વિદેશી મુદ્રા ભંડારમાં મોટો ઘટાડો : ફોરેક્સ રિઝર્વ 5.24 અબજ ડૉલર ઘટીને 617.23 અબજ ડૉલર સુધી લપસ્યું

Forex Reserve :દેશના ફોરેન કરન્સી રિઝર્વમાં મોટો ઘટાડો થયો છે. રિઝર્વ બેંક ઓફ ઈન્ડિયાએ ડેટા જાહેર કરીને કહ્યું છે કે 9 ફેબ્રુઆરી 2024ના રોજ પૂરા થયેલા સપ્તાહમાં વિદેશી મુદ્રા ભંડારમાં 5.24 બિલિયન ડોલરનો ઘટાડો થયો છે. જ્યારે આ અગાઉ પ્રથમ સપ્તાહમાં વિદેશી મુદ્રા ભંડારમાં 5.73 અબજ ડોલરનો ઉછાળો જોવા મળ્યો હતો.

વિદેશી મુદ્રા ભંડારમાં 5.24 અબજ ડોલરનો ઘટાડો

રિઝર્વ બેંક ઓફ ઈન્ડિયાએ શુક્રવારે, 16 ફેબ્રુઆરી 2024 ના રોજ વિદેશી મુદ્રા ભંડારનો ડેટા જાહેર કર્યો છે. આ ડેટા અનુસાર, વિદેશી મુદ્રા ભંડાર 5.24 અબજ ડોલર ઘટીને 617.23 અબજ ડોલર થઈ ગયો છે, જે પ્રથમ સપ્તાહમાં 622.469 અબજ ડોલર હતો. આરબીઆઈના ડેટા અનુસાર વિદેશી ચલણની સંપત્તિમાં પણ ભારે ઘટાડો જોવા મળ્યો છે. ફોરેન કરન્સી એસેટ્સ 4.80 બિલિયન ડોલર ઘટીને 546.52 બિલિયન ડોલર થઈ છે.

સોનાના ભંડારમાં પણ ઘટાડો થયો

આરબીઆઈના સોનાના ભંડારમાં ઘટાડો થયો છે. આરબીઆઈનો સોનાનો ભંડાર 350 મિલિયન ડોલર ઘટીને 47.73 અબજ ડોલર થયો છે. એસડીઆરમાં પણ ઘટાડો થયો છે અને તે 55 મિલિયન ડોલર ઘટીને 18.13 અબજ ડોલર થયો છે. ઈન્ટરનેશનલ મોનેટરી ફંડ (IMF)માં જમા અનામતમાં પણ ઘટાડો થયો છે અને તે 28 મિલિયન ડોલર ઘટીને 4.82 અબજ ડોલર થઈ ગયો છે.

16 ફેબ્રુઆરી 2024ના રોજ કરન્સી માર્કેટમાં ડોલર સામે રૂપિયો મજબૂત થયો છે. રૂપિયો 4 પૈસા મજબૂત થયો છે અને એક ડોલર સામે 83.01 ના સ્તર પર બંધ થયો છે, જે એક ટ્રેડિંગ સેશન પહેલા રૂ. 83.05 ના સ્તરે બંધ હતો.

ભારત દેશની બાહ્ય ધિરાણની જરૂરિયાતોને પહોંચી વળવા સક્ષમ : ગવર્નર

જ્યારે સ્થાનિક ચલણને સ્થિર કરવા માટે આરબીઆઈ ચલણ બજારોમાં હસ્તક્ષેપ કરે છે ત્યારે વિદેશી ચલણની સંપત્તિમાં મોટો ફેરફાર જોવા મળે છે. ચલણ બજારોમાં હસ્તક્ષેપને કારણે, વિદેશી ચલણ અસ્કયામતોમાં વધારો અથવા ઘટાડો થાય છે, જે આરબીઆઈના વિદેશી વિનિમય અનામતને અસર કરે છે. આરબીઆઈ ગવર્નર પહેલા જ કહી ચૂક્યા છે કે ભારત દેશની બાહ્ય ધિરાણની જરૂરિયાતોને પહોંચી વળવા માટે સંપૂર્ણ રીતે સક્ષમ છે.

આ પણ વાંચો : Ullu ડિજિટલનો આવશે IPO, SME સેગમેન્ટમાં અત્યાર સુધીનો સૌથી મોટો 135-150 કરોડ રૂપિયાનો આઈપીઓ