કોરોનાકાળમાં સાઈબર સિક્યોરિટી પર વધ્યું કંપનીઓનું ફોકસ, આગામી વર્ષે બજેટ વધારવા પર વિચાર કરી રહી છે કંપનીઓ

કોરોનાકાળ દરમિયાન સાયબર એટેકમાં નોંધપાત્ર વધારો થયો છે. મોટાભાગનું કામ ઓનલાઈન થઈ રહ્યું છે, જેના કારણે સાયબર સુરક્ષા એક મોટો મુદ્દો છે. સાયબર ખતરાને જોતા દેશની લગભગ 80 ટકા કંપનીઓ વર્ષ 2022માં તેમના સાયબર સુરક્ષા બજેટમાં વધારો કરી શકે છે. વૈશ્વિક કન્સલ્ટિંગ કંપની પીડબલ્યુસીએ એક સર્વેમાં આ વાત કહી છે. પીડબલ્યુસીના ‘ડિજિટલ ટ્રસ્ટ ઈનસાઈટ્સ-2022’ સર્વે અનુસાર સુરક્ષાનું જોખમ સતત વધી રહ્યું છે અને કંપનીઓ તેમના જોખમોનું મેનેજમેન્ટ કરવા માટે સાયબર સુરક્ષામાં પહેલા કરતાં ઘણું વધારે રોકાણ કરી રહી છે.

સર્વે મુજબ ઘણી કંપનીઓએ તેમના સાયબર જોખમોનું સંચાલન કરવા માટે બહુવિધ સાયબર સુરક્ષા સાધનો અને ટેકનિકોમાં રોકાણ કર્યું છે. સર્વે અનુસાર “સર્વેમાં સામેલ કંપનીઓમાંથી 82 ટકાએ 2022માં તેમના સાયબર સુરક્ષા બજેટમાં વધારો કરવાની સંભાવના વ્યક્ત કરી છે. આ ઉપરાંત દેશની 41 ટકા કંપનીઓ 2022માં તેમના સાયબર બજેટમાં 10 ટકાથી વધુની વૃદ્ધિની આશા રાખી રહી છે.

109 એક્ઝીક્યુટીવનો અભિપ્રાય લેવામાં આવ્યો

આ સર્વેમાં વૈશ્વિક સ્તરે 3,602 બિઝનેસ, ટેક્નોલોજી અને સુરક્ષા અને અન્ય સુરક્ષા અધિકારીઓના અભિપ્રાયો લેવામાં આવ્યા હતા. તેમાં મુખ્ય કાર્યકારી અધિકારી (CEO), કોર્પોરેટ ડિરેક્ટર, મુખ્ય નાણાકીય અધિકારી (CFO) વગેરેનો સમાવેશ થાય છે. સર્વેના ભારતીય સંસ્કરણમાં 109 અધિકારીઓના અભિપ્રાય લેવામાં આવ્યા હતા.

ઈન્ડિવિઝ્યુઅલ માટે પણ સાયબર જોખમ વધ્યું 

સાયબર સુરક્ષા હવે ઈન્ડિવિઝ્યુઅલ સ્તરે પણ ખૂબ જ મહત્વપૂર્ણ છે. ઈન્ડિવિઝ્યુઅલ કેટલીક બાબતોને ધ્યાનમાં રાખીને જોખમ ઘટાડી શકે છે. જો તમે વધારે ઓનલાઈન ખરીદી કરો છો તો સૌ પ્રથમ સુનિશ્ચિત કરો કે તમે બધા પોર્ટલ પર સમાન પાસવર્ડનો ઉપયોગ નથી કરતા. તમારો પાસવર્ડ જટિલ રાખો અને તેનો તમારી અંગત વિગતો સાથે કોઈ લેવાદેવા ન હોવા જોઈએ. જો તમે ઑનલાઈન ખરીદી માટે ડેબિટ અથવા ક્રેડિટ કાર્ડનો ઉપયોગ કરો છો તો દર ત્રણ મહિને તમારો પીન નંબર બદલો. ડિજિટલ વોલેટ્સ માટે પણ તેનો ઉપયોગ કરવો જોઈએ.

અલગ-અલગ યુઝર આઈડીનો ઉપયોગ કરો

આ સિવાય અલગ અલગ યુઝર આઈડી રાખો. આનાથી ડેટાની ચોરી અને છેતરપિંડીની શક્યતાઓ ઘટી જાય છે. યુનિક યુઝર આઈડી બનાવવા માટે પોર્ટલનું નામ ઉમેરો.

મોટી વેબસાઈટ્સ પર ખરીદી કરો

જો કે આનાથી કોઈ ગેરંટી મળતી નથી. પરંતુ મોટા વ્યવસાયો સારી સિક્યોરિટી સિસ્ટમ આપતા હોય છે અને સામાન્ય રીતે ફક્ત તે જ વેન્ડર્સ સાથે ડીલ કરે છે જે વેરીફાઈડ હોય.

આ પણ વાંચો :  SBI ની સેવાઓ માટે હવે બેંક સુધી જવાની જરૂર નથી, એક SMS અથવા મિસ્ડ કોલ તમને જરૂરી માહિતી પળભરમાં આપશે