોઈન્ટ પર બંધ થયો હતો. શેરબજારમાં સતત બીજા દિવસે ઘટાડો નોંધાયો છે. 13 જૂન, 2022 પછી એક જ દિવસમાં મુખ્ય સૂચકાંકો…સેન્સેક્સ અને નિફ્ટીમાં ટકાવારીની દ્રષ્ટિએ આ સૌથી મોટો ઘટાડો છે. બીએસઈ સેન્સેક્સ મંગળવારે 73,427.59 પોઈન્ટની તેની અત્યાર સુધીની સર્વોચ્ચ સપાટીએ પહોંચી ગયો હતો. નિફ્ટી પણ 22,124.15 પોઈન્ટ ઉપર ગયો હતો.

HDFC બેંકના શેરમાં મોટો ઘટાડો

સેન્સેક્સ કંપનીઓમાં એચડીએફસી બેન્ક આઠ ટકાથી વધુ તૂટ્યો હતો. ત્રિમાસિક પરિણામો બજારની અપેક્ષા મુજબ ન આવ્યા બાદ કંપનીના શેરમાં ઘટાડો થયો છે. આ સાથે કંપનીની માર્કેટ મૂડીમાં રૂ. 1 લાખ કરોડથી વધુનો ઘટાડો થયો છે. HDFC બેંકે મંગળવારે તેના નાણાકીય પરિણામો જાહેર કર્યા. આ મુજબ ઓક્ટોબર-ડિસેમ્બર ક્વાર્ટરમાં તેનો સંકલિત ચોખ્ખો નફો 2.65 ટકા વધીને રૂ. 17,258 કરોડ થયો છે. તેના કારણે તેણે ગયા સપ્ટેમ્બર ક્વાર્ટરમાં રૂ. 16,811 કરોડનો ચોખ્ખો નફો કર્યો હતો. જેના કારણે HDFCનો શેર 8.46 ટકા ઘટીને રૂ. 1536.90 પર બંધ થયો હતો. ટ્રેડિંગ સેશન દરમિયાન કંપનીના શેર પણ 1527.25 રૂપિયાના નીચલા સ્તરે ગયા હતા.

રોકાણકારોને રૂપિયા 4.59 લાખ કરોડનું નુકસાન

શેરબજારમાં ભારે ઘટાડાથી રોકાણકારોને 4.59 લાખ કરોડ રૂપિયાનું નુકસાન થયું છે. રોકાણકારોનો નફો અને નુકસાન BSE ના માર્કેટ કેપ સાથે જોડાયેલ છે. એક દિવસ પહેલા BSEનું માર્કેટ કેપ રૂ. 3,74,95,260.82 કરોડ હતું, જે આજે ઘટીને રૂ. 3,70,35,933.18 કરોડ થયું છે. આનો અર્થ એ થયો કે બીએસઈના બજાર મૂલ્યમાં રૂ. 4,59,327.64 કરોડનો ઘટાડો થયો હતો. મંગળવાર અને બુધવારના પતન સહિત બે દિવસમાં રોકાણકારોને રૂ. 5,73,576.83 કરોડનું નુકસાન થયું છે.